‏ Isaiah 41

Quday Izrailǵa kúsh beredi

1Jaratqan Iye bılay deydi:
«Háy, atawlar, Meniń aldımda úndemey tıńlań!
Xalıqlar kúsh toplap alsın,
Olar jaqın kelip, sóylesin.
Kelińler, húkim ushın bir jerge jıynalayıq.

2Shıǵıstan azat etiwshini háreketke keltirgen kim?
Onı Ózine xızmetke shaqırǵan kim?
Milletlerdi onıń qolına bergen,
Patshalardı ayaq astı qılǵan kim?
Ol qılıshı menen olardı shańǵa,
Oq jayı menen suwırılǵan qawıqqa aylandırdı.
3Ol olardı quwdalaydı,
Ayaq basılmaǵan joldan aman-esen júrip ótedi.
4Bulardı orınlap, júzege asıratuǵın kim?
Áwel bastan áwladlardı shaqırǵan kim?
Men, Jaratqan Iye – basıman,
Aqırında da Men bolaman.

5Atawlar bunı kórip, qorqadı,
Jerdiń tórt tárepi qaltıraydı.
Olar jaqınlap keledi.
6Hámme bir-birine járdem berip:
„Márt bol“, – deydi.
7Ónerment zergerge,
Urıp tegislewshi tós urıwshıǵa kepseri tuwralı:
„Jaqsı qurastırıldı“, – dep jiger beredi.
Keyin ornınan qozǵalmawı ushın buttı shegeleydi.

8Biraq sen, háy, qulım Izrail,
Men tańlaǵan Yaqıp,
Dostım Ibrayımnıń urpaǵı!
9Seni dúnyanıń tórt tárepinen jıynadım,
Uzaq jerlerden shaqırıp:
„Sen Meniń qulımsań,
Seni tańladım, tárk etpedim“, – dedim.
10Qorqpa, Men seniń menen birgemen.
Qáweterlenbe, Men seniń Qudayıńman.
Saǵan kúsh berip, járdemlesemen.
Azat etiwshi oń qolım menen súyeymen.

11Saǵan ǵázeplengenlerdiń hámmesi,
Masqara bolıp, uyatqa qaladı,
Saǵan qarsı shıqqanlar dımı qalmay joq boladı.
12Dushpanlarıńdı izleseń de tappaysań,
Seniń menen urısqanlar da hesh bolmaǵanday joq bolıp ketedi.
13Men, Qudayıń Jaratqan Iye,
Oń qolıńnan uslap, súyep:
„Qorqpa, saǵan járdem beremen“, – deymen.

14Háy, qurt sıyaqlı bolǵan Yaqıp,
Háy, az sanlı Izrail, qorqpa!
Men saǵan járdem beremen,
– deydi Jaratqan Iye, –
Seniń Ámeńgeriń, Izraildıń Muxaddesi.
15Mine, Men seni taza, ótkir tisli,
Túyek aydaytuǵın taxta qılaman.
Sen tawlardı bastırıp, talqanlap,
Tóbeshiklerdi qawıqqa aylandırasań.
16Sen olardı suwırasań,
Samal ushırıp, alıp ketedi,
Dúbeley aylandırıp, ushırıp ketedi.
Sen Jaratqan Iyede shadlanasań,
Izraildıń Muxaddesi menen maqtanasań.

17Jarlı hám kámbaǵal suw izleydi,
Biraq suw joq.
Shólden tańlayları kewip qaladı.
Men Jaratqan Iye olarǵa juwap beremen,
Men, Izraildıń Qudayı olardı taslap qoymayman.
18Men taqır tóbeshiklerden dáryalar,
Oypatlıqlardıń ortasınan bulaqlar aǵızaman.
Shóldi kólge, qurǵaq dalanı suwlı bulaqlarǵa aylandıraman.
19Shólge kedr, akaciya, mirta putaların hám záytún aǵashların,
Quw dalaǵa sárwi, shınar hám qaraǵay aǵashların birge otırǵızaman.
20Sonda adamlar bunı Jaratqan Iyeniń islegenin,
Izraildıń Muxaddesiniń jaratqanın,
Kóredi, biledi, aqıl juwırtıp, túsinedi».

Jaratqan Iye butlarǵa qarsı

21«Dawańızdı aytıń,
– deydi Jaratqan Iye, –
Dálillerińizdi keltiriń,
– deydi Yaqıptıń Patshası. –
22Butlarıńızdı alıp keliń,
Olar ne bolatuǵının aytıp bersin.
Oylanıp, aqıbetin túsiniwimiz ushın,
Ótmishte bolǵanlardıń mánisin ayan etsin,
Yamasa keleshekte bolatuǵınlardı bizge bildirsin.
23Sizlerdiń quday ekenińizdi biliwimiz ushın,
Bunnan keyin ne bolatuǵının bildiriń.
Kórip, hayran qalıwımız ushın,
Jaqsı yaki jaman bir nárse qılıń.
24Sizler de, islerińiz de hesh nárse emes.
Sizlerdi tańlaǵanlar jerkenishli.

25Men arqadan birewdi háreketke keltirdim, ol kiyatır.
Meniń atımdı shaqırǵan shıǵıstan kiyatır.
Ol gúlalshınıń ılaydı basqılaǵanı sıyaqlı,
Húkimdarlardı ılayday qılıp basqılaydı.
26Biliwimiz ushın, kim bunı áwel bastan járiya etti?
„Haqsız“dep aytıwımız ushın, kim aldın ala xabar berdi?
Hesh kim xabar bermedi, hesh kim járiya etpedi,
Hesh kim sózlerińdi esitpedi.
27Men birinshi bolıp Sionǵa:
„Olar kiyatır“, – dep bildirdim,
Erusalimge xabarshı jiberdim.
28Kóz salıp qarasam, arasında keńes beretuǵın da,
Men soraǵanda, juwap beretuǵın da birde birewi joq.
29Mine, olardıń hámmesi jalǵan!
Isleri hesh nársege turǵısız,
Músinleri samal hám boslıqtan ibarat».