‏ Isaiah 54

Sionnıń keleshektegi ullılıǵı

1«Shadlan, háy, bala kórmegen násilsiz hayal!
Tolǵatıp kórmegen, sen, shadlanıp baqır!
Sebebi taslap ketilgen hayaldıń balaları,
Kúyewi bar hayaldikinen kóp boladı,
– deydi Jaratqan Iye. –
2Shatırıńnıń ornın keńeyt,
Mákan jayıńnıń perdelerin ayamay sozıp,
Jiplerin uzın etip al, qazıqların bekkemle.
3Sen ońǵa da, solǵa da jayılasań,
Urpaqlarıń milletlerdiń jerlerin iyelep,
Bos qalǵan qalalarǵa ornalasıp aladı.
4Qorqpa, uyatqa qalmaysań,
Ruwxıń túspesin, masqara bolmaysań.
Sen jaslıǵıńdaǵı shermendelikti umıtasań,
Jesirlik hásiretińdi artıq eske almaysań.
5Sebebi seniń kúyewiń – seniń Jaratıwshıń,
Onıń atı – Álemniń Jaratqan Iyesi.
Izraildıń Muxaddesi – Ámeńgeriń,
Ol pútkil dúnyanıń Qudayı dep ataladı.
6Sen kúyewi taslap ketip,
Qálbi jaraqatlanǵan hayalǵa uqsaysań.
Biraq Jaratqan Iye seni shaqıradı,
– deydi Qudayıń. –
7Men seni bir máwrit tárk ettim,
Biraq ullı mehir menen seni jıynayman.
8Qáhárlengenimde, sennen bir máwrit júzimdi jasırǵan edim,
Biraq máńgilik súyispenshiligim menen,
Saǵan rehim etemen,
– deydi Ámeńgeriń Jaratqan Iye. –
9Bul Men ushın Nuxtıń dáwirine uqsaydı.
Nuxtıń dáwirinde topan suwı,
Jer júzinde endi qaytalanbaydı dep ant ishkenim sıyaqlı,
Saǵan da endi qáhárlenip, jazalamayman dep ant ishtim.
10Tawlar ornınan qozǵalıp, tóbeler shayqalsa da,
Meniń saǵan degen súyispenshiligim terbelmeydi,
Tınıshlıq kelisimim de qozǵalmas,
– deydi saǵan rehim etken Jaratqan Iye. –

11Azap shegip, dawıl dúbep, jubanısh tappaǵan qala!
Seni periwzadan qurıp,
Tiykarıńdı lazuritten qoyaman.
12Minaralarıńdı rubinnen,
Dárwazalarıńdı gáwhardan,
Diywallarıńdı qımbatbaha taslardan isleymen.
13Balalarıńnıń hámmesi Jaratqan Iyeden tálim aladı,
Olar ullı tınıshlıqqa bólenedi.
14Sen ádalatlıq penen negiz qurasań,
Eziliwden awlaq bolasań, qorqpaysań.
Qáwip-qáterden jıraq bolasań, ol saǵan jaqınlamas.
15Eger birew saǵan topılsa,
Bul Mennen emes,
Saǵan hújim qılǵannıń hár biri saǵan bas iyedi.

16Qara, kómir shoǵın úplep,
Óz maqseti ushın qural-jaraq soqqan temirshini,
Men jarattım.
Wayran qılsın dep, basqınshını da Men jarattım.
17Saǵan qarsı qollanıw ushın jaratılǵan,
Hesh qanday qural-jaraq tabısqa erispeydi,
Húkimde seni ayıplamaqshı bolǵan hár bir tildi,
Sen ayıplaysań.
Jaratqan Iyeniń qullarınıń miyrası – usı,
Men olardı aqlayman,
– deydi Jaratqan Iye».