Isaiah 64
1Jaratqan Iye, kóklerdi jarıp, tómenge túskenińde edi!Aldıńda tawlar titireser edi!
2Atıńdı dushpanlarǵa tanıt.
Jalınnıń otındı jandırıp, suwdı qaynatqanınday,
Milletlerdi aldıńda qaltırat!
3Bizler kútpegen tań qalarlıq islerdi islegenińde,
Jerge tústiń, aldıńda tawlar titiredi!
4Ózinen úmit etkenler ushın,
Sonday islerdi islegen jalǵız Quday Senseń.
Sennen basqa qudaydı ázelden qulaq ta esitpegen, kóz de kórmegen.
5Tuwrı islerdi shadlıq penen islep,
Seniń jollarıńdı yadında tutqanlardı qarsı alasań.
Biraq bizler gúna isledik, Sen ǵázeplendiń.
Bizler ázelden gúnaǵa batqanbız,
Endi qalay bizler qutqarıla alamız?
6Hámmemiz haram adamday boldıq,
Tuwrı islerimiz de pataslanǵan kiyimge uqsaydı.
Hámmemiz japıraq kibi solıp atırmız,
Gúnalarımız bizdi samalday ushırıp áketip baratır.
7Seniń atıńdı aytıp shaqırǵan,
Saǵan ózin tolıq baǵıshlaǵan hesh kim joq.
Sonlıqtan Sen bizlerden júzińdi jasırıp,
Bizlerdi gúnalarımız húkimine tapsırdıń.
8Sonda da, Jaratqan Iye, Sen bizlerdiń Ákemizseń!
Bizler ılay, Sen – gúlalshımızsań.
Hámmemiz Seniń qolıńnan shıqqanbız.
9Jaratqan Iye, bizge qattı ǵázeplenbe,
Qılmıslarımızdı bárqulla yadta saqlama.
Bizge názer sala gór, jalbarınaman,
Hámmemiz Seniń xalqıńbız.
10Muxaddes qalalarıń shólge aylandı,
Hátte, Sion da shólge aylandı,
Erusalim qańırap bosap qaldı.
11Muxaddes hám dańqlı Ibadatxanamız,
Ata-babalarımız Saǵan maqtaw aytqan orın,
Órtep jiberildi.
Biz qádirlegen nárseler,
Wayran boldı.
12Jaratqan Iye, sonda da,
Ózińdi tutıp tura bereseń be?
Úndemey, bizlerge sheksiz azap bere bereseń be?
Copyright information for
KaaIBT22L