‏ Isaiah 5

Júzimzar tuwralı jır

1Men súyiklimniń júzimzarı tuwralı jır aytıp bereyin:
Topıraǵı ónimdar bir tóbede,
Súyiklimniń júzimzarı bar edi.
2Ol jerdi awdarıp, tastan tazalap,
Saylandı nállerdi ekti.
Onıń ortasına gúzet minarasın ornatıp,
Júzim sıǵatuǵın shuqır qazdı.
Ol baǵınan jaqsı júzim kútti,
Biraq baǵ jabayı júzim berdi.

3Sonlıqtan súyiklim bılay deydi:
«Endi, háy Erusalim turǵınları, Yahuda xalqı!
Meniń menen júzimzarım ortasında qazılıq etiń.
4Júzimzarım ushın jáne ne qılayın?
Men oǵan islemegen ne qaldı?
Men jaqsı júzim kútken edim,
Ol nege jabayı júzim berdi?
5Al endi men sizlerge,
Júzim baǵıma ne qılatuǵınımdı aytayın:
Onıń qorǵanların alıp taslayman,
Baǵ jalmap jep qoyılsın,
Diywalların buzıp taslayman,
Ol basqılap taslansın.
6Men baǵdı wayran qılaman,
Ol putalmaydı, topıraǵı awdarılmaydı,
Onı shat tiken hám jantaq basıp ketedi.
Ústine jawın jawmasın dep, bultqa buyrıq beremen».

7Álemniń Jaratqan Iyesiniń júzimzarı – Izrail xalqı,
Yahuda xalqı – Onıń otırǵızǵan súyikli baǵı.
Ol ádalatlıq kútti,
Biraq, qannan basqa hesh nárse kórmedi.
Ol ádillik kútti,
Biraq japa shekkenlerdiń páriyadınan basqa hesh nárse esitpedi.

Zulımlıq qılıwshılardıń shegetuǵın hásireti

8Úy ústine úy, atız ústine atız qosıp atırǵanlar,
Hásiret shegesizler!
Basqalarǵa jer qaldırmay,
Jer betinde jalǵız ózińiz jasamaqshısızlar.
9Álemniń Jaratqan Iyesiniń mına sózleri qulaǵıma shalındı:
«Sózsiz, kóp úyler wayran qılınadı,
Záwlim hám kórkem jaylar iyesiz qaladı.
10On súrim jerdegi júzimzardan tek bir bat ▼

▼ Bir bat – shama menen 22 l.

sharap shıǵadı,
Bir xomer ▼

▼ Bir xomer – shama menen 220 l.

tuqım tek bir efa ▼

▼ Bir efa – shama menen 22 l.

ónim beredi».

11Erte tańda turıp, ótkir ishimlik izinen quwǵanlar,
Ímırt jabılǵansha sharap iship más bolǵanlar, hásiret shegedi!
12Olardıń zıyapatlarında lira ▼

▼ Lira – barmaq penen shertiletuǵın tarlı saz ásbabı.

hám arfa,
Dáp hám sırnay shertilip, sharap ishiledi,
Biraq olar Jaratqan Iyeniń islerine kewil bólmeydi,
Onıń qolları menen jaratılǵanlarǵa itibar bermeydi.
13Sonlıqtan xalqım nadanlıǵı sebepli súrgin qılınadı.
Abıraylı adamları ashlıqtan ólip,
Qarapayım xalıq shólden qırıladı.
14Buǵan qosa, óliler mákanınıń ishteyi ashılıp,
Awzın qattı kerip ashadı,
Erusalimniń abıraylıları hám qarapayım xalqı,
Olardıń shawqım-súrenleri hám shadlıǵı sol jerge kiredi.
15Adamzat boysındırılıp, hár bir adam dize búgedi,
Menmenniń kózi tómen qaraydı.
16Biraq Álemniń Jaratqan Iyesi ádalatlıqta mártebege erisip,
Muxaddes Quday ádillikte Óz muxaddesligin kórsetedi.
17Sonda qoylar óz jaylawlarındaǵıday jayılıp júredi,
Qozılar baylar taslap ketken qarabaqanalar arasında otlaydı.

18Qılmısın jalǵan qosıp esilgen arqan menen,
Al gúnanı arbanıń jibi menen tartıp júrgenler, hásiret shegedi!
19Hátte, olar: «Quday asıqsın, isin tezirek islesin,
Biz de kóreyik.
Izraildıń Muxaddesiniń maqseti tezirek ámelge assın,
Biz de onı bileyik», – deydi.

20Jamandı jaqsı, jaqsını jaman,
Túnekti jaqtı, jaqtını túnek,
Ashshını mazalı, mazalını ashshı degenler, hásiret shegedi!
21Ózin dana dep sanap,
Ózin aqıllı bilgenler, hásiret shegedi!
22Sharap ishiwde qaharman bolǵanlar,
Ótkir ishimlikti aralastırıp ishiwde batırlar,
23Para alıp, ayıplını aqlaǵanlar,
Haqtı huqıqınan ayırǵanlar hásiret shegedi!
24Ottıń sabandı jalmaǵanı,
Jalınnıń pishendi órtegeni sıyaqlı,
Olardıń tamırı da shirip ketedi,
Gúlleri shań-tozań kibi kókke suwırıladı.
Sebebi olar Álemniń Jaratqan Iyesiniń Nızamınan júz burıp,
Izraildıń Muxaddesiniń sózin názerge ilmedi.
25Sol sebepli Jaratqan Iyeniń ǵázebi,
Óz xalqına qarsı lawladı,
Qolın kóterip, olardı jazalaydı.
Sonda tawlar titiresedi,
Olardıń óli deneleri taslandı sıyaqlı kóshelerde jatadı.
Sonda da Onıń ǵázebi basılmaydı,
Qolı kóteriliwin dawam etedi.

26Ol alıslardaǵı milletlerge belgi beredi,
Jer shetinde jasap atırǵanlardı ısqırıp shaqıradı,
Mine, olar da tez, asıǵıp-úsigip jetip keledi.
27Birde birewi sharshamaydı, súrnikpeydi,
Múlgimeydi, uyıqlamaydı,
Belinen belbewi sheshilmeydi,
Ayaq kiyiminiń bawı úzilmeydi.
28Olardıń oqları ushqırlanǵan,
Oq jayları tartılǵan,
Atlarınıń tuyaqları shaqmaq tasqa,
Arbalarınıń dóńgelekleri quyınǵa megzeydi.
29Olardıń aqırıwı arıslanǵa uqsaydı,
Olar jırtqısh arıslan kibi aqıradı,
Írıldap, oljasın tutıp, alıp ketedi,
Hesh kim onı qutqara almaydı.
30Sol kúni olar olja ústinde,
Teńiz tuwlawı kibi ırıldasadı.
Eger birew jerge názer salsa,
Áne, qara túnek penen azaptı kóredi,
Nur qara bultlar menen qaplanǵan boladı.