Isa 39 | KaaIBT22L | STEP | Sol arada Xizkiyanıń awırıp, keyin táwir bolǵanın esitken Babiloniya patshası Baladan ulı Merodax-Baladan Xizkiyaǵa xatlar hám sawǵalar jiberdi.

‏ Isaiah 39

Babilonnan kelgen elshiler

1 Sol arada Xizkiyanıń awırıp, keyin táwir bolǵanın esitken Babiloniya patshası Baladan ulı Merodax-Baladan Xizkiyaǵa xatlar hám sawǵalar jiberdi. 2 Xizkiya elshilerdi qabıl etti hám olarǵa óz qaznasındaǵı zatlardıń hámmesin: gúmis hám altınların, xosh iyisli zatların, qımbatbaha mayların, qural-jaraq saqlanatuǵın bólmesin kórsetti. Xizkiyanıń sarayında da, patshalıǵında da olarǵa kórsetilmegen hesh nárse qalmadı.

3 Sonda payǵambar Iyshaya patsha Xizkiyanıń janına kelip, oǵan:

– Bul adamlar sizge ne dedi? Olar qay jaqtan kelipti? – dep soradı. Xizkiya oǵan:

– Olar maǵan uzaq elden, Babiloniyadan kelgen, – dep juwap berdi.

4 Iyshaya:

– Olar sarayıńızda ne kórdi? – dep soradı. Xizkiya:

– Sarayımdaǵı hámme nárseni kórdi. Qaznamda olarǵa kórsetpegen hesh nársem qalmadı, – dep juwap berdi.

5 Sonda Iyshaya Xizkiyaǵa bılay dedi:

– Onda Álemniń Jaratqan Iyesiniń sózin esitiń: 6 «Sarayıńdaǵı hámme nárse hám ata-babalarıńnıń usı kúnge shekem jıynaǵan hámme nársesi Babilonǵa alıp ketiletuǵın kún keledi, hesh nárse qalmaydı, – deydi Jaratqan Iye. 7 – Seniń násilińnen bolǵan ayırım urpaqlarıń da alıp ketilip, Babiloniya patshasınıń sarayında xızmetker boladı». 8 Xizkiya Iyshayaǵa:

– Jaratqan Iyeniń siz arqalı aytqan sózleri jaqsı sózler, – dedi. Sebebi ol ishinen: «Hesh bolmaǵanda, meniń zamanımda tınıshlıq hám abadanshılıq boladı», – dep oyladı.