Isaiah 55
Jaratqan Iyeniń shaqırıǵı
1«Shóllegenlerdiń hámmesi, suw kózlerine kelińler!Aqshası joqlar da kelip, awqat alıp jeńler!
Kelińler, sharap hám sút alıńlar,
Biypul, esheyin!
2Ne ushın aqshańızdı nan bolmaǵan nársege,
Miynetińizdi ózlerińizdi qanıqtırmaytuǵın nársege sarplaysızlar?
Meni qunt penen tıńlap, jaqsı nárseni jeńler,
Janıńız toyımlı awqatlardan lázzet alsın!
3Qulaq túrińler hám Maǵan kelińler,
Tıńlańlar, sonda jasaysız.
Dawıtqa bolǵan sadıq súyispenshiligim haqı,
Sizler menen máńgilik kelisim dúzbekshimen.
4Mine, Men onı xalıqlarǵa gúwa,
Kósem hám sárdar qıldım.
5Sen tanımaǵan xalıqlardı shaqırasań,
Seni tanımaǵan xalıqlar saǵan keliwge asıǵadı.
Sebebi Izraildıń Muxaddesi,
Qudayıń Jaratqan Iye bolǵan Men,
Seni ullılıqqa bólegenmen».
6Tabıwǵa pursat barda, Jaratqan Iyeni izleń,
Jaqın jerde eken, Onı shaqırıń.
7Zalım óz jolınan,
Jawız adam óz niyetinen qaytsın.
Jaratqan Iyege júz bursın,
Jaratqan Iye rehim eter,
Qudayımızǵa qaytsın,
Onıń keshirimi sheksiz!
8«Meniń pikirlerim sizlerdikinen ózgeshe,
Meniń jolım sizlerdikinen basqa,
– deydi Jaratqan Iye. –
9Aspan jerden qansha joqarı bolsa,
Meniń jollarım da sizlerdikinen sonsha joqarı,
Meniń oy-pikirlerim de sizlerdikinen júdá biyik.
10Aspannan jawǵan jawın menen qar, aspanǵa qaytpaydı.
Al jerdi suwǵarıp, ósimlik kógertip ósiredi,
Egiw ushın dán, jew ushın nan beredi.
11Meniń awzımnan shıqqan sóz de soǵan uqsaydı:
Ol orınlanbay, Maǵan qaytpaydı.
Ol Meniń erkimdi orınlaydı,
Nege jibergen bolsam, sol ámelge asadı».
12Sonlıqtan sizler quwanısh penen shıǵasızlar,
Paraxatshılıq penen jetelenesizler.
Tawlar hám tóbeshikler aldıńızda qosıq aytıp,
Daladaǵı barlıq aǵashlar qol shappatlaydı.
13Tikenli puta ornına sárwi aǵashı,
Tikenektiń ornına mirta aǵashı ósedi.
Bul Jaratqan Iyeniń dańqın asıratuǵın,
Sónbeytuǵın máńgi belgi boladı.
Copyright information for
KaaIBT22L