‏ Isaiah 40

Jubatıwshı sózler

1Jubatıń, xalqıma táselle beriń!
– deydi Qudayıńız. –
2Erusalimge jumsaq sózler aytıń,
Sawash múddetiniń tawısılǵanın,
Qılmıslarınıń keshirilgenin,
Barlıq gúnalarınıń jazasın Jaratqan Iyeniń qolınan,
Eki ese etip alǵanın járiyalań.
3Baqırǵan bir dawıs esitiledi:
«Shól dalada Jaratqan Iyege jol tayarlańlar,
Qula dalada Qudayımız ushın dúziw hám úlken bir jol ashıńlar!
4Barlıq oypatlıqlar toltırılsın,
Taw-tóbeler páske shóksin,
Qıysıq jerler dúzetilsin,
Budır jerler tegislensin.
5Sonda Jaratqan Iyeniń saltanatı ayan bolıp,
Pútkil adamzat bunı birgelikte kóredi.
Bunı Jaratqan Iye aytadı».

6Dawıs: «Baqır», – dedi.
Men: «Ne dep baqırayın?» – dep soradım.
Dawıs bılay dedi:
«Pútkil adamzat shópke,
Onıń pútkil sadıqlıǵı – atızdaǵı gúlge uqsaydı.
7Jaratqan Iye demin úplegende,
Shóp quwraydı, gúl solıydı.
Haqıyqattan da, xalıq – bul shóp.
8Shóp quwraydı, gúl solıydı.
Biraq Qudayımızdıń sózi máńgi turadı».

9Háy, Sionǵa xosh xabar alıp keliwshi,
Biyik tawǵa shıq!
Háy, Erusalimge xosh xabar alıp keliwshi,
Bar dawısıń menen baqır!
Dawısıńdı kóter, qorqpa.
Yahuda qalalarına: «Mine, sizlerdiń Qudayıńız!» – dep ayt.
10Mine, Quday Iye qúdiret penen kelip,
Húkimdarlıqtı qolına aladı.
Onıń sıyı Ózi menen birge,
Miynettiń esesin qaytarıw Onıń qolında.
11Ol Óz súriwin shopan kibi baǵadı,
Qozılardı qolına alıp,
Olardı kóterip, bawırına basadı,
Emiziwli qoylarǵa ǵamxorlıq penen jol kórsetedi.

Qudaydıń ullılıǵı

12Kim suwlardı alaqanı menen,
Kóklerdi qarısı menen ólshedi?
Kim jerdiń topıraǵın ólshem ıdısına salǵan,
Yamasa tawlardı tárezide,
Tóbelerdi tárezi pállesinde ólshegen?
13Jaratqan Iyeniń Ruwxına kimniń aqılı jetken,
Yamasa kim Oǵan keńes bergen?
14Aqıl alıw ushın Ol kimnen másláhát soradı,
Yamasa Oǵan kim ádalat jolın úyretti?
Oǵan bilim berip,
Túsinik jolın kórsetken kim?

15Mine xalıqlar shelektegi suw tamshısınday,
Tárezilerdegi shań sıyaqlı kórinedi,
Ol atawlardı uwıs topıraq sıyaqlı kóteredi.
16Lebanonnıń otını qurbanlıqtı jaǵıwǵa,
Malları jandırılatuǵın qurbanlıqqa azlıq etedi.
17Pútkil milletler Onıń aldında hesh nárse emes,
Olar Ol ushın joqtan da, boslıqtan da pás sanaladı.

18Onda Qudaydı kimge uqsatasız?
Onıń biynesin kimge teńeysiz?
19Butqa ma? Buttı ónerment quyıp,
Zerger onı altınǵa qaplaydı,
Onıń ushın gúmis shınjır soǵıladı.
20Eger buǵan qurbı jetpese,
Shirimeytuǵın bir aǵashtı saylap alıp,
Qozǵalmaytuǵın but soqtırıw ushın,
Sheber ónermentti izleydi.

21Bilmeysizler me, esitpedińler me?
Áwel bastan, sizlerge aytılmadı ma?
Dúnya jaratılǵannan beri túsinbedińiz be?
22Quday jer ústindegi aspan gúmbezinde otır,
Jerde jasaytuǵınlar shegirtkelerge megzer.
Ol kóklerdi perde kibi jayıp,
Jasaw ushın olardı shatır kibi tigedi.
23Ol basshılardı túkke turǵısız etip,
Dúnyanıń húkimdarların kúshinen ayıradı.
24Olar zorǵa egilip, zorǵa sebilip,
Zorǵa tamır jayǵan gezinde,
Jaratqan Iye demin úpleydi, olar quwrap,
Dawıl olardı qawıq kibi ushırıp ketedi.

25«Meni kimge uqsatasız,
Kim Maǵan teń keledi?» – deydi muxaddes Quday.
26Basıńızdı joqarı kóterip, aspanǵa qarań,
Bulardı kim jaratqan?
Quday juldızlardı birme-bir shaqırıp,
Atpa-at ataydı.
Onıń qúdiretli kúshi hám ullı qúdiretine góre,
Olardıń hesh biri ornınan shıqpay qalmaydı.

27Háy, Yaqıp, háy, Izrail, qalayınsha sen:
«Jolım Jaratqan Iyeden jasırın,
Qudayım huqıqımdı qorǵamaydı», – deyseń?
28Bilmeysizler me? Esitpedińiz be?
Jaratqan Iye – máńgilik Quday,
Pútkil dúnyanıń Jaratıwshısı.
Ol sharshamaydı da, talıqpaydı da,
Onıń danalıǵına aqıl jetpes.
29Ol haldan tayǵandı hállendirip,
Mádetsizlerdiń kúshine kúsh qosadı.
30Hátte, jaslar da sharshap, talıǵadı,
Jas jigitler de súrnigip, jıǵıladı.
31Biraq Jaratqan Iyege úmit baylaǵanlar,
Jańadan kúsh aladı.
Olar búrkit kibi qanat jayadı.
Juwırsa da, sharshamaydı,
Jortsa da, hesh talıqpaydı.