Isaiah 62
Sionnıń taza atı
1Ádilligi nur kibi,Qutqarılıwı shom kibi parlap janbaǵansha,
Sion haqı úndemey qalmayman,
Erusalim haqı tınısh turmayman.
2Milletler ádilligińdi,
Barlıq patshalar ullılıǵıńdı kóredi.
Sen Jaratqan Iye Óz awzı menen qoyatuǵın,
Taza at penen atalasań.
3Sen Jaratqan Iyeniń qolındaǵı gózzallıq gúltajı,
Qudayıńnıń qolındaǵı patshalıq tajı bolasań.
4Endi saǵan «Tárk etilgen», dep aytpas,
Jerińdi «Qańırap qalǵan», dep atamas.
Biraq saǵan «Súyiklim»,
Jerińe «Kelinshegim», delinedi.
Sebebi Jaratqan Iye seni súyedi,
Jeriń de xojalıqlı boladı.
5Jigittiń qızǵa úylengenindey,
Ullarıń da saǵan iyelik etedi.
Kúyewdiń kelin ushın quwanǵanı sıyaqlı,
Qudayıń da sen ushın quwanadı.
6Háy Erusalim, diywallarıńa gúzetshiler qoydım,
Olar kúni-túni únsiz qalmas.
Háy, Jaratqan Iyeni eske alıwshılar,
Ózlerińizge tınıshlıq bermeń.
7Erusalimdi bekkemlep,
Onı jer júziniń dańqı qılmaǵansha,
Jaratqan Iyege tınıshlıq bermeń.
8Jaratqan Iye oń qolı,
Qúdiretli qolı menen ant ishti:
«Endi ǵálleńdi dushpanlarıńa azıq ushın bermeymen,
Jat elliler miynetiń sińgen sharabıńnan ishpeydi.
9Zúráátin jıynaǵanlar jep,
Jaratqan Iyege alǵıs aytadı,
Júzimin jıynaǵanlar,
Muxaddes háwlilerimde sharabın ishedi».
10Kelińler, kelińler, dárwazalardan shıǵıńlar!
Qaytıp kiyatırǵan xalıqqa jol tayarlańlar.
Biyik etip jol salıńlar!
Taslardı alıp taslańlar!
Xalıqlar ushın bayraq tigińler!
11Jaratqan Iye jerdiń tórt tárepine járiyaladı:
«Qız Sionǵa bılay dep aytıńlar:
„Mine, Qutqarıwshıń kiyatır!
Onıń sıyı janında, inamı aldında!“»
12Turǵınlarıń «Jaratqan Iye qutqarǵan muxaddes xalıq», dep ataladı.
Óziń «Quday izlep tapqan, tárk etilmegen qala», dep atalasań.
Copyright information for
KaaIBT22L