‏ Isaiah 9

Tınıshlıq patshası

1Degen menen, qayǵı ishindegiler qoyıw qarańǵılıqta bolmaydı. Burın Iyemiz Zebulon jeri menen Naftaliy jerin masqara qılǵan edi, al keleshekte Iordannıń arǵı jaǵasındaǵı teńizge baratuǵın joldaǵı basqa milletler jasaytuǵın Galilanı dańqqa bóleydi.

2Túnekte júrgen bul xalıq,
Ullı nurdı kórdi,
Tereń qarańǵılıq elinde jasaǵanlardıń,
Ústine nur shashıldı.
3Jaratqan Iye, Sen milletlerdi kóbeyttiń,
Olardıń quwanıshın arttırdıń.
Olar jıyın-terim waqtında quwanǵanday,
Olja bólisip atırǵanda shadlanǵanday,
Seniń aldıńda quwanıshqa bólenedi.
4Midyanlardı jeńgen kúndegi sıyaqlı, ▼

▼ Biy 7:1-25.

Sen olardıń awır moyıntırıǵın,
Jawırınına tiyetuǵın juwan tayaqtı,
Eziwshilerdiń qolındaǵı qamshını sındırdıń.
5Áskerlerdiń sawashta kiygen etikleri,
Qanǵa bılǵanǵan barlıq kiyimleri,
Jaǵıp jiberilip, otqa jem boladı.
6Sebebi bizler ushın bir náreste tuwıldı,
Bir ul inam etildi!
Húkimdarlıq onıń jelkesine júklenedi,
Onıń atı: Ájayıp Másláhátshi, Kúshli Quday,
Máńgilik Áke, Paraxatshılıq Kósemi boladı.
7Onıń húkimdarlıǵı tınımsız ósip,
Tınıshlıq sheksiz húkim súredi.
Ol Dawıttıń taxtına otırıp,
Onıń patshalıǵında húkimdarlıq etedi.
Házirden baslap máńgige,
Ádalatlıq hám tuwrılıq penen,
Patshalıqtı tastıyıqlap, bekkemleydi,
Álemniń Jaratqan Iyesi jan kúydirip,
Bunı iske asıradı.

Jaratqan Iyeniń Izrailǵa qarsı ǵázebi

8Iyemiz Yaqıpqa qarsı sóz jiberdi,
Ol Izrailǵa kelip tústi.
9Pútkil xalıq – Efrayım hám Samariya turǵınları bunı bildi.
Biraq olar menmenlik hám tákabbirlik penen bılay deydi:
10«Gerbish penen salınǵan úyler quladı,
Ornına jonılǵan taslardan úy quramız,
Jabayı ánjir aǵashları kesip taslandı,
Ornına kedr aǵashların tigemiz».
11Solay etip, Jaratqan Iye Resinniń dushpanların,
Olarǵa qarsı qozǵap,
Dushpanlardı háreketke keltirdi.
12Shıǵıstan aramlar, batıstan filistler,
Awzın ashıp, Izraildı jutıp jiberdi.
Biraq, sonda da Jaratqan Iyeniń ǵázebi basılmas,
Qolı kóteriliwin dawam eter.

13Xalıq ózlerin jazalaǵanǵa júz burmadı,
Álemniń Jaratqan Iyesin izlemedi.
14Sonlıqtan Jaratqan Iye Izraildıń basın da, quyrıǵın da,
Palma aǵashlarınıń shaqaların da, qamısın da,
Bir kúnde kesip taslaydı.
15Aqsaqallar hám abıraylı adamlar – bul bas,
Jalǵan payǵambarlar – bul quyrıq.
16Jol kórsetkenler bul xalıqtı adastırdı,
Olarǵa ergenler bası berik kóshege kirip qaldı.
17Sonlıqtan Iyemiz olardıń jasları ushın quwanbas,
Jetim hám jesirine janı ashımas.
Sebebi hár biri qudaysız hám jawız,
Hámmesiniń awzınan aqmaq sóz shıǵar.
Biraq, sonda da, Jaratqan Iyeniń ǵázebi basılmas,
Qolı kóteriliwin dawam eter.

18Jawızlıq ot kibi janıp,
Tiken hám jantaqlardı jalmap jiberer,
Toǵaydaǵı qalıń aǵashlardı ot alıp,
Tútin sútin bolıp álaspanǵa kóteriler.
19Álemniń Jaratqan Iyesiniń ǵázebinen jer janar,
Adamlar ot ushın otın bolıp,
Hesh kim tuwısqanın ayamas.
20Olar oń tárepten tutıp jer, biraq ashlıǵı basılmas,
Shep tárepten alıp jer, biraq qarnı toymas.
Hár kim óz jaqınınıń etin jer.
21Menashshe Efrayımnıń,
Efrayım Menashsheniń etin jer,
Keyin ekewi birigip, Yahudaǵa hújim eter.
Biraq, sonda da Jaratqan Iyeniń ǵázebi basılmas,
Qolı kóteriliwin dawam eter.