Isaiah 6
Jaratqan Iyeniń Iyshayanı shaqırıwı
1Patsha Uzziya ólgen jılı men biyik hám saltanatlı taxt ústinde otırǵan Iyemizdi kórdim. Onıń kiyiminiń etekleri Ibadatxananı toltırıp turǵan edi. 2Onıń joqarısında seraflar ▼▼ Seraflar – jalınlı aspan barlıqları.
turǵan bolıp, hár biriniń altı qanatı bar edi. Olar eki qanatı menen júzin, eki qanatı menen ayaqların jawıp, al qalǵan ekewi menen ushıp turǵan edi. 3Olar bir-birine dawıslap bılay dep aytıp turdı:«Álemniń Jaratqan Iyesi,Muxaddes, muxaddes, muxaddes!
Pútkil álem Onıń saltanatına tolǵan».
4Olardıń dawısınan qapınıń jaqlawları qozǵalıp, Ibadatxana tútinge toldı. 5Sonda men: – Sorım qurısın! Qurıp qaldım! Óytkeni men awzı haram adamman hám awzı haram adamlar arasında jasap atırman. Degen menen, Patshanı – Álemniń Jaratqan Iyesin kózlerim kórdi, – dedim. 6Bunnan soń, seraflardıń biri maǵan qaray ushtı. Onıń qolında tútetki tútetiletuǵın orınnan átóshkir menen alınǵan qoz bar edi. 7Ol qozdı awzıma tiygizip: – Mine, bul qoz erinlerińe tiydi. Endi qılmıslarıń alıp taslandı, gúnalardan páklendiń, – dedi. 8Sońınan Iyemizdiń: – Kimdi jibereyin? Bizler ushın kim baradı? – degen dawısın esittim. – Mine, meni jiber, men baraman, – dedim men. 9Ol bılay dedi: – Barıp, bul xalıqqa: «Tıńlap turasız, biraq túsinbeysiz,
Qarap turasız, biraq mán bermeysiz», – dep ayt.
10Solay etip, bul xalıqtıń júregin sezimsiz qıl,
Qulaqların awırlastır,
Kózlerin gúńgirtlestir.
Olar kózleri menen kórmesin,
Qulaqları menen esitpesin,
Júrekleri menen sezbesin,
Maǵan qaytıp kelip, shıpa tappasın.
11Men Onnan: – Iyem, bul qashanǵa deyin dawam etedi? – dep soradım. Ol bılay dep juwap berdi: – Qalalar qıyrap, qańırap bosap,
Úyler adamsız qalǵansha,
Jerler qańırap, wayran bolǵansha,
12Men, Jaratqan Iye hámmesin uzaqlarǵa quwıp jiberip,
Elde taslap ketilgen jerler kóbeygenshe.
13Eger de elde xalıqtıń onnan biri qalsa da,
Onı qaytadan joq qılaman.
Biraq kesip taslanǵanda túbiri qalǵan,
Terebinf yamasa emen aǵashı sıyaqlı,
Muxaddes tuqım da túbirden qayta shıǵadı.
Copyright information for
KaaIBT22L