‏ Isaiah 65

Húkim hám qutqarıw

1«Men soramaǵanlarǵa Ózimdi ayan ettim,
Izlemegenler Meni taptı,
Atımdı aytıp shaqırmaǵan milletke:
„Men mındaman, Men mındaman“, – dedim.
2Óz qálewlerine erip,
Nadurıs joldan júrgen,
Qaysar bir xalıqqa,
Kúni boyı qushaǵımdı ashıp turdım.
3Ol xalıq baǵlarda butlarǵa qurbanlıq berip,
Gerbishtiń ústinde tútetki tútetip,
Júzime tik qarap turıp,
Úzliksiz ǵázebimdi keltiredi.
4Olar qábirler arasında otırıp,
Túndi sırlı jerlerde ótkeredi.
Shoshqa góshin jep,
Qazanlarında haram gósh qaynatadı.
5Olar: „Arı tur, maǵan jaqınlama,
Men sen ushın júdá muxaddespen“, – deydi.
Olar murnıma ashshı tútindey bolıp,
Kúni boyı pısqıp janıp turǵan otqa megzeydi.

6Mine, aldımda bılay dep jazılǵan:
Men úndemey qalmayman,
Isine jarasa qaytaraman, sózsiz qaytaraman.
7Olardı ózleriniń hám ata-babalarınıń gúnaları ushın jazalayman,
– deydi Jaratqan Iye. –
Olar tawlarda tútetki tútetti,
Tóbeshiklerde Meni aqıretledi.
Olardıń islegen islerin ólshep, esesin qaytaraman».

8Jaratqan Iye bılay deydi:
«Júzim solqımında ele shire bar gezde,
Birew: „Onı zayalama, bereket sonda ǵoy“, – deydi.
Men de qullarım haqı solay isleymen,
Hámmesin qırıp taslamayman.
9Men Yaqıptan jańa áwlad,
Yahudadan tawlarımnıń miyrasxorların órbitemen.
Tańlaǵanlarım olardı miyras etip,
Qullarım sol jerde jasaydı.
10Meni izlegen xalıq ushın,
Sharon súriwlerine jaylaw,
Axor oypatlıǵı mallarına tınıǵatuǵın orın boladı.

11Biraq sizler, Jaratqan Iyeni tárk etkenler,
Muxaddes tawımdı umıtqanlar,
Tabıs degen qudayǵa dasturxan jayǵanlar,
Táǵdir degen butqa toltırıp sharap quyıp bergenler,
12Men sizlerdiń táǵdirińizge qılıshtı jazaman.
Hámmeńiz qılıshtan qırılasız.
Sebebi shaqırǵanımda, juwap bermedińiz,
Sóylegenimde, qulaq salmadıńız.
Meniń názerimde jawız bolǵan islerdi islep,
Maǵan unamaǵan nárselerdi tańlap isledińiz».

13Sol sebepli Quday Iye bılay deydi:
«Mine, qullarım jeydi, sizler ash qalasız.
Mine, qullarım ishedi, sizler shólleysiz.
Mine, qullarım shadlanadı,
Sizler bolsańız shermende bolasız.
14Mine, qullarımnıń júregi shadlanıp, qosıq aytadı,
Sizler júrek dártinen dad salıp,
Ruwxıy azap penen páriyad etesiz.
15Meniń tańlap alǵanlarım ushın,
Atıńızdı ǵarǵıs sıpatında qaldırasız.
Quday Iye sizlerdi ólimge húkim etip,
Óz qullarına basqa at beredi.
16Elde pátiya bergen hár bir adam,
Haqıyqat Qudayınıń atı menen pátiya beredi,
Elde ant ishken hár bir adam,
Haqıyqat Qudayı haqı ant ishedi.
Burınǵı qapashılıq umıtılıp,
Qaytıp kózime túspeytuǵın boladı».

Jańa aspan hám jańa jer

17«Mine, Men jańa aspan hám jańa jer jarataman.
Burınǵılar endi yadqa alınbas, oyǵa da kelmes.
18Jaratqanlarıma máńgige quwanıp, shadlanıń.
Óytkeni Men Erusalimdi shadlıq ushın,
Xalqın quwanıshqa toltırıw ushın jarataman.
19Ózim de Erusalim ushın quwanıp,
Xalqım ushın shadlanaman.
Endi ol jerde jılaǵan da, dad salǵan da ses esitilmes.
20Endi onda náresteler qaza tappas,
Uzaq ómir súrmegen ǵarrı da bolmas.
Júz jasta ólgen jas sanalar,
Júz jasqa jetpey ólgen ǵarǵıs urǵan esaplanar.
21Olar úyler qurıp, onda jasar,
Júzimzarlar otırǵızıp, miywesin jer.
22Endi olar qurǵan úyde, basqalar jasamas,
Endi olar otırǵızǵan náldiń miywesin basqalar jemes.
Xalqımnıń ómiri tereklerdiń ómirindey uzaq bolar,
Tańlap alǵanlarım óz miynetiniń jemisinen lázzet alar.
23Olar biyhudaǵa miynet etpes,
Apat ushın bala tuwmas.
Olardıń ózleri de, urpaqları da,
Jaratqan Iye jarılqaǵan xalıq bolar.
24Meni shaqırmastan-aq, olarǵa juwap beremen,
Aytpay atırıp, esitemen.
25Qasqır hám qozı birge otlar,
Arıslan ógiz sıyaqlı ot jer,
Al jılan ushın topıraq azıq bolar.
Meniń muxaddes tawımnıń barlıq jerinde,
Hesh kimge zıyan keltirilmes,
Hesh kim joq qılınbas»,
– deydi Jaratqan Iye.