‏ Isaiah 57

Opasız xalıq

1Ádil adam ólip ketip atır,
Biraq hesh kim bunı júrekke jaqın almaydı.
Sadıq adamlar joq bolıp ketip atır,
Sebebin hesh kim túsinbeydi.
Ádil adam jawızlıqtan qutılıp,
2Tınısh jerge kiredi.
Tuwrı joldan júrgenler óz qábirinde tınıǵadı.

3«Sizler bolsańız, háy, palkerlerdiń balaları,
Neke hadallıǵın buzıwshı hám buzıqlardıń urpaqları,
Berman keliń!
4Sizler kimniń ústinen kúlip tursız?
Kimdi mazaqlap,
Kimge tilińizdi shıǵarıp tursız?
Sizler qozǵalańshılardıń balaları,
Jalǵanshılardıń zúryadı emessiz be?
5Sizler kiyeli terebinflerdiń arasında,
Hár bir qoyıw japıraqlı terek astında,
Qushtarlıq otında órtendińiz.
Saylarda hám jartastıń quwıslarında,
Balalarıńızdı qurbanlıqqa usındıńız.
6Seniń payıń – dáryanıń sıypaq tasları arasındaǵı butlar,
Nesiybeń – solar boladı.
Olarǵa ishimlik sadaqaların quydıń,
Ǵálle sadaqasın berdiń.
Bulardan keyin de, seni jazasız qaldırayın ba?
7Biyik hám ullı taw ústine tósegińdi salıp,
Qurbanlıq beriw ushın sol jerge shıqtıń.
8Qapı hám jaqlawıńnıń arǵı jaǵına,
Óz butlarıńnıń músinlerin qoydıń.
Meni taslap ketip, jalańashlanıp, tósegińe kirdiń.
Tósegińdi keń jaydıń.
Kim menen tósekte jaqsı bolsa,
Sonıń menen pitim dúzdiń.
Olardıń jalańash denesine tigilip qaldıń.
9Xosh iyisli may alıp, Moloxqa bardıń,
Átirlerińdi kóbeyttiń.
Elshilerińdi uzaqlarǵa jolladıń,
Hátte, óliler mákanına jiberdiń.
10Uzaq sapar seni talıqtırdı,
Biraq sonda da úmitińdi úzbediń.
Kúshińdi qayta tiklediń,
Sol sebepli haldan taymadıń.

11Meni aldap, esińnen shıǵaratuǵınday,
Júregińnen Maǵan orın bermeytuǵınday,
Kimnen aybınıp, kimnen qorqtıń?
Uzaq waqıt úndemegenim sebepli,
Mennen qorqpaysań ba?
12Jalǵan ádilligińdi, islerińdi áshkara qılaman,
Bulardan saǵan payda bolmaydı.
13Páriyad etkenińde,
Jıynap qoyǵan butlarıń qutqarsın!
Olardı samal ushırıp alıp ketedi,
Úplegen jel olardı kóterip ketedi.
Biraq Meni panalaǵan adam jerdi iyeleydi,
Meniń muxaddes tawımdı miyrasqa aladı».

Qudaydıń jubatıwshı sózi

14Jaratqan Iye bılay deydi:
«Topıraqtı tegislep, jol salıń,
Xalqımnıń jolındaǵı bógetlerdi alıp taslań».

15Biyik hám bálent Bolǵan,
Máńgi jasaytuǵın,
Atı Muxaddes Bolǵan bılay deydi:
«Men biyik, muxaddes jerde jasayman,
Sonday bolsa da, ruwxı túskenlerdiń ruwxın kóteriw,
Ezilgenlerdiń júregin janlandırıw ushın,
Ezilgenler hám ruwxı túskenler menen birgemen.
16Men adamlardı bárqulla ayıplap,
Máńgige ǵázeplenbeymen.
Bolmasa, Men jaratqan insanlardıń ruwxı,
Janı aldımda tura almas edi.
17Haram paydaǵa óshligi ushın ǵázeplenip,
Men olardı jazaladım,
Qáhárlenip, júzimdi jasırdım.
Biraq olar qaytıwdan bas tartıp,
Júregi qálegen joldan ketti.
18Men olardıń jolların kórdim,
Degen menen, olarǵa shıpa beremen.
Olardı jetelep, qayǵırǵanlardı qayta jubataman.
19Awızlarına alǵıs-maqtaw sózlerin salaman.
Uzaqtaǵılarǵa da, jaqındaǵılarǵa da tınıshlıq bolsın!
– deydi Jaratqan Iye. –
Men olardı shıpalayman!
20Biraq jawızlar tolqınlanǵan teńizge uqsaydı,
Ol tınısh tura almaydı,
Suwları ılay menen balshıqtı shıǵara beredi,
21Jawızlar ushın tınıshlıq joq»,
– deydi Qudayım.