Isa 50 | KaaIBT22L | STEP | Jaratqan Iye bılay deydi: «Men anańızdı quwıp jibergen waqıtta bergen talaq xat qáne? Sizlerdi qarız alǵan adamımnıń qaysısına satıppan? Mine, sizler óz jawız islerińiz sebepli satıldıńız, Sizlerdiń qılmıslarıńız sebepli anańız quwıp jiberildi.

‏ Isaiah 50

Izraildıń gúnası

1 Jaratqan Iye bılay deydi:
«Men anańızdı quwıp jibergen waqıtta bergen talaq xat qáne?
Sizlerdi qarız alǵan adamımnıń qaysısına satıppan?
Mine, sizler óz jawız islerińiz sebepli satıldıńız,
Sizlerdiń qılmıslarıńız sebepli anańız quwıp jiberildi.
2 Kelgenimde, ne ushın hesh kim joq edi?
Shaqırǵanımda, ne ushın hesh kim juwap bermedi.
Sizlerdi azat etiw ushın qolım sonday-aq qısqa ma edi?
Yamasa sizlerdi qutqarıwǵa Mende kúsh joq pa?
Bir aybat etsem, teńiz qurıydı,
Dáryalardı shólge aylandıraman.
Balıqlar suwsızlıqtan sasıp, shólden óledi.
3 Kóklerge qara kiydiremen,
Aza kiyimin olardıń japqıshı qılaman».

Quldıń sózdi tıńlawı

4 Sharshaǵanǵa sóz benen mádet bersin dep,
Quday Iye maǵan tálim berip, dana til berdi.
Hár kúni tańda Ol meni oyatıp,
Shákirtlerdey tıńlasın dep, qulaǵımdı ashadı.
5 Quday Iye qulaǵımdı ashtı,
Men qarsı shıqpadım, júz burıp ketpedim.
6 Men ózimdi urǵanlarǵa arqamdı,
Saqalımdı julǵanlarǵa júzimdi tuttım.
Masqaralaǵanda da, túkirgende de júzimdi jasırmadım.
7 Quday Iye maǵan járdem bergenlikten,
Men uyatqa qalmadım.
Ózimdi miytindey bekkem tuttım,
Bilemen, shermende bolmayman.
8 Meni aqlawshı janımda,
Meniń menen kim dawlasadı?
Kel, júzleseyik,
Meni kim ayıplay aladı?
Ol janıma kelsin!
9 Maǵan járdem beriwshi – Quday Iye,
Kim meni gúnalıǵa shıǵara aladı?
Olardıń hámmesi kiyimdey tozadı,
Olardı kúye jep qoyadı.

10 Arańızda Jaratqan Iyeden qorqıp,
Onıń xızmetshisiniń dawısına qulaq salǵan bar ma?
Qarańǵılıqta júrgenler, nurı bolmaǵanlar,
Jaratqan Iyeniń atına úmit baylap,
Qudayına súyensin!
11 Biraq ot jaǵıp, shıra uslaǵan sizler, hámmeńiz,
Óz otıńızdıń jarıǵında,
Jaqqan shıralarıńızdıń jaqtısında júre beriń.
Meniń qolım sizlerge mınanı qıladı:
Azap ishinde jatasız.