‏ Isaiah 51

Jaratqan Iyeniń Siondı jubatıwı

1«Azatlıqqa umtılıp,
Meni, Jaratqan Iyeni izlegenler,
Maǵan qulaq salıńlar!
Ózlerińiz kesip alınǵan jartasqa,
Ózlerińiz qazıp alınǵan tas kánine názer salıń.
2Ákeńiz Ibrayımǵa,
Ózińizdi tuwǵan Saraǵa názer salıń.
Men onı shaqırǵanımda, ol jalǵız edi,
Men onı jarılqap, kóbeyttim.
3Men, Jaratqan Iye Sionǵa,
Onıń hámme qarabaqanalarına táselle beremen.
Men Sionnıń shóllerin Edendey,
Dalańlıqların Jaratqan Iyeniń baǵınday qılaman.
Onda shadlıq hám quwanısh,
Minnetdarshılıq hám qosıq dawısları esitiledi.

4Xalqım, Maǵan dıqqat awdarıń,
Milletim, Maǵan qulaq tutıń!
Nızam Mennen shıǵadı,
Ádalatım xalıqlarǵa nur boladı.
5Azat etiwim tez jaqınlaspaqta,
Qutqarıwım jolǵa shıqtı.
Qollarım xalıqlardı basqaradı,
Atawlar Meni kútpekte,
Qolımnıń kúshine úmit baylamaqta.
6Basıńızdı kóterip, kóklerge kóz tigiń,
Tómende bolǵan jerge qarań:
Kókler tútindey tarqap ketedi,
Jer kiyim kibi tozadı,
Ondaǵı jasaytuǵınlar shıbınday ólip ketedi.
Biraq Meniń qutqarıwım máńgi boladı,
Meniń azat etiwim hesh qashan tamam bolmaydı.

7Ádillikti bilgen,
Nızamımdı júreginde saqlaǵanlar,
Meni tıńlań!
Adamlardıń abay etiwinen qorqpań,
Olardıń ǵarǵaǵanınan qáweterlenbeń.
8Kúye olardı kiyim kibi,
Qurtlar olardı jún kibi jeydi.
Biraq Meniń azat etiwim máńgige boladı,
Meniń qutqarıwım áwladtan-áwladqa dawam etedi».

9Oyan, oyan, kúshke tol, Jaratqan Iyeniń qolı!
Áyyemgi waqıtlardaǵıday, áwelgi áwladtaǵıday oyan!
Rahabtı ▼

▼ Rahab – Bul at bul jerde Mısırdı bildiredi.

tilkimlegen,
Sol teńiz aydarhasınıń denesin tesken Sen emes pe ediń?
10Teńizdi, tereń tuńǵıyıqtıń suwların qurıtqan Sen emes pe ediń?
Qutqarılǵanlar ótsin dep,
Teńiz túbin jol qılǵan Sen emes pe ediń?
11Jaratqan Iyeniń azat etkenleri izge qaytadı,
Qosıq aytıp, Sionǵa qaytıp keledi.
Olar máńgilik quwanısh tajın baslarına kiyedi.
Quwanısh hám shadlıqqa tolıp tasıp,
Qayǵı hám ǵam-táshiwish qashıp ketedi.

12Jaratqan Iye bılay deydi:
«Sizlerdi jubatatuǵın Menmen.
Ne ushın basında ólimi bar insannan,
Shóptey solıp qalatuǵın adamnıń ulınan qorqasań?
13Sen ózińdi jaratqan, kóklerdi jayǵan,
Jerdiń tiykarın qoyǵan,
Jaratqan Iyeni, Jaratıwshıńdı nege umıttıń?
Seni joq qılıw niyetinde bolǵan,
Eziwshiniń ǵázebinen nege kúni boyı qorqasań?
Qáne, eziwshiniń ǵázebi qayda?
14Tez arada tutqınlar azat etiledi,
Olar ólmeydi, qábirge de túspeydi,
Nanǵa da zar bolmaydı.
15Tolqınları shuwıldasın dep, teńizdi shayqaǵan,
Qudayıń Jaratqan Iye Men bolaman.
Meniń atım Álemniń Jaratqan Iyesi.
16Sózlerimdi awzıńa saldım,
Seni qolımnıń sayasında jasırdım.
Kóklerdi ornatqan,
Jerdiń tiykarın qoyǵan,
Sionǵa: „Sen Meniń xalqımsań“degen Men bolaman».

Jaratqan Iyeniń ǵázep kesesi

17Oyan, Erusalim, oyan, ayaqqa tur!
Jaratqan Iyeniń ǵázep kesesin Onıń qolınan ishtiń,
Túbine deyin iship, tentireklep júrdiń.
18Óziń tuwǵan ullarıńnıń ishinde,
Seni jetekleytuǵın birewi de joq.
Óziń ósirgen ullarıńnıń ishinde,
Qolıńnan uslap, súyeytuǵın birewi de joq.
19Basıńa qos apat tústi,
Kim saǵan táselle beredi?
Nabıt bolıw, wayranshılıq, ashlıq hám qılısh,
Kim seni jubata aladı?
20Ullarıń esten tanıp,
Torǵa túsken antilopaday bolıp,
Hár kósheniń basında jatır.
Olar Jaratqan Iyeniń ǵázebine,
Qudayıńnıń qáhárine ushıraǵan.

21Sonlıqtan azap shekken,
Sharapsız más bolǵanlar, mınaǵan qulaq salıń!
22Iyeń, Óz xalqın qorǵaytuǵın Qudayıń Jaratqan Iye bılay deydi:
«Mine, Men seni tentirekletetuǵın keseni qolıńnan aldım,
Bunnan bılay, Meniń ǵázep kesemnen ishpeyseń.
23Onı seni jábirlegenlerdiń qolına beremen.
Olar saǵan: „Jerge jat, ústińnen basıp óteyik“, – dedi,
Sonda sen arqańdı tutıp, jerdey,
Olar ótetuǵın kóshedey qıldıń».