Isaiah 61
Jaratqan Iyeniń miyrimlilik jılı
1Quday Iyeniń Ruwxı meniń ústimde.Ol meni jarlılarǵa xosh xabar járiyalaw ushın mayladı.
Meni jaralı júreklerdi emlewge,
Tutqınlardıń azatlıqqa,
Qamaqtaǵılardıń erkinlikke shıǵatuǵının,
2Jaratqan Iyeniń miyrimlilik jılın,
Qudayımızdıń ósh alatuǵın kúnin járiyalawǵa,
Barlıq qayǵıǵa batqanlarǵa jubanısh beriwge,
3Sionda qayǵı basqanlarǵa ǵamxorlıq qılıwǵa,
Kúl ornına sánli taj,
Qayǵı ornına shadlıq mayın,
Ǵamlı ruwx ornına alǵıs tonın beriwge jiberdi.
Olar Jaratqan Iyeniń dańqın kórsetiw ushın egilgen,
Ádillik terebinfleri dep ataladı.
4Olar áyyemgi qarabaqanalardı qayta qurıp,
Eski qıyraǵan orınlardı qayta tikleydi.
Áwladtan-áwladqa wayran bolıp,
Qıyrap qalǵan qalalardı abat qıladı.
5Jat jerliler sizlerdiń súriwlerińizdi baǵıp,
Shet elliler diyxan hám baǵmanıńız boladı.
6Sizler bolsa, Jaratqan Iyeniń ruwxaniyleri,
Qudayımızdıń xızmetshileri dep atalasız.
Sizler milletlerdiń baylıǵınan lázzet alıp,
Olardan alǵan qaznalarǵa maqtanasız.
7Burın uyatqa qalǵanıńız ushın esesin alasız,
Xorlıq ornına alǵan jer úlesińiz ushın shadlanasız.
Óz jerińizden eki ese úles alasız,
Máńgilik quwanısh sizlerdiki boladı.
8«Men, Jaratqan Iye ádalattı súyemen,
Talanshılıq hám nahaqlıqtı jek kóremen.
Sadıqlıq penen ılayıqlı sıyın berip,
Olar menen máńgilik kelisim dúzemen.
9Olardıń áwladları milletler arasında,
Urpaqları xalıqlar arasında tanımalı boladı,
Olardı kórgenlerdiń hár biri,
Jaratqan Iye jarılqaǵan xalıq ekenin ańlaydı».
10Men Jaratqan Iyede shadlanaman,
Janım Qudayımda yoshlanar.
Óytkeni Ol maǵan qutqarılıw kiyimin kiygizdi.
Maǵan ádillik shapanın japtı.
Men taj kiygen kúyewge,
Bezeniw buyımların taqqan kelinge uqsayman.
11Topıraqtıń ósimlikti shıǵarǵanı kibi,
Baǵdıń egilgen nárselerdi ósirgeni sıyaqlı,
Quday Iye de ádillik hám alǵıstı,
Pútkil milletlerdiń kóz aldında ósirdi.
Copyright information for
KaaIBT22L