‏ Isaiah 42

Jaratqan Iyeniń qulı

1«Mine, Men qollaǵan qulım,
Kewlime unaǵan tańlaǵanım!
Men Óz Ruwxımdı Oǵan beremen,
Ol milletlerge ádalat alıp keledi.
2Ol baqırmaydı, dawısın kótermeydi,
Kóshelerde Onıń sesti esitilmeydi.
3Ol mayısqan qamıstı sındırmaydı,
Pısqıp turǵan pilikti de óshirmeydi,
Sadıqlıq penen ádalattı iske asıradı.
4Jer betinde ádalattı ornatpaǵansha,
Hálsiremeydi, ruwxı da túspeydi.
Atawlar Onıń tálimine úmit baylaydı».

5Kóklerdi jaratıp, onı jayǵan,
Jerdi hám ondaǵılardı jayıp jibergen,
Ondaǵı insanlarǵa dem bergen,
Onda júrgenlerge jan bergen,
Quday Iye bılay deydi:
6«Men, Jaratqan Iye seni qutqarıwımdı kórsetiw ushın shaqırdım,
Seniń qolıńnan uslap, qorǵayman,
Xalqım menen dúzgen kelisimimdi,
Sen arqalı ámelge asıraman.
Seni milletlerge nur qılaman.
7Sen soqır kózlerdi ashıp,
Tutqınlardı qamaqxanadan shıǵarıp,
Qarańǵılıqtaǵını zindannan azat eteseń.

8Men – Jaratqan Iyemen. Meniń atım usı.
Dańqımdı basqaǵa, Ózime aytılatuǵın alǵıstı butlarǵa bermeymen.
9Mine, burın boljap aytılǵanlar ámelge astı.
Men taza nárselerdi járiyalayman,
Olar júzege aspay turıp,
Aldın ala sizlerge ayan etemen».

Alǵıs-maqtaw jırı

10Teńizde júzip júrgenler hám onı toltırıp turǵanlar,
Atawlar hám olarda jasawshılar,
Jaratqan Iyege arnap taza qosıq aytıń,
Jerdiń eń shetlerinen Oǵan alǵıs-maqtawlar aytıń!
11Shól hám ondaǵı qalalar,
Kedar xalqı jasaytuǵın awıllar dawısın kótersin!
Sela turǵınları quwanıshtan qosıq aytıp,
Tawlardıń tóbelerinen baqırsın!
12Olar Jaratqan Iyeni ullılasın,
Atawlarda Oǵan alǵıs-maqtawlar aytsın!
13Jaratqan Iye bahadır jigittey bolıp,
Jawıngerdey ǵázebin shashadı,
Áskeriy uran salıp, baqırıp,
Dushpanlardan ústinligin kórsetedi.

Jaratqan Iyeniń járdem sózi

14«Men uzaq waqıt úndemedim,
Sabırlılıq penen Ózimdi usladım.
Endi bolsa, tuwayın dep atırǵan hayalday qıshqıraman,
Entigip dem alaman.
15Men tawlardı hám tóbeshiklerdi wayran etemen,
Pútkil ot-shóplerdi qırıp taslayman.
Dáryalardı atawlarǵa aylandırıp,
Háwizlerdi qurıtaman.
16Soqırlardı bilmegen jollarınan alıp júremen,
Olardı tanıs bolmaǵan soqpaqlardan jeteleymen,
Aldında qarańǵılıqtı jaqtılıqqa,
Oylı-biyik jerlerdi tegis jerge aylandıraman.
Men bulardı isleymen,
Olardı tárk etpeymen.
17Oyma butlarǵa isengenler,
Quyma butlarǵa: „Sizler qudayımızsız“, – deytuǵınlar,
Shermende bolıp, olardan júz buradı».

Soqır hám gereń Izrail

18«Háy, gereńler, esitińler,
Háy, soqırlar, qarap kórińler!
19Meniń qulımday soqır bolǵan bar ma?
Men jiberetuǵın xabarshıday, gereń bolǵan bar ma?
Maǵan baǵıshlanǵan birewdey, soqır,
Yamasa Meniń, Jaratqan Iyeniń qulınday, soqır bolǵan bar ma?
20Sen kóp nárseni kórdiń, biraq itibar bermediń,
Qulaqlarıń ashıq edi, biraq esitpediń».

21Óz ádalatı haqı,
Nızamların dańqqa bólep, ullı qılıw,
Jaratqan Iyege unadı.
22Biraq bul xalıq talan-taraj qılınǵan,
Hámmesi zindanǵa taslanıp, qamaqxanaǵa qamalǵan.
Olar oljaǵa aylandı, qutqaratuǵın hesh kim joq.
Talandı, «Qaytarıp ber», deytuǵın hesh kim joq.

23Arańızda buǵan qulaq túretuǵın,
Dıqqat qoyıp, keleshek ushın tıńlaytuǵın bar ma?
24Yaqıptı talanshılarǵa,
Izraildı qaraqshılarǵa bergen kim?
Bul Jaratqan Iye emes pe?
Oǵan qarsı gúna islemedik pe?
Olar Onıń jolınan júrmedi,
Nızamına qulaq aspadı.
25Sonlıqtan Ol lawlaǵan ǵázebin,
Ǵıjlaǵan urıstı ústine dóndirdi.
Dógeregin ot penen qaplasa da, túsinbedi,
Kúydirse de, júrekke almadı.