‏ Isaiah 38

Xizkiyanıń kesel bolıwı hám shıpa tabıwı

1Sol kúnleri Xizkiya awırıp, ólim tóseginde jattı. Sonda Amos ulı Iyshaya payǵambar oǵan kelip bılay dedi:

– Jaratqan Iye bılay deydi: «Úy-ishińe wásiyatnamańdı qaldırıp, ırzalasa ber, sebebi táwir bolmaysań, óleseń».

2Xizkiya júzin diywalǵa qaratıp, Jaratqan Iyege duwa etip:

3– O, Jaratqan Iye! Aldıńda meniń shın júrekten sadıqlıq penen jasaǵanımdı hám názerińde tuwrı islerdi islep júrgenimdi esley gór! – dedi hám óksip-óksip jıladı.

4Sonda Iyshayaǵa Jaratqan Iyeden mınaday sóz tústi:

5– Izińe qaytıp, Xizkiyaǵa mına xabardı jetkiz: «Babań Dawıttıń Qudayı Jaratqan Iye bılay deydi: Duwańdı esittim, kóz jaslarıńdı kórdim. Ómirińdi on bes jılǵa uzaytaman. 6Ózińdi de, bul qalanı da Assiriya patshasınıń qolınan qutqarıp, bul qalanı qorǵayman.

7Jaratqan Iyeniń, yaǵnıy Meniń saǵan Óz sózimdi orınlaytuǵınımdı bildiretuǵın belgi mınaw: 8Axaz soqtırǵan teksheniń ústine túsip turǵan sayanı on adım artqa jıljıtaman».

Sonda teksheniń ústine túsip turǵan saya on adım artqa jıljıdı.

9Yahuda patshası Xizkiya táwir bolǵannan keyin, mına jırdı jazdı:

10«Men: „Ómirimniń gúllengen shaǵında,
Óliler mákanınıń dárwazasınan ótip ketemen.
Qalǵan ómir jıllarımnan mahrum etildim“, – dedim.
11Jáne: „Tiriler áleminde Jaratqan Iyeni kórmeymen,
Bunnan bılay, insan zatına kózim túspes,
Bul dúnyada jasaǵanlardıń janında da bolmaspan“, – dedim.
12Úyim shopannıń shatırı kibi,
Suwırılıp, qolımnan alındı.
Ómirimdi toqıwshı sıyaqlı ótkerdim,
Jaratqan Iye meni toqıw úskenesinen kesip alıp tasladı.
Bir kún ishinde ómirimdi aqırına jetkerdiń.
13Azanǵa shekem tózim berip shıdadım,
Ol arıslan kibi, barlıq súyeklerimdi sındırdı.
Bir kún ishinde ómirimdi aqırına jetkerdiń.
14Men qarlıǵash yaki tırna kibi baqırdım,
Kepter kibi zarladım.
Joqarıǵa qarawdan kózlerim taldı,
Men zulımlıqqa ushıradım, járdem ber, Iye!

15Ne deyin? Meniń menen sóylesken de, onı ámelge asırǵan da Ózi.
Qálbimdegi qayǵını eske alıp,
Ómirim boyı, abaylap jasayman.
16Iye, Seniń qararıń adamlarǵa ómir bere aladı,
Meniń ómir jıllarım da maǵan qayta berildi,
Densawlıǵımdı tiklep, ómirimdi saqlap qala gór!
17Mine, shekken azabım men ushın jaqsılıqqa boldı,
Ómirimdi nabıt bolıw shuqırınan qutqardıń.
Barlıq gúnalarımdı artıńa ılaqtırdıń.
18Óliler mákanı Seni alǵıslamas,
Ólim Saǵan maqtaw aytpas,
Tuńǵıyıqqa túskenler Seniń sadıqlıǵıńa úmit baylamas.
19Búgin meniń islegenim sıyaqlı,
Tiriler, tek tiriler ǵana Saǵan alǵıs aytar,
Ákeler balalarına Seniń sadıqlıǵıń tuwralı aytıp berer.
20Jaratqan Iye meni qutqarar,
Pútkil ómirimiz boyı Jaratqan Iyeniń Úyinde,
Tarlı saz ásbapları menen qosıq aytamız».

21Iyshaya patshanıń adamlarına: «Keptirip nıǵızlanǵan ánjir alıp kelip, onı jaraǵa qoyıń, ol sawalıp ketedi», – degen edi. 22Sonda Xizkiya Iyshayadan: «Jaratqan Iyeniń Úyine baratuǵınımdı qanday belgi arqalı bilemen?» – dep soraǵan edi.