‏ Isaiah 63

Jaratqan Iyeniń qúdireti

1– Edomnan kiyatırǵan,
Qırmızı kiyim kiyip, Bosradan kiyatırǵan bul kim?
Sánli kiyimler kiyip,
Ullı kúsh penen qádem basqan bul kim?

– Ádillik penen sóyleytuǵın,
Qutqarıwǵa kúshim jetetuǵın bul Menmen.

2– Iskenjede júzim sıǵıp atırǵan adamdiki kibi,
Kiyimiń ne ushın qıp-qızıl?

3– Men jalǵız ózim iskenjede júzim sıqtım,
Janımda xalıqlardan hesh biri bolmadı.
Men olardı ashıw menen basqılap,
Ǵázep penen jenishtim.
Olardıń qanı kiyimlerime shashırap,
Pútkil ústi-basımdı ılasladı.
4Men xalqımdı qutqaratuǵın jıl,
Dushpanlarınan ósh alatuǵın kúnim keldi dep uyǵardım.
5Men názer saldım, kómekshi joq edi,
Súyenish bolatuǵın hesh kimniń joqlıǵına hayran qaldım.
Sonda Óz qolım Maǵan jeńis sıyladı,
Óz ǵázebim Meni qolladı.
6Qáhárlenip, xalıqlardı ayaqqa bastım,
Ǵázebim menen olardı más qılıp,
Qanın jerge tóktim.

Miyrim sorap duwa etiw

7Jaratqan Iyeniń súyispenshiligin,
Onıń alǵısqa ılayıqlı islerin,
Bizlerge kórsetken barlıq jaqsılıqların,
Ullı súyispenshiligi hám miyrim-shápááti menen,
Izrail urpaqlarına kórsetken ullı miyrimin eske alaman.
8Jaratqan Iye: «Haslında, olar Meniń xalqım,
Aldamaytuǵın balalarım», – dep,
Olardıń Qutqarıwshısı boldı.
9Olar azap shekkende, Ol qosılıp qıynaldı,
Onnan kelgen perishte olardı azat etti.
Olardı Ol súyispenshiligi hám miyrimi menen qutqardı.
Ázelden olardı qolına kóterip keldi.

10Biraq olar bas kóterip,
Onıń Muxaddes Ruwxın qapa qıldı.
Keyin Ol olardıń dushpanına aylanıp,
Olar menen Ózi urıstı.
11Sonda Onıń xalqı áyyemgi kúnlerin,
Onıń qulı Muwsanıń kúnlerin esledi:
«Olardı Óz súriwiniń shopanları menen birge,
Teńizden ótkergen qayda?
Olarǵa Muxaddes Ruwxın bergen qayda?
12Ullı qolın Muwsanıń oń qolına bergen,
Óziniń atın máńgi dańqqa eristiriw ushın,
Olardıń aldındaǵı suwdı ekige ayırǵan qayda?
13Xalqın teńiz túbinen alıp ótken qayda?»
Quw dalada shapqılaǵan at kibi,
Súrnikpesten ótken edi olar.
14Otlı oypatlıqqa túsip atırǵan pada kibi,
Olar Jaratqan Iyeniń Ruwxınan ráhátlendi.
Óz atıńdı dańqqa eristiriw ushın,
Óz xalqıńdı usılay jeteklep júrdiń.

15Jaratqan Iye, kóklerden qarap,
Ózińniń muxaddes hám dańqlı ornıńnan názer sal!
Seniń qızǵanıshıń hám kúshiń qayda?
Janashırlıǵıń hám miyrimińdi bizden jıraq tuttıń.
16Sen bizlerdiń Ákemizseń!
Ibrayım bizlerdi tán almasa da,
Izrail bizlerdi qabıl almasa da,
Jaratqan Iye, Sen bizlerdiń Ákemizseń,
Ázelden atıń «Ámeńgerimiz» boldı.
17Jaratqan Iye, ne ushın Sen bizlerdi Óz jolıńnan uzaqlastırıp,
Ózińnen qorqpawımız ushın, júreklerimizdi qatallastırdıń?
Óz qullarıń haqı,
Miyrasıń bolǵan urpaqlar haqı izge qayta gór!
18Seniń xalqıń az waqıt muxaddes ornıńdı iyelik etti,
Biraq dushpanlarımız Ibadatxanańdı ayaq astı qıldı.
19Bizler Sen hesh qashan húkimdarlıq qılmaǵan,
Seniń atıń menen atalmaǵan,
Xalıqqa uqsap qaldıq.