‏ Isaiah 59

Gúna hám jaza

1Bilip qoyıń, Jaratqan Iyeniń qolı qutqara almaytuǵınday qısqa emes,
Qulaǵı da esitpeytuǵınday, awır emes.
2Degen menen, qılmıslarıńız Qudayıńız benen arańızǵa suwıqlıq saldı,
Gúnalarıńız Onıń júzin sizlerden jasırdı,
Sonlıqtan Ol sizlerdi esitpeydi.
3Qollarıńız qan menen,
Barmaqlarıńız qılmıs penen haramlandı.
Awzıńız jalǵan aytıp,
Tilińiz ótirik sózler sóyleydi.
4Hesh kim ádillikke shaqırmaydı,
Hesh kim hadal dawlaspaydı.
Ózleriniń bos sózlerine súyenip, jalǵan sóyleydi,
Buzǵınlıqqa hámiledar bolıp, jawızlıq tuwadı.
5Olar uwlı jılannıń máyegin qurıq basadı,
Órmekshiniń awın toqıydı.
Olardıń máyegin jegen óledi,
Sınǵan máyekten záhárli jılan shıǵadı.
6Aw toqıǵan menen hesh nársege erispeydi,
Dúzgen jobaları paydasız.
Olardıń isleri jaramas isler,
Qolları zorlıq qıladı.
7Ayaqları jamanlıqqa juwıradı,
Biygúna qan tógiwge asıǵadı.
Oyları jawızlıqqa tolı,
Talan-taraj hám qırǵın bar jollarında.
8Sol jollardan júretuǵınlar,
Tınıshlıqtıń ne ekenin bilmeydi.
Ádalat joq jollarında,
Ózlerine qıysıq jollar isledi,
Tınıshlıqtıń ne ekenin bilmeytuǵınlar,
Sol jollardan júredi.

Xalıqtıń óz gúnaların moyınlawı

9Sonlıqtan ádalat bizden uzaqta,
Ádillik bizge jetip kelmedi.
Nurdı kútemiz, biraq tek qarańǵılıq bar,
Jaqtılıq izleymiz, biraq túnekte júremiz.
10Soqırdıń diywaldı sıypalaǵanına uqsap,
Kózli kibi qarmalanamız,
Kúpá-kúndiz ımırt jabılǵanday súrnigemiz,
Kúshliler arasında ólideymiz.
11Hámmemiz ayıwlar kibi baqıramız,
Kepterler kibi shırıldaymız.
Ádalattı kúttik, biraq ol joq,
Qutqarılıwdı kúttik, biraq ol bizden alısta.
12Aldıńda qılmıslarımız kóp,
Gúnalarımız bizge qarsı gúwalıq bermekte.
Qılmıslarımız kóz aldımızda,
Ayıplarımızdı ózimiz bilemiz.
13Boysınbay, Jaratqan Iyeni tárk ettik,
Qudayımızdan júz burdıq,
Zulımlıq penen sóyledik, bas kóterdik,
Júregimiz hámiledar bolǵan jalǵandı sóyledik.
14Ádalat quwıldı, ádillik uzaqta qaldı.
Haqıyqat qala maydanında quladı,
Hadallıq aramızǵa kire almaydı.
15Hesh jerde haqıyqat joq,
Zulımlıqtan bas tartqan talanadı.

Jaratqan Iye xalqın qutqarmaqshı

Jaratqan Iye bunı kórip,
Ádalattıń joqlıǵına qapa boldı.
16Jaratqan Iye hesh kimniń joqlıǵın kórdi,
Aralasatuǵın hesh kimniń joqlıǵına hayran qaldı.
Óz qolı Onı jeńiske eristirdi,
Ádilligi Oǵan súyenish boldı.
17Ol ádillikti sawıt kibi kiydi,
Qutqarılıw duwlıǵasın basına kiydi.
Ósh alıwdı Ol kiyim kibi kiyip alıp,
Ǵázepti shapan kibi jamıldı.
18Ol hár kimge isine jarasa jaza beredi.
Dushpanlarına qáhárin tógip,
Jawlarına jazasın tartqızadı.
Hátte, shetki atawlarǵa da esesin qaytaradı.

19Batıstaǵılar Jaratqan Iyeniń atınan,
Shıǵıstaǵılar Onıń dańqınan qorqadı.
Sebebi Jaratqan Iye Óz demi menen quwǵan,
Tasqın suwday bolıp keledi.

20«Men Ámeńgeri sıpatında Sionǵa,
Yaqıptıń urpaqlarınıń táwbe qılǵanlarına kelemen»,
– deydi Jaratqan Iye.

21«Meniń olar menen dúzetuǵın kelisimim mınaw, – deydi Jaratqan Iye. – Saǵan bergen Ruwxım hám awzıńa salǵan sózim búginnen baslap seniń de, balalarıńnıń da, balalarıńnıń balalarınıń da, – deydi Jaratqan Iye, – máńgige awzınan túspeydi».