‏ Isaiah 60

Erusalimniń saltanatlı keleshegi

1«Tur, jarqıra, seniń nurıń keldi,
Jaratqan Iyeniń saltanatı ústińe shashıldı.
2Mine, jer júzin qarańǵılıq,
Xalıqlardı tas túnek qapladı.
Biraq seniń ústińde Jaratqan Iye jarqırap,
Onıń ullılıǵı kórinedi.
3Milletler seniń nurıńa,
Patshalar tań nurıńnıń shuǵlasına keledi.

4Basıńdı kóterip, aylanaǵa qara,
Hámmesi jıynalıp, saǵan kiyatır.
Ullarıń uzaqlardan keledi,
Qızlarıńdı qollarında kóterip ákeledi.
5Sonda olardı kórip, júziń jarqırap,
Shadlıqtan júregiń háwliredi.
Sebebi teńiz arqalı keletuǵın baylıqlar saǵan nesip etip,
Xalıqlardıń baylıqları saǵan keledi.
6Túye kárwanı jerińdi qaplap ketip,
Midyan hám Efadan kelgen jas túyeler kárwanına tolasań.
Olardıń hámmesi Shebadan keledi,
Altın hám xosh iyisli zatlar alıp kelip,
Jaratqan Iyege alǵıslar aytadı.
7Kedardıń barlıq súriwleri sende jıynaladı,
Nebayottıń qoshqarları saǵan xızmet etip,
Olar qurbanlıq ornımda qurbanlıqqa qabıl etiledi,
Men saltanatlı Úyimdi dańqqa bóleymen.

8Bultqa uqsap, uyasına kiyatırǵan kepterge uqsap,
Ushıp kiyatırǵan mınalar kimler?
9Atawlar meni kútedi.
Qudayıń Jaratqan Iye,
Izraildıń Muxaddesi húrmeti,
Úlken sawda kemeleri birinshilerden bolıp,
Ullarıńdı alıslardan,
Gúmis hám altını menen birge alıp keledi.
Sebebi Jaratqan Iye seni dańqqa bóledi.
10Jat jerliler diywallarıńdı quradı,
Patshaları saǵan xızmet etedi.
Ǵázeplengenimde, seni jazalaǵan bolsam da,
Miyrimim túskende, rehim etemen.
11Dárwazalarıń mudamı ashıq bolıp,
Olar kúni-túni jabılmaydı.
Milletler óz patshaları menen súrgin qılınıp,
Baylıqların saǵan alıp kele beredi.
12Saǵan xızmet etpegen millet hám patshalıq joq boladı,
Bunday xalıqlar pútkilley wayran qılınadı.

13Muxaddes Úyimdi bezew ushın,
Lebanonnıń sánli aǵashları:
Sárwi, shınar hám qaraǵay aǵashları saǵan alıp kelinedi.
Men ayaq basqan jerimdi saltanatlı qılaman.
14Saǵan jábir qılǵanlardıń balaları kelip,
Saǵan tájim etedi.
Seni kemsitkenlerdiń hámmesi ayaǵıńa jıǵıladı.
Seni Jaratqan Iyeniń qalası,
Izraildıń Muxaddesiniń Sionı dep ataydı.

15Tárk etilip, jek kórinishli boldıń,
Sen arqalı hesh kim ótpedi.
Biraq Men seni máńgige ullı qılıp,
Áwladtan-áwladqa shadlıqqa bóleymen.
16Milletler seni ana kibi emizer,
Patshalar saǵan kókirek sútin berer.
Sonda sen Meniń Jaratqan Iye – Qutqarıwshıń,
Ámeńgeriń, Yaqıptıń Kúshli Qudayı ekenimdi bileseń.
17Saǵan qola ornına altın,
Temir ornına gúmis,
Aǵash ornına qola,
Tas ornına temir beremen.
Paraxatshılıqtı hákimiń,
Ádillikti húkimdarıń qılaman.
18Jerińde bunnan bılay zorlıq-zombılıq,
Shegarań ishinde qırǵın hám wayranshılıq esitilmeydi.
Diywallarıńdı „Qutqarılıw“,
Dárwazalarıńdı „Alǵıs“dep ataysań.

19Saǵan kúndiz quyash nurı,
Túnde ay sáwlesi hájet bolmaydı.
Óytkeni Jaratqan Iye seniń máńgi nurıń boladı,
Qudayıń seniń ullılıǵıń boladı.
20Bunnan bılay, quyashıń batpas,
Ayıńnıń da sáwlesi óshpes.
Óytkeni Jaratqan Iye seniń máńgi nurıń boladı,
Qayǵılı kúnleriń tamam boladı.
21Pútkil xalqıń ádil bolıp,
Jerdi máńgi iyeleydi.
Ullılıǵımdı ayan qılıw ushın,
Men olardı ektim, olar Meniń qollarımnıń isi.
22Olardıń eń azı – mıń adamǵa,
Eń kishkenesi – kúshli milletke aylanadı.
Men – Jaratqan Iyemen.
Óz waqtında, bunı tez ámelge asıraman».