‏ James 1

Sálemnama

1Men, Qudaydıń hám Iyemiz Iysa Masiyxtıń qulı Yaqıptan, jer júzine tarqalıp ketken Qudaydıń xalqına sálem!

Sınaw hám azǵırıw

2Tuwısqanlarım, túrli sınawlarǵa ushıraǵanıńızda onı úlken quwanısh penen qabıl etińler. 3Sebebi isenimińizdiń sınalıwınan sabırlılıq payda bolatuǵının bilesizler. 4Hesh bir kemshiliksiz, jetilisken hám minsiz adamlar bolıwıńız ushın tolıq sabırlılıq etińler. 5Eger arańızdaǵı birińizdiń danalıǵı kem bolsa, hámmege saqıylıq penen, ayıplamay beretuǵın Qudaydan sorasın. Quday oǵan beredi. 6Biraq hesh gúmanlanbastan, isenim menen sorasın. Óytkeni gúmanlanǵan adam samal menen shayqatılıp tınıshsızlanǵan teńiz tolqınına uqsaydı. 7– 8Óziniń pútkil jollarında turaqsız bolǵan, bunday eki oylı adam Iyemizden bir nárse alaman, dep oylamasın.

Tómen jasaytuǵın tuwısqan hám bay tuwısqan

9Tómen jasaytuǵın tuwısqan Qudaydıń ózine bergen mártebesi menen maqtansın. 10Al bay tuwısqan óz pásligi menen maqtansın. Sebebi bay adam daladaǵı gúl sıyaqlı solıp qaladı. 11Quyash shıǵıp, jáziyrama ıssısı menen shópti quwratıp taslaydı. Onıń gúli tógilip, kórkiniń gózzallıǵı joǵaladı. Bay adam da usılay óz isleri menen solıp joq boladı.

Sınaw baxıt alıp keledi

12Sınawǵa shıdaǵan adam baxıtlı! Óytkeni ol sınawdan ótkennen soń, Qudaydıń Ózin súyetuǵınlarǵa wáde etken ómir tajın aladı.

13Azǵırılıwǵa túskende hesh kim: «Men Quday tárepinen azǵırılıp atırman», – demesin. Sebebi Quday jamanlıq penen azǵırıla almaydı hám Onıń Ózi de hesh kimdi azǵırmaydı. 14Biraq hár kim óziniń jaman qálewlerine berilip, aldanıp azǵırıladı. 15Keyin sol qálew hámiledar bolıp, gúnanı tuwadı. Al gúna jetilisip, ólimdi tuwadı.

16Súyikli tuwısqanlarım, aldanbańlar! 17Hár qanday jaqsı hám minsiz sıy joqarıdan, nurlar Ákesi bolǵan Qudaydan keledi. Onda hesh qanday ózgeris yamasa ózgeriwshi kóleńke joq. 18Onıń jaratqanlarınıń arasında birinshi miyweleri bolıwımız ushın, Ol Óz qálewi boyınsha bizlerdi haqıyqat sózi menen ómirge eristirdi.

Tıńlaw hám orınlaw

19Súyikli tuwısqanlarım, mınanı este saqlańlar: hár bir adam esitiwde shaqqan, sóylewde aqırın, ǵázepleniwde de aqırın bolsın. 20Óytkeni adamnıń ǵázebi Qudaydıń talap etken haqlıǵın iske asıra almaydı. 21Sonlıqtan hár qanday iplaslıqtı hám tasıp baratırǵan jamanlıqtı taslap, ózlerińizde egilgen, janlarıńızdı qutqara alatuǵın Qudaydıń sózin kishipeyillik penen qabıl etińler.

22Sózdi tek tıńlawshılar bolıp, óz-ózińizdi aldamańlar, onı orınlawshılar bolıńlar. 23Eger kim de kim sózdi tıńlap, onı orınlamasa, ol óz tábiyǵıy kelbetin aynada kórgen adamǵa uqsaydı. 24Sebebi ol ózin kórip bolıp, ketip qaladı hám qanday ekenin dárhal umıtadı. 25Biraq azatlıq beriwshi minsiz nızamǵa anıqlap qaraytuǵın hám ol boyınsha jasaytuǵın adam umıtshaq tıńlawshı bolmay, onı is júzinde qollanadı. Bunday adam óz isleri menen baxıtlı boladı.

26Ózin dinshil dep esaplap, tilin tıymaǵan adam ózin ózi aldaǵan boladı. Onıń dinshilligi bos. 27Ákemiz Qudaydıń aldında pák hám qátesiz dinshillik bul – jetim-jesirlerge qıyın kúnlerinde járdem etip, ózin dúnyanıń napákliklerinen saqlaw.