‏ Isaiah 43

Izraildıń qutqarıwshısı

1Biraq endi, Yaqıp, seni jaratqan,
Izrail, seni dóretken,
Jaratqan Iye bılay deydi:
«Qorqpa, Men seni azat ettim,
Seniń atıńdı aytıp shaqırdım, sen Menikiseń.
2Suwlardan ótkenińde, seniń menen birge bolaman,
Dáryalardan ótkenińde, olar seni ıǵızıp ketpeydi.
Ot ishinen júrgenińde janbaysań,
Jalın seni jalmamaydı.
3Men seniń Qudayıń Jaratqan Iye,
Izraildıń Muxaddesi, seniń Qutqarıwshıńman.
Seniń tólemiń sıpatında Mısırdı,
Seniń ornıńa Xabashstan menen Sebanı berdim.
4Názerimde qımbatbaha hám qádirli bolıp,
Seni súygenim ushın,
Seniń ornıńa adamlardı,
Seniń ómiriń ushın xalıqlardı beremen.
5Qorqpa, Men seniń menen birgemen,
Urpaqlarıńdı shıǵıstan alıp kelemen,
Ózińdi batıstan jıynap alaman.
6Arqaǵa: „Olardı ber“,
Qublaǵa: „Olardı uslama“, – deymen.
„Ullarımdı uzaqtan,
Qızlarımdı jerdiń túpkirlerinen,
7Maǵan tiyisli bolǵan hár bir adamdı,
Óz dańqım ushın jaratqanlarımdı,
Pishim berip, dóretkenlerimdi qaytar“, – deymen».

Jaratqan Iyeniń gúwası – Izrail

8Kózi bolsa da, kórmeytuǵın soqırlardı,
Qulaǵı bolsa da, esitpeytuǵın gereńlerdi alıp shıǵıń.
9Pútkil milletler bir jerge jıynalsın,
Xalıqlar toplansın.
Olardıń arasında qaysısı bulardı járiyalap,
Ótken waqıyalardı aldın ala bizlerge bildire aldı?
Gúwalardı alıp kelip, ózlerin aqlasın,
Basqalar esitip: «Bul durıs», – desin.

10«Sizler Meniń gúwalarımsız,
– deydi Jaratqan Iye. –
Meni bilip, Maǵan iseniwińiz,
Meniń kim ekenimdi túsiniwińiz ushın,
Saylap alǵan qullarımsız.
Mennen aldın, hesh qanday quday bolǵan emes,
Mennen keyin de bolmaydı.

11Men, tek jalǵız Men – Jaratqan Iyemen.
Mennen basqa Qutqarıwshı joq.
12Men aldın ala bildirdim, qutqardım hám járiyaladım.
Arańızda basqa quday joq.
Sizler Meniń gúwalarımsız,
– deydi Jaratqan Iye, –
Men Qudayman.
13Áwel bastan beri, Men Solman.
Men uslaǵandı hesh kim jazdıra almaydı.
Men qılǵandı kim biykarlay aladı?»

Babilonnan qutılıw

14Ámeńgerińiz, Izraildıń Muxaddesi,
Jaratqan Iye bılay deydi:
«Sizler haqı Babilonǵa birewdi atlanısqa jollayman.
Kaldeylerdi dawrıǵı kókke jetken kemelerine mingizip,
Qashıwǵa májbúr etemen.
15Sizlerdiń Muxaddesińiz, Izraildıń Jaratıwshısı,
Sizlerdiń Patshańız Jaratqan Iye Men bolaman».

16Teńizden jol,
Burqasınlaǵan suwdan soqpaq ashqan Jaratqan Iye,
17Sawash arbaların, atlardı,
Kúshli áskerlerdi ordası menen alıp shıqqan ▼

▼ Shıǵ 14:1-31.

Ol bılay deydi:
«Olar jıǵılıp, tura almaydı,
Óshirildi, shıraday sóndi.
18Ótkenlerdi umıtıń,
Burınǵılardı eske almań.
19Mine, Men jańa nárse qılaman!
Ol baslandı, nege túsinbeysiz?
Men shólde jol, sahrada dáryalar salaman.
20Jabayı haywanlar, saǵal hám úkiler,
Meni húrmet qıladı.
Sebebi tańlap alǵan xalqım ishiwi ushın,
Shólde suw, sahrada dáryalar aǵızdım.
21Maǵan alǵıs-maqtaw aytıwı ushın,
Ózim ushın jarattım bul xalıqtı.

22Biraq sen, Yaqıp, Meni shaqırmadıń,
Izrail, sen Mennen sharshadıń!
23Jandırılatuǵın qurbanlıq ushın qoylarıńdı alıp kelmediń,
Qurbanlıqlarıń menen Meni sıylamadıń.
Men sadaqalar talap etip, seni qıynamadım,
Xosh iyisli tútetkiler talap etip, awırmanlıq salmadım.
24Sen Maǵan arnap, xosh iyisli qamıs satıp almadıń,
Meni qurbanlıqtıń mayına toydırmadıń.
Kerisinshe, gúnalarıń menen Maǵan júk boldıń,
Qılmıslarıń menen Meni sharshattıń.
25Ózim ushın qılmıslarıńdı óshiretuǵın Menmen,
Endi qaytıp gúnalarıńdı eslemeymen.

26Meniń yadıma sal, dawlasayıq,
Aqlanıw ushın, dálillerińdi keltir.
27Túp atań gúna islegen edi,
Dáldalshılarıń Maǵan qarsı bas kóterdi.
28Sonlıqtan Ibadatxana basshılarınıń abırayın tóktim,
Yaqıptı pútkilley joq qılıwǵa,
Izraildı ǵarǵısqa húkim ettim».