‏ Isaiah 45

Jaratqan Iyeniń Kirdi tańlawı

1Jaratqan Iye maylaǵanına,
Oń qolınan uslaǵanına, yaǵnıy Kirge bılay deydi:
«Aldıńda milletlerdi bas iydiremen,
Patshalardı qurallarınan mahrum etemen.
Aldıńda dárwazalar ashılıp,
Olar jabılmaydı.
2Men aldıńda júrip, tawlardı tegisleymen,
Qola dárwazalardı buzıp, temir támbilerdi sındıraman.
3Saǵan qarańǵılıqta jasırınǵan ǵáziynelerdi,
Jasırın jerlerde saqlanǵan baylıqlardı beremen.
Usı arqalı atıńdı aytıp shaqırǵan Men – Jaratqan Iye,
Izraildıń Qudayı ekenimdi bileseń.
4Sen Meni tanımasań da,
Qulım Yaqıp, tańlaǵanım Izrail haqı,
Seni atıńdı aytıp shaqırdım,
Saǵan húrmetli at qoydım.
5Men – Jaratqan Iyemen, basqası joq.
Mennen basqa quday joq.
Meni tanımasań da, saǵan kúsh beremen.
6Shıǵıstan batısqa deyingi adamlar,
Mennen basqasınıń joq ekenin bilip qoysın.
Men – Jaratqan Iyemen, basqası joq.
7Nurdı dóretken, qarańǵılıqtı jaratqan Men bolaman,
Abadanlıqtı beretuǵın, apatshılıqtı jiberetuǵın da Menmen.
Bulardıń hámmesin isleytuǵın Men, Jaratqan Iyemen.
8Kókler, sen joqarıdan qutqarılıwdı tók,
Bultlar onı tómenge jawdırsın.
Jer ashılıp, qutqarılıw ósip shıqsın,
Onıń menen birge ádillik te óssin.
Bunı Men, Jaratqan Iye jarattım».

Qúdireti kúshli Quday

9Jaratıwshısı menen dawlasatuǵınlar, hásiret shegesizler!
Topıraqtan jasalǵan gúzeniń sınıǵı!
Ílay gúlalshıǵa: «Ne islep atırsań?»
Yamasa: «Islep atırǵan nárseńniń uslaǵıshı joq», – dep ayta ma?
10Ákesine: «Meni nege dúnyaǵa keltirdiń?»
Anasına: «Meni nege tuwdıń?» – deytuǵınlar,
Hásiret shegesizler!
11Izraildıń Muxaddesi hám Onıń Jaratıwshısı,
Jaratqan Iye bılay deydi:
«Balalarımnıń keleshegi haqqında sorawǵa tutpaqshımısız?
Qolımnıń isleri tuwralı buyrıq bermekshimisiz?
12Men jerdi dóretip,
Onıń ústine adamdı jarattım,
Óz qollarım menen kóklerdi jaydım,
Aspan denelerine buyrıq berdim.
13Kirdi ádil niyetimdi ámelge asırıw ushın háreketke keltirdim,
Onıń pútkil jolların tegisleymen.
Ol Meniń qalamdı qayta quradı,
Tutqın bolǵan xalqımdı tólemsiz hám parasız azat etedi», –
deydi Álemniń Jaratqan Iyesi.

14Jaratqan Iye Izrailǵa bılay deydi:
«Mısırdıń baylıǵı, Xabashstannıń paydası seniki boladı,
Uzın boylı Seba urpaqları saǵan keledi.
Olar saǵan eredi,
Kisenbánt bolıp saǵan kelip,
Tájim etip, jalbarınıp:
„Quday tek seniń menen birge, basqa biri joq,
Onnan basqa quday joq“, – deydi».

15Izraildıń Qudayı – Qutqarıwshı,
Haqıyqattan da, Ózin jasırǵan Quday – Senseń!
16But soǵatuǵınlardıń hámmesi uyatqa qalıp, masqara boladı,
Hámmesi birge shermende boladı.
17Biraq Izrail Jaratqan Iye tárepinen máńgige qutqarıladı.
Sizler máńgige uyatqa qalmaysız,
Masqara bolmaysız.

18Kóklerdi jaratqan – Ol Quday.
Dúnyanı bina etken,
Oǵan túr-tús berip, onı bekkemlegen,
Onı bos turıw ushın emes,
Al adam jasawı ushın jaratqan,
Jaratqan Iye bılay deydi:
«Men – Jaratqan Iyemen, Mennen basqası joq.
19Men jasırın da, qarańǵılıqta da sóylemedim.
Men Yaqıptıń urpaqlarına:
„Meni hesh nárse joq jerden izleń“, – demedim.
Men – Jaratqan Iyemen, haqıyqattı aytaman,
Men shınlıqtı bayan etemen».

Quday hám Babilonnıń butları

20«Milletlerden qashıp qutılǵanlar,
Kelip, bir jerge jıynalıp, qasıma jaqınlańlar!
Aǵash butlardı kóterip,
Qutqarmaytuǵın qudayǵa sıyınǵanlar,
Hesh nárseni bilmeydi.
21Aytıń, dawańızdı bayan etiń,
Olar birge másláhátlessin!
Bunı ázelden aytqan kim?
Ótmishte ayan etken kim?
Jaratqan Iye bolǵan Men emespen be?
Mennen basqa quday joq,
Men ádil Qudayman hám Qutqarıwshıman,
Mennen basqası joq.

22Pútkil dúnya,
Maǵan júz burıń, qutqarılasız!
Men Qudayman, basqası joq.
23Men Ózim haqı ant ishtim,
Awzımnan shıqqan sóz tuwrı,
Ol bosqa shıqpas:
„Hár bir adam Meniń aldımda dize búgedi,
Hár bir til Maǵan ant ishedi“.

24Olar Men tuwralı: „Ádalat hám kúsh,
Jalǵız Jaratqan Iyede“, – deydi.

Oǵan ǵázeplengenlerdiń hámmesi,
Aldına kelip, uyalıp qaladı.
25Biraq Izraildıń pútkil násili,
Jaratqan Iyede aqlanıp, Onıń menen maqtanadı».