Isaiah 47
Babilonnıń qulawı
1«Háy, pák qız Babilon,Tómenge túsip, topıraqqa otır!
Háy, kaldeylerdiń qızı,
Jerge otır, endi taxtıń joq.
Endi seni: „Názik hám múláyim“, – dep atamaydı.
2Digirmandı alıp, un tart,
Párenjeńdi alıp tasla, etegińdi túrip,
Baltırıńdı kórsetip, dáryalardı keship ót.
3Deneń ashılıp, uyatlı jeriń kórinsin.
Men ósh alaman, hesh kimdi ayamayman».
4Ámeńgerimiz – Izraildıń Muxaddesi,
Onıń atı – Álemniń Jaratqan Iyesi.
5«Háy, kaldeylerdiń qızı,
Qarańǵıǵa barıp, úndemey otır!
Seni artıq: „Patshalıqlardıń xanımı“, – dep atamaydı.
6Xalqıma qáhárlendim,
Miyrasımdı xorlap,
Seniń qolıńa berdim,
Sen de olarǵa rehim etpediń.
Hátte, ǵarrılarǵa da,
Júdá awır moyıntırıq taqtıń.
7Sen: „Men máńgige xanım bolaman“, – dediń.
Bularǵa dıqqat bermediń,
Aqıbetiniń ne bolatuǵının oylamadıń.
8Háy, ráhátti súyetuǵın,
Qáwipsizlikte jasap, ishinen:
„Mine men, maǵan teń keletuǵını joq,
Men hesh qashan jesir bolıp otırmayman,
Perzent daǵın da kórmeymen“, – deytuǵın sen,
Endi mınanı tıńla!
9Bulardıń ekewi de bir kúnde,
Tosattan basıńa túsedi:
Perzentlerińnen ayırılasań, jesir qalasań.
Sıyqırshılıqtıń kópligine,
Duwaxanlıqtıń ullı kúshine qaramastan,
Olar bári bir basıńa túsedi.
10Sen óz jawızlıǵıńa isendiń,
„Meni hesh kim kórmeydi“, – dep oyladıń.
Danalıǵıń hám bilimiń seni joldan adastırdı.
Ishińnen: „Mine men, maǵan teń keletuǵını joq“, – dediń.
11Sonlıqtan apatshılıqqa ushıraysań,
Sıyqırshılıq penen onnan qutıla almaysań.
Basıńa baxıtsızlıq túsedi,
Tólem menen onı qaytara almaysań.
Oylamaǵan wayranshılıq,
Tosattan ústińe keledi.
12Jaslıǵıńnan beri shuǵıllanıp kelgen,
Duwaxanlıǵıń hám sansız sıyqırshılıǵıńdı dawam et.
Bálkim, olardan saǵan payda tiyer,
Yaki olar menen birewdi qorqıtarsań.
13Másláhátlerdiń kópligi seni sharshattı.
Juldızlardı izertlewshiler,
Jańa aydıń basında ne bolatuǵının aytatuǵınlar,
Basıńa túsetuǵın nárselerden seni qutqarsın.
14Áne, olar sabanǵa uqsaydı,
Ot olardı jandıradı.
Jalmaǵan órtten ózlerin de qutqara almaydı.
Bul jılınatuǵın qoz da,
Janında otıratuǵın jalın da emes.
15Usılayınsha seniń menen miynet etip,
Jaslıǵıńnan aldı-sattı islegenlerdiń hár biri,
Bası awǵan tárepke rawana boladı,
Seni hesh kim de qutqarmaydı».
Copyright information for
KaaIBT22L