‏ Isaiah 49

Jaratqan Iyeniń qulınıń xızmeti

1Atawlar, meni tıńlań!
Uzaqtaǵı xalıqlar, qulaq túriń!
Jaratqan Iye meni ana qursaǵında bolǵan waqtımda-aq shaqırdı.
Anamnıń ishinde waqtımda-aq atap atımdı qoydı.
2Ol sózimdi qılıshtay ótkir qıldı,
Meni qolınıń sayasına jasırdı.
Meni ushqır oq qıldı,
Óziniń oq qabında saqladı.
3Ol maǵan: «Meniń qulımsań,
Izrail, Men sen arqalı dańqqa erisemen», – dedi.

4Biraq men: «Miynetim zaya ketti,
Bosqa, biyhuda kúshimdi sarpladım,
Bári bir, Jaratqan Iye haqımdı beredi,
Quday miynetimniń esesin qaytaradı», – dedim.

5Yaqıptıń urpaqların Oǵan qaytarıwım,
Izraildı Onıń aldına jıynawım ushın,
Qursaqta meni qáliplestirip,
Ózine xızmetshi qılǵan,
Jaratqan Iye sóyledi.
Men Jaratqan Iyeniń názerinde húrmetke eristim,
Qudayım meniń kúsh-qúdiretim boldı.
6Ol bılay dedi: «Yaqıptıń tiyrelerin qayta tiklew,
Izraildıń tiri qalǵanların qaytarıw ushın,
Qulım bolıwıń jeterli emes,
Seni milletlerge nur qılaman,
Meniń qutqarıwım jerdiń shetine deyin jetip barsın».

7Insanlar kemsitip, xalıq jek kórgenge,
Húkimdarlardıń qulına,
Izraildıń Ámeńgeri, Onıń Muxaddesi,
Jaratqan Iye bılay deydi:
«Patshalar seni kórip, ornınan turadı,
Kósemler jıǵılıp, tájim qıladı,
Seni tańlaǵan Izraildıń Muxaddesi,
Sadıq Jaratqan Iye haqı solay qıladı».

Izraildıń Jaratqan Iyege júz burıwı

8Jaratqan Iye bılay deydi:
«Miyrimim túsken waqıtta, Men saǵan juwap beremen,
Qutqarılıw kúninde járdem beremen.
Seni qorǵayman,
Xalqım menen dúzgen kelisimimdi,
Sen arqalı ámelge asıraman.
Sen eldi qayta tiklep,
Wayran bolǵan jerlerdi qayta iyeleyseń.
9Tutqınlarǵa: „Shıǵıńlar!“,
Qarańǵılıqta bolǵanǵa: „Azatsań!“, – deyseń.
Olar jol jaǵalarında otlaydı,
Tap-taqır tóbeshiklerde jaylaw tabadı.
10Olar ash ta bolmaydı, shóllemeydi de,
Quwratıwshı samal da, quyash ta olarǵa zıyan tiygizbeydi.
Miyrim kórsetiwshi olardı jetekleydi,
Suw kózlerine alıp baradı.
11Hámme tawlarımdı jolǵa aylandıraman,
Dárbent jollarımdı biyikletemen.
12Mine, olar alıstan,
Kimisi arqadan, kimisi batıstan,
Kimisi Sinim jerlerinen kiyatır».

13Kókler, quwanısh penen baqırıń!
Jer, shadlan!
Tawlar, qosıq aytıńlar!
Jaratqan Iye Óz xalqın jubatıp,
Azap shekkenlerge rehim etejaq.

14«Sion bolsa bılay deydi:
„Jaratqan Iye meni tárk etti,
Iyem meni umıttı“.
15Ana emiziwli balasın umıta ma?
Ózi tuwǵan balasına rehimi túspey me?
Hátte, ana óz balasın umıtsa da,
Men seni umıtpayman.
16Qara, atıńdı alaqanlarıma jazdım,
Qıyralǵan diywallarıń bárqulla kóz aldımda.
17Ullarıń asıǵıp keledi,
Seni qırıp, wayran etkenler shıǵıp ketedi.
18Basıńdı kóterip, aylanaǵa qara,
Hámmesi jıynalıp, saǵan kiyatır.
Tiriligim haqı ant ishemen,
– deydi Jaratqan Iye. –
Olardıń hámmesi sen ushın bezeniw buyımınday boladı,
Kelinshektey olardı taǵıp alasań.

19Awa, jeriń wayranlanıp, bosap qalıp,
Qarabaqanaǵa aylanǵan bolsa da,
Endi jer xalqıńa tarlıq etip,
Seni jalmap kelgenler sennen uzaqlasadı.
20Tutqın bolǵan waqıtta tuwılǵan balalarıń,
Ele saǵan bılay deydi:
„Bul jer bizlerge tarlıq etip atır,
Jasaw ushın kóbirek jer ber“.
21Sonda sen ishińnen bılay deyseń:
„Bulardı maǵan kim tuwıp berdi?
Men balalarımdı joytıp, násilsiz bolıp qalǵan edim,
Súrgin etilip, quwıp jiberilgen edim.
Bulardı kim ósirdi?
Men jalǵız ózim qalǵan edim,
Bular qaydan payda boldı?“»

22Quday Iye bılay deydi:
«Men milletlerge qol menen belgi beremen,
Xalıqlarǵa bayraǵımdı kóteremen.
Olar ullarıńdı qolına,
Qızlarıńdı iynine kóterip alıp keledi.
23Patshalar saǵan ákelik qılıp,
Xanbiykeler saǵan sút beriwshi ana boladı.
Olar aldıńda beti jerge tiygenshe iyilip tájim etedi,
Ayaqlarıńdaǵı shańdı artadı.
Sonda sen Meniń Jaratqan Iye ekenimdi,
Maǵan úmit baylaǵanlar uyatqa qalmaytuǵının bilip alasań».

24Kúshliden oljasın tartıp alıw múmkin be?
Yamasa zalımnıń qolınan tutqın qutıla ala ma?
25Biraq Jaratqan Iye bılay deydi:
«Awa, kúshliniń qolınan oljası tartıp alınadı,
Zalımnıń oljaları qaytarıladı.
Saǵan qarsı shıqqanǵa,
Men qarsı turaman,
Balalarıńdı qutqaraman.
26Seni ezgenlerge óz denesin jegizemen,
Sharap ishkendey, óz qanların iship más boladı.
Sonda pútkil adamzat Meniń Jaratqan Iye ekenimdi,
Seniń Qutqarıwshıń hám Ámeńgeriń ekenimdi,
Yaqıptıń Kúshli Qudayı ekenimdi bilip aladı».