Isaiah 56
Jaratqan Iyeniń pútkil milletlerdi qabıl etiwi
1Jaratqan Iye bılay deydi:«Ádalattı saqlań, tuwrı bolǵan islerdi isleń,
Sebebi tez arada Meniń qutqarıwım kelip,
Azat qılıwım ayan boladı.
2Mınanı isleytuǵın adam,
Onı muqıyat orınlaytuǵın adam balası, qanday baxıtlı!
Bunday adam Shabbat kúnine ámel qıladı, onı xorlamaydı,
Qolın jawız islerden tıyadı.
3Jaratqan Iyege baǵıshlanǵan jat jerlilerdiń hesh biri:
„Jaratqan Iye meni Óz xalqınan birotala ayırıp taslaydı“, – demesin.
Hesh bir aqta da: „Men tek bir quwrap qalǵan terekpen“, – dep aytpasın».
4Sebebi Jaratqan Iye bılay deydi:
«Shabbatıma ámel qılıwshı,
Maǵan unaǵan nárselerdi tańlawshı,
Kelisimime sadıq bolǵan aqtalarǵa,
5Ibadatxanamda, diywallarımnıń ishinde,
Ullarım menen qızlarımnan da góre jaqsıraq,
Estelik belgi hám at beremen.
Men olarǵa joǵalmaytuǵın, máńgilik bir at beremen.
6Jaratqan Iyege xızmet etiw,
Onıń atın súyiw,
Onıń qulı bolıw ushın,
Jaratqan Iyege ózin baǵıshlaǵan jat jerlilerdi,
Shabbat kúnine ámel qılıp, onı xorlamaǵanlardı,
Kelisimimdi bekkem saqlaǵanlardı,
7Muxaddes tawıma alıp kelemen.
Duwa etetuǵın Úyimde olardı quwanıshqa bóleymen.
Olardıń jandırılatuǵın qurbanlıqları hám basqa qurbanlıqları,
Qurbanlıq ornımda qabıl etiledi.
Meniń Úyim hámme xalıqlar ushın,
Duwa etetuǵın úy dep ataladı».
8Izraildıń quwǵın bolǵanların jıynap alatuǵın,
Quday Iye bılay deydi:
«Men jıynaǵanlarıma qosa,
Basqalardı da jıynayman».
Izraildıń jawız basshılarınıń húkim qılınıwı
9Háy, daladaǵı jabayı haywanlar,Háy, toǵaydaǵı jabayı haywanlar,
Kelip, jeńler!
10Izraildıń gúzetshileri soqır,
Olardıń hámmesi nadan,
Barlıǵı úrmeytuǵın tilsiz iytler,
Olar jatıp alıp, tús kóredi,
Uyqını jaqsı kóredi.
11Olar toyǵanın bilmeytuǵın ashkóz iytler.
Aqılsız shopanlardıń hár biri,
Óz paydasın gózlep,
Óz jolınan ketedi.
12Olar: «Keliń, sharap isheyik!
Ótkir ishimlikke toyayıq!
Erteń de búgingidey boladı,
Hátte, bunnan da jaqsıraq bolar», – deydi.
Copyright information for
KaaIBT22L