Isa 8 | KaaIBT22L | STEP | Jaratqan Iye maǵan: – Úlken bir taxta al da, oǵan anıq etip: «Maher-Shalal-Xash-Baz» dep jaz.

‏ Isaiah 8

Assiriya patshasınıń urısı

1 Jaratqan Iye maǵan:

– Úlken bir taxta al da, oǵan anıq etip: «Maher-Shalal-Xash-Baz» ^{▼▼ Maher-Shalal-Xash-Baz – «asıǵıs tonap, tez oljalaw» degendi bildiredi.} dep jaz. 2 Men ruwxaniy Uriya menen Eberexiya ulı Zexariyanı isenimli gúwalar etip tayınlayman, – dedi.

3 Keyin men payǵambar hayalım menen jattım. Ol hámiledar bolıp, ul tuwdı. Sonda Jaratqan Iye maǵan:

– Atın Maher-Shalal-Xash-Baz qoy. 4 Bala «aǵa, apa» dep aytıp úlgermesten aldın, Assiriya patshası Damasktiń baylıǵın hám Samariyadan tartıp alǵan oljaların alıp ketedi, – dedi.

5 Jaratqan Iye sózin dawam etip maǵan bılay dedi:

6 – Bul xalıq tınısh aǵıp turǵan Shiloax suwlarınan waz keship, Resin hám Remaliyanıń ulına quwandı. 7 Sonlıqtan, Iyeńiz bolǵan Men Evfrattıń mol hám burqasınlaǵan suwın – Assiriya patshasın hám onıń pútkil qúdiretin ústińizge baslap kelmektemen. Ol barlıq kánarlarınan shıǵıp, pútkil jaǵanı basıp ketedi. 8 Suw tasqını Yahudanı basıp, alqımına keledi. Immanuel, onıń jayılǵan qanatları pútkil elińdi qaplaydı!

9 Háy xalıqlar, jıynalıńlar, nabıt bolasızlar! Qulaq túrińler, háy uzaqtaǵı ellerdiń hámmesi! Bellerińizdi buwıńlar, biraq nabıt bolasızlar! Bellerińizdi buwıńlar, biraq nabıt bolasızlar! 10 Birge másláhát qurıń, biraq ol pushqa shıǵadı. Sóz sóyleysiz, biraq ol ámelge aspaydı. Sebebi Quday bizler menen birge!

Jaratqan Iyeniń eskertiwi

11 Jaratqan Iyeniń kúshli qolı ústimde bolıp, bul xalıqtıń jolınan júrmewdi qatań eskertip, maǵan bılay dedi:

12 «Bul xalıqtıń til biriktiriw dep ataǵanınıń hesh qaysısın,
Til biriktiriw dep atamań.
Olar qorqqan nárseden qorqpań, húreyińiz de ushpasın.
13 Álemniń Jaratqan Iyesin muxaddes dep húrmet qılıń.
Onnan qorqıń,
Onnan zárreńiz ushsın,
14 Ol Muxaddesxana boladı.
Biraq Izraildıń eki patshalıǵı ushın,
Ol súrniktiretuǵın tas, jıǵıltatuǵın jartas,
Al Erusalim turǵınları ushın,
Duzaq hám tor boladı.
15 Olardıń kópshiligi súrnigip, jıǵılıp,
Mılja-mılja boladı,
Duzaqqa túsip, tutqın boladı».
16 Bul xabardı jazıp, orap bayla,
Shákirtlerim arasında tálimattı mórlep, olarǵa saqlatqızıp qoy.

17 Men júzin Yaqıptıń urpaqlarınan jasırǵan,
Jaratqan Iyeni kútemen,
Úmitim tek Onnan.

18 Minekey, men hám Jaratqan Iye maǵan bergen balaları menen birge usı jerdemen. Bizler Sion tawında mákan qurǵan Álemniń Jaratqan Iyesiniń Izraildaǵı nıshanı hám belgisimiz.

19 Birewler sizlerge: «Sıbırlap hám sandıraqlap árwaqlardı hám ruwxlardı shaqırıwshılardan sorań. Xalıq óz qudaylarınan sorawı kerek emes pe? Tiriler ushın ólilerden soraw kerek emes pe?» – deydi. 20 Qudaydıń tálimatına hám xabarına júz burıń! Eger kim de kim bularǵa say sóylemese, ol jerde tań nurı bolmaydı. 21 Ol ash hám ábiger bolıp jer beti boylap, posıp júredi. Olar ash bolǵanda, ǵázeplenip, óz patshasın hám óz Qudayın náletleydi. Olar joqarıǵa qarasa da, 22 jerge qarasa da, tilekke qarsı, tek qayǵı-hásiret, qarańǵılıq hám qorqınıshlı túnekti kóredi hám qoyıw qarańǵılıqqa shúmip ketedi.