‏ Isaiah 48

Izraildıń qasarısıwı

1Tıńla, háy, Yaqıptıń urpaqları!
Izraildıń atı menen atalatuǵınlar,
Yahudanıń belinen óngenler!
Sizler Jaratqan Iyeniń atı menen ant ishesiz,
Izraildıń Qudayın shaqırasız.
Biraq bunı shın júrekten hám ádillik penen islemeysiz.
2Sonda da, ózlerińizdi muxaddes qaladanbız dep,
Izraildıń Qudayına súyendińiz.
Onıń atı – Álemniń Jaratqan Iyesi.

3«Bolıp ótkenlerdi Men aldın ala ayttım,
Meniń awzımnan shıqtı, Men olardı bildirdim.
Keyin tosattan olardı isledim,
Olar orınlandı.
4Sebebi seniń qaysarlıǵıńdı bilemen,
Jelke tamırıń temirdey,
Mańlayıń qoladay qattı.
5Bulardı saǵan aldın ala bayan ettim,
„Bulardı meniń butlarım isledi,
Aǵash músinlerim hám quyma qudaylarım,
Bulardı buyırdı“, – dep aytpawıń ushın,
Orınlanbastan aldın, olardı saǵan bildirdim.

6Bulardı esittiń, endi hámmesin kór.
Bulardı moyınlamaqshı emespiseń?
Búginnen baslap, saǵan jańa zatlardı,
Sen bilmegen jasırın zatlardı aytaman.
7Bular tap házir jaratıldı, ótmishte emes,
Búginge deyin, sen bular tuwralı esitpediń,
Bolmasa: „Bulardı biletuǵın edim“, – deyseń.
8Sen esitpediń de, bilmeyseń de,
Ázelden qulaǵıń ashıq emes edi.
Men seniń satqın ekenińdi bilemen,
Tuwılǵanıńnan beri, qozǵalańshı dep atalasań.
9Óz atım haqı ǵázebimdi tutıp,
Óz dańqım haqı onı tıydım.
Bolmasa, seni joq qılar edim.
10Mine, gúmistey etip bolmasa da, seni tazaladım,
Azap oshaǵında sınadım.
11Bunı Ózim haqı, Ózim ushın isleymen.
Nege atıma daq túsiwi kerek?
Dańqımdı basqaǵa bermeymen.

12Háy, Yaqıp, shaqırǵanım Izrail, Meni tıńla!
Men – Solman, birinshi de, sońǵı da Menmen.
13Qolım jerdiń tiykarın qoydı,
Oń qolım kóklerdi jaydı.
Men olardı shaqırsam,
Hámmesi birge aldımda turadı.

14Hámmeńiz jıynalıp, tıńlań!
Butlardıń qaysısı bulardı aldın ala bildirdi?
Jaratqan Iyeniń súyiklisi ▼

▼ Jaratqan Iyeniń súyiklisi – bul Kirdi ańlatadı.

,
Onıń Babiloniyaǵa qarsı maqsetin ámelge asıradı,
Onıń qolı kaldeylerge qarsı boladı.
15Men, awa, Men oǵan ayttım,
Onı Men shaqırdım, Men alıp keldim,
Ol óz isinde tabısqa erisedi.

16Maǵan jaqınlap, mınanı tıńlańlar!
Bastan-aq, Men jasırın sóylemedim,
Sonnan beri, Men sol jerdemen».

Endi Quday Iye meni hám Ruwxın jiberdi.
17Ámeńgeriń, Izraildıń Muxaddesi,
Jaratqan Iye bılay deydi:
«Saǵan paydalı nárselerdi úyretetuǵın,
Júriwiń kerek bolǵan joldan jeteleytuǵın,
Qudayıń Jaratqan Iye Men bolaman.
18Eger Meniń buyrıqlarıma qulaq asqanıńda edi!
Abadanshılıǵıń dáryaday,
Ádilligiń teńiz tolqınlarınday bolar edi.
19Urpaqlarıń teńiz qumınday kóp,
Násilleriń qum qıyırshıqlarınday sansız bolar edi.
Atları da óshirilmes,
Meniń aldımda joq bolmas edi».

20Babiloniyadan shıǵıp, kaldeylerden qashıń!
Bunı quwanıshlı dawıs penen járiyalań,
Jerdiń shetlerine deyin xabarlap:
«Jaratqan Iye Óz qulı Yaqıptı azat etti!» – dep jayıń.
21Olardı shólden alıp ótkende de, shóllemedi,
Olar ushın jartastan suw aǵızdı, ▼

▼ Shıǵ 17:1-7.

Ol jartastı jardı, suw atılıp shıqtı.

22«Jawızlar ushın tınıshlıq joq», – deydi Jaratqan Iye.