Isa 58 | KaaIBT22L | STEP | «Dawısıńdı qıspay, qattı baqır! Dawısıń kárnaydıń sestindey bolıp shıqsın! Xalqıma qılmısların, Yaqıptıń násiline gúnaların járiyala!

‏ Isaiah 58

Haqıyqıy oraza

1 «Dawısıńdı qıspay, qattı baqır!
Dawısıń kárnaydıń sestindey bolıp shıqsın!
Xalqıma qılmısların,
Yaqıptıń násiline gúnaların járiyala!
2 Olar hár kúni Meni izler,
Jollarımdı biliwden zawıq almaqshımısh!
Tuwrı is islegen,
Qudaydıń kórsetpelerinen júz burmaǵan xalıq kibi,
Mennen ádil qarar soraydı,
Qudayǵa jaqın bolıwdı árman etedi.
3 Olar: „Bizler oraza tuttıq,
Sen nege kórmediń?
Ózimizdi boysındırdıq,
Nege itibar bermediń?“– deydi.

Mine, sizler oraza tutqan kúnińizdiń ózinde,
Qálegenińizdi qılıp,
Jumısshılarıńızdı ezesiz.
4 Mine, oraza tutıp atırıp daw-jánjel qılasız,
Zorlıq penen mush kóteresiz.
Búgingidey oraza menen,
Dawısıńızdı joqarıǵa esittire almaysız.
5 Men qálegen oraza,
Adam ózin boysındırǵan kún usınday bola ma?
Qamıs kibi basıńızdı iyip,
Aza kiyimin kiyip, kúlge jatıwdı,
Oraza, yaǵnıy Jaratqan Iyege unaytuǵın kún dep ataysız ba?
6 Men qálegen oraza,
Ádalatsızlıq shınjırların sheshiw,
Moyıntırıq jiplerin úziw,
Ezilgenlerdi azat etiw,
Hár qanday moyıntırıqtı sındırıw emes pe?
7 Nanıńdı ash penen bólisip jep,
Úysiz jarlılarǵa úyińnen orın beriw emes pe?
Jalańashtı kórgende kiyim berip,
Jaqınlarıńnan járdemińdi ayamaw emes pe?
8 Sonda nurıń shuǵla kibi jarqırap,
Tez shıpa tabasań.
Ádilligiń aldıńda júrip,
Jaratqan Iyeniń saltanatı izińde qorǵanıń boladı.
9 Keyin shaqırsań, Jaratqan Iye juwap beredi,
Páriyad etseń, Ol: „Men mındaman“, – deydi.

Arańızdan moyıntırıqtı alıp taslap,
Barmaq shoshaytıp kórsetiwdi hám ósekti toqtatsań,
10 Ashlar ushın janıńdı pidá etseń,
Qıynalǵanlardı mútáj zatı menen támiyinleseń,
Onda qarańǵılıqta nurıń sáwle shashıp,
Tas túnegiń túski waqıttay boladı.
11 Jaratqan Iye seni bárqulla jetekleydi,
Qurǵaq jerde de keregiń menen támiyinleydi.
Súyegińe quwat beredi.
Sen suwǵarılǵan baǵ kibi,
Suwı qurımaytuǵın bulaq kibi bolasań.
12 Eski qarabaqanalarıń qayta tiklenedi,
Kóp urpaqlardan qalǵan,
Qarabaqanalardıń tiykarın qayta tikleyseń.
Sen: „Qıyraǵan diywallardı ońlaytuǵın,
Jasaw ushın kóshelerdi qayta tikleytuǵın“, – dep atalasań.

13 Shabbat kúnin ayaq astı qılıwdan,
Muxaddes kúnimde qálegenińdi qılıwdan saqlansań,
Shabbat kúnimdi zawıqlı,
Jaratqan Iyeniń muxaddes kúnin húrmetli dep atasań,
Ózińe unaǵanın islep,
Keypi-sapanı izlemeseń,
Bos sózlerdi sóylemeseń,
Sol kúndi húrmetleseń,
14 Sonda Jaratqan Iyeden zawıq alasań.
Men seni dúnyanıń bálentliklerine shıǵarıp,
Ákeń Yaqıptıń miyrasın saǵan beremen».
Bunı Jaratqan Iye aytadı.