‏ Isaiah 66

Húkim hám úmit

1Jaratqan Iye bılay deydi:
«Kókler – Meniń taxtım,
Jer – Meniń ayaq basarım!
Sonda Maǵan qanday úy qurmaqshısız?
Meniń dem alatuǵın ornım qay jerde boladı?
2Hámmesi Meniń qolım menen jaratılǵan,
Hámmesi Meniki,
– deydi Jaratqan Iye. –

Sonda da Men kishipeyilge, ruwxıy ezilgenge,
Sózimnen qaltıraytuǵınǵa názer salaman.
3Buǵanı qurbanlıqqa shalǵan adam,
Solay islep turıp, adamdı da qurbanlıqqa beredi,
Toqlını qurbanlıqqa shalǵan adam,
Solay islep turıp, iyttiń de moynın úzedi,
Ǵálle sadaqasın bergen adam,
Solay islep turıp, shoshqa qanın da usınadı,
Xosh iyisli tútetki tútetken adam,
Solay islep turıp, butqa da sıyınadı.
Olar óz jolların ózleri tańlap aldı,
Jeksurın islerinen lázzet aladı.
4Men de olar ushın qatal jaza tańlayman,
Ózleri qorqqan nársesin basına salaman.
Óytkeni Men shaqırǵanda, hesh kim juwap bermedi,
Men sóylegende, hesh kim tıńlamadı.
Olar Meniń názerimde jawız bolǵan islerdi islep,
Maǵan lázzet baǵıshlamaytuǵın nárselerdi tańlap aldı».

5Jaratqan Iyeniń sózinen qaltıraytuǵınlar,
Onıń sózine qulaq salıń:
«Sizlerdi jek kóretuǵın,
Meniń atım sebepli quwdalaytuǵın tuwısqanlarıńız:
„Jaratqan Iye ullılansın,
Biz de siziń quwanıshıńızdı kóreyik!“, – deydi.
Biraq olardıń ózleri uyatqa qaladı».

6Mine, qaladan shawqım esitiledi.
Ibadatxanadan dawıs esitiledi.
Dushpanlarına isine ılayıqlı jaza berip atırǵan,
Jaratqan Iyeniń dawısı bul!

7Hayal tolǵatpay-aq, bosanıp,
Qıynalmay-aq, ul tuwdı.
8Usındaydı esitken bar ma?
Usındaydı kórgen bar ma?
El bir kúnde tuwıla ma?
Millet bir máwritte dúnyaǵa kele me?
Biraq Sion tolǵata baslaǵannan-aq,
Ulların tuwıp aladı.
9Tuwıw waqtına deyin ákelip,
Tuwdırmay qoyaman ba?
– deydi Jaratqan Iye. –
Tuwıwǵa kúsh berip bolıp,
Qursaqtı bekitip qoyaman ba?
– deydi Qudayıń.

10Erusalim menen birge shadlanıń,
Onı súygenlerdiń hámmesi ol ushın quwanıń,
Ol ushın aza tutqanlar,
Onıń menen birge shadlanıp, quwanıshqa bóleniń.
11Onıń jubanısh beriwshi emsheklerin emip, toyasız,
Qanıp iship, onıń mol dáwletinen lázzet alasız.

12Jaratqan Iye bılay deydi:
«Mine, Men Sionǵa abadanshılıqtı dáryaday,
Milletlerdiń baylıǵın tolıp aqqan sayday etip aǵızaman.
Ol sizlerdi emizip, qollarına kóterip,
Ayaǵına shayqaydı.
13Ana balasın jubatqanday, Men sizlerdi jubataman.
Sizler Erusalimde jubanısh tabasız».

14Bunı kórgende, júregińiz quwanıshqa tolıp,
Deneńiz maysa shóp kibi gúllep ósedi.
Jaratqan Iyeniń qolı Óz qullarınıń ústinde ekeni ayan boladı,
Al Onıń ǵázebi bolsa, dushpanlarına jawadı.
15Qarań, Jaratqan Iye ot ishinde kiyatır,
Onıń sawash arbaları quyınday,
Kúshli ǵázebin qáhár menen,
Ashıwın lawlaǵan jalınday tógejaq.
16Jaratqan Iye pútkil adamzattı,
Ot hám qılısh penen húkim qıladı.
Jaratqan Iye tárepinen óltiriletuǵınlar kóp boladı.

17«Ózlerin páklep hám tazalap, basshılarına erip butlardıń baǵlarına kirgenler, shoshqa, tıshqan hám sol sıyaqlı haram nárselerdiń góshin jegenler joq etiledi, – deydi Jaratqan Iye.

18Men olardıń islerin de, niyetlerin de bilemen.

Pútkil milletlerdi hám barlıq tillerdi bir jerge jıynaw ushın Men kelemen. Olar kelip, ullılıǵımdı kóredi. 19Men olardıń arasında bir belgi kórsetip, aman qalǵanlarınıń ayırımların milletlerge xızmet etiwge jiberemen. Olar Tarshishke, Pulǵa, sadaqshılardıń eli bolǵan Ludqa, Tubalǵa, Yawanǵa, Men tuwralı esitpegen hám ullılıǵımdı kórmegen alıstaǵı atawlarǵa barıp, ullılıǵımdı milletlerge járiyalaydı. 20Izrail ullarınıń ǵálle sadaqaların hadal ıdıslarda Jaratqan Iyeniń Úyine alıp kelgeni sıyaqlı, olar da barlıq milletler arasınan tuwısqanlarıńızdıń hámmesin toplap, atlarǵa, hár qıylı arbalarǵa, ǵashırlarǵa hám túyelerge mingizip, – deydi Jaratqan Iye, – Meniń muxaddes tawıma, Erusalimge, Jaratqan Iyege sıy retinde alıp keledi. 21Olardıń ayırımların ruwxaniy hám ayırımların lebiyli xızmetker etip tayınlayman, – deydi Jaratqan Iye.

22Men jaratatuǵın jańa aspan hám jańa jer aldımda qansha tursa, – deydi Jaratqan Iye, – sizlerdiń násillerińiz benen atıńız da sonsha turadı. 23Jańa aydan Jańa ayǵa, Shabbattan Shabbatqa pútkil adamlar aldıma kelip, Maǵan sıyınadı, – deydi Jaratqan Iye. 24Sırtqa shıqqanda, Maǵan qarsı bas kótergenlerdiń óli denelerin kóredi. Olardıń denelerin jep atırǵan qurtlar ólmes, olardı jaqqan ot sónbes. Pútkil adamzat olardan jerkenedi».