Jam 2 | KaaIBT22L | STEP | Tuwısqanlarım, ullı Iyemiz Iysa Masiyxqa isenimi bar sizler adamlardı alalamańlar.

‏ James 2

Adamlardı alalamańlar

1 Tuwısqanlarım, ullı Iyemiz Iysa Masiyxqa isenimi bar sizler adamlardı alalamańlar. 2 Eger sizlerdiń jıynalısıńızǵa altın júzikli, sánli kiyimler kiygen bir adam menen jupını kiyim kiygen bir jarlı adam kelse, 3 sizler sánli kiyim kiygen adamǵa húrmet kórsetip: «Siz bul jerge, jaqsı jerge otırıń», al jarlı adamǵa bolsa: «Sen ana jerde tur» yamasa: «Ayaq betimde otır» deseńler, 4 arańızda alalıq jasap, jaman niyetli húkim shıǵarıwshılar bolıp qalmaysızlar ma?

5 Qulaq salıńlar, súyikli tuwısqanlarım: Quday bul dúnyada jarlı bolǵanlardı isenimde bay bolıwı hám Ózin súygenlerge wáde etken Patshalıǵınıń miyrasxorları bolıwı ushın tańlamadı ma? 6 Biraq sizler jarlını biyabıray qıldıńız-ǵo. Sizlerge zulımlıq jasap atırǵan baylar emes pe? Sizlerdi qazıxanalarǵa súyrep aparatuǵın da baylar emes pe? 7 Sizlerge berilgen qádirli attı mazaq qılıwshılar da olar emes pe?

8 Muxaddes Jazıwdaǵı: «Ózińdi súygeniń sıyaqlı, janıńdaǵı adamdı da súy» ^{▼▼ Leb 19:18.}, – degen baslı nızamdı haqıyqattan orınlasańlar, jaqsı qılasızlar. 9 Biraq adamlardı alalasańlar, gúna islep atırǵan bolasızlar hám Muxaddes Nızam aldında jınayatshı sıpatında jazalanasızlar. 10 Óytkeni kim de kim Muxaddes Nızamdı tolıǵı menen orınlap, tek bir nársede ayıplı bolsa, ol pútkil Muxaddes Nızamǵa qarsı gúnakar boladı. 11 Sebebi «Neke hadallıǵın buzba» ^{▼▼ Shıǵ 20:14; Nzm 5:18.}, – degen Quday, «Adam óltirme» ^{▼▼ Shıǵ 20:13; Nzm 5:17.}, – de degen. Eger sen neke hadallıǵın buzbasań da, biraq adam óltirseń, Muxaddes Nızamǵa qarsı jınayatshı bolasań. 12 Azatlıq beriwshi nızam boyınsha húkim etiletuǵınlar sıyaqlı sóyleńler hám is tutıńlar. 13 Óytkeni húkim – rehimsiz adamǵa rehimsiz. Al rehim húkimnen ústin.

Isenim hám isler

14 Tuwısqanlarım, eger kim de kim isenimi barlıǵın aytıp, jaqsı isler qılmasa, ne paydası bar? Bunday isenim onı qutqara ala ma? 15 Eger bir tuwısqanımız jalańash qalıp, kúndelik azıǵına zar bolsa, 16 arańızdaǵı birińiz olarǵa: «Aman-esen barıń, jılınıń hám toyıń» dese, biraq denesine kerekli zatlar bermese, bunnan ne payda? 17 Sol sıyaqlı, islersiz isenim de óz-ózinen óli. 18 Biraq birew: «Seniń isenimiń bar, meniń islerim bar. Maǵan islersiz isenimińdi kórset, al men saǵan isenimimdi islerim arqalı kórseteyin», – deydi. 19 Sen Qudaydıń jalǵız ekenine iseneseń be? Jaqsı qılasań. Jinler de buǵan isenip, qaltırasadı. 20 Háy, aqılsız adam, islersiz isenimińniń paydasız ekenin biliwdi qáleyseń be? 21 Babamız Ibrayım ulı Ísaqtı qurbanlıq orınǵa baǵıshlap ^{▼▼ Jar 22:1-18.}, isleri menen aqlanbadı ma? 22 Kórip turǵanıńday, isenimi onıń isleri menen háreket etti. Isenimi isleri menen kámal taptı. 23 Solay etip, «Ibrayım Qudayǵa isendi hám sol sebepten Quday onı haq dep sanadı» ^{▼▼ Jar 15:6.}, – dep jazılǵan Muxaddes Jazıw orınlanıp, ol Qudaydıń dostı ^{▼▼ Iysh 41:8; 2Jln 20:7.} dep ataldı. 24 Kórip tursızlar, adam tek isenimi menen emes, isleri menen aqlanadı. 25 Sol sıyaqlı, jansızlardı qabıl etip, olardı basqa joldan jibergen buzıq hayal Raxab ^{▼▼ Eshu 6:21-24.} ta óz isleri menen aqlanbadı ma? 26 Ruwxsız dene óli bolǵanı sıyaqlı, islersiz isenim de óli.