Isa 46 | KaaIBT22L | STEP | Bel degen quday dize búkti, Nebo degen quday búgildi, Olardıń butları janıwarlarǵa hám ógizlerge júklendi. Burın saltanatlı túrde kóterip júrgen nárselerińiz, Endi sharshaǵan haywanlarǵa júk boldı.

‏ Isaiah 46

1 Bel degen quday dize búkti,
Nebo degen quday búgildi,
Olardıń butları janıwarlarǵa hám ógizlerge júklendi.
Burın saltanatlı túrde kóterip júrgen nárselerińiz,
Endi sharshaǵan haywanlarǵa júk boldı.
2 Olardıń qudayları búgilip, dize búkti,
Olar júklerdi qutqara almas,
Ózleri súrgin etilip atır.

3 «Yaqıp urpaqları,
Izraildıń aman qalǵanları, Meni tıńlańlar!
Qursaqta waqtıńızda qabıl etip alıp,
Tuwılǵanıńızdan beri, kóterip júrdim.
4 Qartayǵanıńızda da, Men solay isleymen,
Shashıńız aǵarǵanda da, sizlerdi kóteremen.
Men sizlerdi jarattım, Ózim qollayman,
Sizlerdi kóterip júremen, qutqaraman.

5 Meni kimge uqsatıp, kimge teńlestirejaqsız?
Kimge salıstırıp, uqsatajaqsız?
6 Adamlar altındı shıjlanınan shıǵarıp tólep,
Gúmisti tárezide ólshep,
Bir zergerdi jallap aladı.
Zerger olardan bir quday soǵıp beredi,
Adamlar jerge jıǵılıp, oǵan tabınadı.
7 Qudayın iyninde kóterip alıp júredi,
Ornına qoyadı, ol sol jerde tura beredi.
Ornınan qozǵala almaydı.
Oǵan jalbarınsa, juwap bermeydi,
Hesh bir apattan da qutqarmaydı.

8 Háy, gúnakarlar, bunı umıtpań,
Márt bolıń, yadtan shıǵarmań.
9 Áyyemgi bolıp ótken islerdi esleń.
Men Qudayman, basqası joq,
Men Qudayman, Maǵan uqsaǵanı joq.
10 Men aqırǵı bolatuǵınlardı áwel bastan,
Keleshekte bolatuǵınlardı áyyemnen bildirip kelemen.
Men: „Maqsetlerimdi iske asırıp,
Ózime unaǵan nárselerdiń hámmesin isleymen“, – deymen.
11 Shıǵıstan jırtqısh qustı,
Maqsetimdi orınlaytuǵın bir adamdı,
Uzaq jurttan shaqıraman.
Men aytqanımdı orınlayman,
Jobalastırǵanımdı ámelge asıraman.

12 Júregi qaysarlar,
Jeńisti uzaq dep oylaǵanlar, meni tıńlańlar!
13 Jeńisim jaqın, ol uzaq emes,
Qutqarıwım keshikpeydi.
Men Sionǵa qutqarılıw,
Izrailǵa dańqımdı sıylayman».