Isaiah 44
Jaratqan Iye – jalǵız Quday
1«Biraq, endi, qulım Yaqıp,Tańlaǵanım Izrail, qulaq sal!
2Seni jaratqan, qursaqta seni qáliplestirgen,
Saǵan járdem beretuǵın Jaratqan Iye bılay deydi:
Qorqpa, qulım Yaqıp,
Saylap alǵanım Eshurun ▼
▼ Eshurun – Izrail xalqına berilgen basqa atama bolıp, «Ádil» degen mánisti bildiredi.
!3Kewip qalǵan jerge suw jiberip,
Qurǵaq jerlerge saylar aǵızaman.
Urpaqlarıńnıń ústine Ruwxımdı,
Perzentlerińniń ústine jarılqawımdı jawdıraman.
4Olar jasıl jaylawdaǵı otlar,
Aǵın suw jaǵasındaǵı tallar sıyaqlı ósip-ónedi.
5Birewi: „Men Jaratqan Iyege tiyislimen“, – deydi,
Ekinshisi ózin Yaqıptıń atı menen ataydı,
Basqası: „Jaratqan Iyege tiyislimen“, – dep qolına jazıp,
Ózin Izrail dep ataydı».
6Izraildıń Patshası hám Ámeńgeri Jaratqan Iye,
Álemniń Jaratqan Iyesi bılay deydi:
«Men birinshi hám sońǵıman,
Mennen basqa quday joq.
7Maǵan uqsaǵanı bar ma? Ol xabar bersin.
Áyyemgi xalqımdı jaratqan kúnnen baslap bolıp ótkenlerdi,
Keleshekte ne bolatuǵının bildirip, bayanlasın.
Endi bolatuǵın nárselerden xabar bersin.
8Qaltıramań, qorqpań!
Sizlerge áwel bastan aytıp, bildirmedim be?
Sizler Meniń gúwalarımsız.
Mennen basqa quday bar ma?
Basqa Jartas joq, basqa birde birewin de bilmeymen».
Butqa tabınıwshılarǵa eskertiw
9But soqqanlardıń hámmesi – hesh kim emes,Olar qádirlegen nárseler – paydasız.
Olardıń ózleri buǵan gúwa,
Sebebi butları kórmeydi de, túsinbeydi de.
Sonlıqtan olar shermende boladı.
10Payda bermeytuǵın qudaydı kim soǵadı?
Buttı kim quyadı?
11Qara, soǵan sherik bolǵanlardıń hámmesi uyatqa qaladı.
Ónermentler – barı-joǵı tek adamlar.
Olardıń hámmesi jıynalıp, hámmesi bir jerde tursın.
Olar qorqıp, uyatqa qaladı.
12Temirshi quralın alıp,
Kómir shoǵında taplaydı,
Shókkish penen islew berip,
Bileginiń kúshi menen pishim beredi.
Temirshi ash bolıp, hálsireydi,
Suw ishpey, haldan tayadı.
13Aǵash ustası aǵashtı jip penen ólshep,
Ushlı qural menen sızıp aladı.
Qashaw menen pishim berip,
Asha tayaq penen tamǵalap,
Adam qálpine keltiredi.
Onı butxanaǵa qoyıw ushın,
Pútkil adam gózzallıǵın beredi.
14Ol kedr aǵashın kesip aladı.
Sárwi yaki emen aǵashın tańlap alıp,
Ósiw ushın toǵaydaǵı terekler arasında qaldıradı.
Yamasa kedr aǵashın otırǵızadı,
Jawın onı ósiredi.
15Keyin aǵash otın boladı,
Adam otınnıń bir bólegin jaǵıp ısınsa,
Basqa bólegi menen nan pisiredi.
Al qalǵanınan ózine bir quday soǵıp alıp, tabınadı,
But soǵıp alıp, aldına jıǵılıp, tájim etedi.
16Otınnıń yarımın jaǵıp, awqat tayarlaydı,
Kábap pisirip, toyǵansha jeydi.
Ol jılınıp, bılay deydi:
«Men jılındım, ottıń háwirin sezdim».
17Awısqan otınnan ol quday, yaǵnıy ózine but islep alıp,
Onıń aldında tájim etedi, oǵan sıyınadı.
Oǵan duwa etip, bılay deydi:
«Meni qutqar, óytkeni sen qudayımsań».
18Bunday adamlar hesh nárseni bilmeydi, túsinbeydi de.
Óytkeni kórmesin dep kózleri,
Túsinbesin dep júrekleri jabılǵan.
19Hesh kim oylanıp kórmeydi:
«Otınnıń yarımın jaqtım,
Qozına nan pisirdim,
Góshten kábap pisirip jedim,
Endi qalǵanınan jerkenishli nárse soǵayın ba?
Bir bólek aǵashqa tabınayın ba?» – dep aytıwǵa,
Aqıl-parasatı jetpeydi.
20Ol kúldiń izinen quwadı,
Aldanǵan júregi onı joldan adastıradı.
Ol óz janın qutqara almaydı,
«Oń qolımdaǵı nárse jalǵan nárse emes pe?» – dey almaydı.
21«Yaqıp, bulardı este tut,
Izrail, sen Meniń qulımsań.
Men seni jarattım, sen Meniń qulımsań.
Izrail, Men seni umıtpayman.
22Seniń qılmıslarıńdı bult kibi,
Gúnalarıńdı azanǵı duman kibi, taratıp jiberemen.
Maǵan qayt, Men sen ushın tólem tóledim».
23Háy kókler, quwanısh penen qosıq aytıń,
Sebebi bunı Jaratqan Iye júzege asırdı.
Háy jerdiń tereńlikleri, baqırıń!
Taw hám toǵaylar,
Toǵaydaǵı hámme terekler qosıq aytıń,
Sebebi Yaqıptı Jaratqan Iye azat etti,
Izrailda Ózin dańqqa bóledi.
24Seni qursaqta qáliplestirgen Ámeńgeriń,
Jaratqan Iye bılay deydi:
«Hámme nárseni jaratqan,
Kóklerdi jalǵız Ózi jayǵan,
Jalǵız Ózi jerdi dóretken,
25Jalǵan payǵambarlardıń belgilerin pushqa shıǵarǵan,
Palkerlerdi aqmaq qılǵan,
Danalarǵa soqqı berip,
Bilimlerin nadanlıqqa aylandırǵan,
26Qulınıń sózin tastıyıqlaǵan,
Xabarshılarınıń aytqanların ámelge asırǵan,
Erusalimge: „Ishinde jáne adam jasaydı“, – dep aytqan,
Yahuda qalalarına: „Olar qaytadan qurıladı,
Qarabaqanaların tikleymen“, – degen,
27Shuqır suwlarǵa: „Qurıp ket, dáryalarıńdı qurıtaman“, – degen,
28Kirge ▼: „Meniń shopanım, barlıq maqsetlerimdi ol ámelge asıradı“, – degen,
Erusalimge: „Jańadan qurıladı“,
Ibadatxanaǵa: „Qayta tiklenedi“, – degen,
Jaratqan Iye Men bolaman».
Copyright information for
KaaIBT22L