Isa 7 | KaaIBT22L | STEP | Uzziyanıń aqlıǵı Iotamnıń ulı Axaz Yahudaǵa patshalıq qılǵan dáwirde Aram patshası Resin menen Izrail patshası Remaliya ulı Peqax Erusalimge urıs ashtı, biraq basıp ala almadı.

‏ Isaiah 7

Patsha Axazǵa berilgen belgi

1 Uzziyanıń aqlıǵı Iotamnıń ulı Axaz Yahudaǵa patshalıq qılǵan dáwirde Aram patshası Resin menen Izrail patshası Remaliya ulı Peqax Erusalimge urıs ashtı, biraq basıp ala almadı.

2 Dawıttıń urpaǵı Aramnıń Efrayım ^{▼▼ Efrayım – arqa patshalıq, yaǵnıy Izrail názerde tutılǵan.} menen birleskenin esitkende, Axazdıń hám onıń xalqınıń júregi toǵaydaǵı dawıl terbetken terekler kibi shayqalıp, dirildedi. 3 Sol arada Jaratqan Iye Iyshayaǵa bılay dedi:

– Ulıń Shear-Yashub ^{▼▼ Shear-Yashub – «tiri qalǵanlar qaytadı» degendi bildiredi.} penen birge kir juwıwshınıń atızına baratuǵın joldaǵı, Joqarǵı háwizge suw quyılatuǵın jerge barıp, Axazdı qarsı al. 4 Oǵan bılay dep ayt: «Abaylı bol, tınıshlıq saqla, qorqpa! Pısqıp, shala janıp turǵan eki otın qaldıǵınan – Aram patshası Resinniń hám Remaliyanıń ulınıń lawlaǵan ǵázebinen ruwxıń túspesin. 5 Aram Efrayım hám Remaliyanıń ulı menen saǵan qarsı jaman joba dúzip: 6 „Keliń, Yahudaǵa shabıwıl jasayıq, onı qorqıtıp, basıp alayıq hám Tabeeldiń ulın patsha etip qoyayıq“, – deydi.

7 Biraq Quday Iye bılay deydi:

„Bul ámelge aspaydı,
Júz bermeydi de,
8 Damask tek Aramnıń paytaxtı,
Resin bolsa tek ǵana Damasktiń bası.
Efrayım alpıs bes jıl ishinde xalıq bolıwdan qaladı.
9 Samariya tek Efrayımnıń paytaxtı,
Al Remaliyanıń ulı bolsa tek ǵana Samariyanıń bası.
Eger isenimińizde bekkem turmasańız,
Sizler de hesh qashan bekkem tura almaysız“».

10 Jaratqan Iye Axazǵa qaytadan:

11 – Qudayıń Jaratqan Iyeden belgi sora. Belgi óliler mákanınan tereńde, aspannan biyikte bolsa da soray ber, – dedi.

12 Biraq Axaz:

– Men soramayman, Jaratqan Iyeni sınamayman, – dedi.

13 Sonda Iyshaya bılay dedi:

– Onda tıńlań, háy Dawıttıń urpaqları! Adamlardıń shıdamın sınaǵanıńız az bolǵanday, endi Qudayımnıń da shıdamın sınamaqshımısız? 14 Solay etip, Iyeniń Ózi sizlerge belgi beredi: Mine, qız hámiledar bolıp ul tuwadı. Onıń atın Immanuel ^{▼▼ Immanuel – «Quday bizler menen birge» degendi bildiredi.} dep qoyadı. 15 Ol jamannan qashıp, jaqsını tańlay bilemen degenshe, qatıq iship, pal jeydi. 16 Sebebi bala jamannan qashıp, jaqsını tańlay bilemen degenshe, seni qorqıtqan sol eki patshanıń jeri shólge aylandırıladı. 17 Biraq Jaratqan Iye Assiriya patshası arqalı seniń, xalqıńnıń hám ata-babalarıńnıń urpaqlarınıń basına Efrayımnıń Yahudadan ayırılǵan kúninen beri bolıp kórilmegen awır kúnlerdi saladı.

18 Sol kúni Jaratqan Iye Mısır dáryalarınıń ayaq ushlarındaǵı shıbınlardı hám Assiriya jerlerindegi hárrelerdi ısqırıp shaqıradı. 19 Olar ushıp kelip, dárya jaǵasındaǵı oypatlıqlarǵa, jartaslardıń jarıqlarına, barlıq tikenekli putalarǵa hám barlıq jaylawlarǵa ornalasıp aladı.

20 Sol kúni Iyemiz Evfrat dáryasınıń arǵı jaǵınan jallap alınǵan páki – Assiriya patshası arqalı shashıńızdı, ayaqlarıńızdaǵı túklerdi, hátte, saqallarıńızdı da alıp taslaydı. 21 Sol kún kelgende kim de kim bir qashar hám eki qoydı saqlap qala alsa, 22 olar bergen mol sútten, sol adam qatıq ishedi. Elde qalǵan hár bir adam qatıq iship, pal jeydi.

23 Sol kúni bahası mıń shekel ^{▼▼ Mıń shekel – bir shekel shama menen 11 gr.} gúmiske teń bolǵan mıń júzim náli otırǵızılǵan hár bir baǵdı shat tiken hám jantaq qaplap ketedi. 24 Pútkil eldi tiken hám jantaq qaplap ketkenlikten, adamlar ol jerge oq jay hám oqları menen ańǵa keledi. 25 Bir waqıtları islew berip paydalanǵan tóbeshiklerdiń hesh birine endi tiken hám jantaqlardan qorqıp, bara almaysızlar. Ol jerler sıyır baǵılıp, qoy basqılaytuǵın jerge aylanadı.