Isa 52 | KaaIBT22L | STEP | Oyan Sion, oyan, kúshke tol! Erusalim, muxaddes qala, ájayıp kiyimlerińdi kiy! Endi súnnetsizler hám haram adamlar saǵan kirmes hasla.

‏ Isaiah 52

Sionnıń quwanıshı

1 Oyan Sion, oyan, kúshke tol!
Erusalim, muxaddes qala, ájayıp kiyimlerińdi kiy!
Endi súnnetsizler hám haram adamlar saǵan kirmes hasla.
2 Ústińdegi topıraqtı qaǵıp taslap,
Tur, Erusalim, taxtqa otır.
Moynıńdaǵı shınjırdı úzip tasla,
Tutqın bolǵan qız Sion!

3 Jaratqan Iye bılay deydi:
«Sizler pulǵa satılmadıńız,
Pulsız azat etilesiz».
4 Quday Iye bılay deydi:
«Xalqım jasap turıw ushın, dáslep Mısırǵa bardı,
Keyin assiriyalılar sebepsiz olardı jábirledi.
5 Bul ne awhal?
– deydi Jaratqan Iye. –
Xalqım qurıdan-qurı basıp alındı,
Húkimdarları páriyad etpekte,
– deydi Jaratqan Iye. –
Kúni boyı atıma til tiymekte.
6 Biraq xalqım Meniń atımdı bilip aladı.
Sol kúni olar Meniń sóylegenimdi,
„Mine, Men“degenniń Men ekenin biledi».

7 Tawlar asıp, Xosh Xabar alıp kiyatırǵannıń,
Ayaqları qanday ájayıp!
Ol paraxatshılıqtı járiyalamaqta,
Xosh xabar alıp kelmekte,
Qutqarılıwdı járiya qılmaqta.
Ol Sionǵa: «Qudayıń húkimdarlıq qıladı!» demekte.
8 Tıńlań! Gúzetshileriń dawısın kótermekte,
Birge olar quwanıp baqırmaqta.
Jaratqan Iyeniń Sionǵa qaytıp kelgenin,
Olar óz kózleri menen kóredi.

9 Birgelikte shadlıq penen baqırıń,
Erusalimniń qarabaqanaları!
Jaratqan Iye Óz xalqına táselle berdi,
Erusalimdi azat etti.
10 Pútkil milletlerdiń kóz aldında,
Jaratqan Iye muxaddes bilegin túrdi.
Pútkil dúnya,
Qudayımızdıń qutqarıwın kóredi.

11 Ketiń, ketiń, ol jerden shıǵıń!
Haram nárselerge qol tiygizbeń!
Sizler, Jaratqan Iyeniń muxaddes zatların tasıwshılar!
Ol jerden shıǵıp, tazalanıń,
12 Biraq asıǵıs shıǵıp ketpeń,
Qashıp ta júrmeń.
Sebebi Jaratqan Iye aldıńızda júredi,
Izraildıń Qudayı izińizden qorǵap baradı.

Jaratqan Iyeniń qulınıń azap shegiwi hám ullılanıwı

13 «Mine, qulım tabısqa erisedi,
Ol kóterilip, ullılanıp, eń biyikke shıǵarıladı.
14 Kópler oǵan hayran qaldı.
Onıń túr-túsi adamǵa uqsamaytuǵın sıqılsız,
Kórinisi de adam ulına uqsamaytuǵın edi.
15 Ol kóp milletlerdi lal qaldıradı,
Patshalar onıń aldında awzın jumadı.
Sebebi olar aytılmaǵan nárselerdi kórip,
Esitpegen nárselerin túsinedi».