Jam 3 | KaaIBT22L | STEP | Tuwısqanlarım, kóplerińiz muǵallim bola bermeńler. Sebebi bizlerdiń, muǵallimlerdiń qatań húkim qılınatuǵınımızdı bilesizler.

‏ James 3

Tildi tıyıw haqqında

1 Tuwısqanlarım, kóplerińiz muǵallim bola bermeńler. Sebebi bizlerdiń, muǵallimlerdiń qatań húkim qılınatuǵınımızdı bilesizler. 2 Hámmemiz kóp qáte isleymiz. Eger kim de kim sóylegende qáte qılmasa, ol pútkil denesin boysındıra alatuǵın minsiz adam bolǵanı.

3 Bizlerge boysınıwı ushın, atlardıń awızlarına suwlıq salıp, olardıń pútkil denesin basqara alamız. 4 Kemeler de sonshelli úlken bolıp, kúshli samallar menen júrse de, kemeshiniń qálegen jerine júdá kishkene rul menen burıladı. 5 Sol sıyaqlı, til de deneniń kishkene bir múshesi bolsa da, kóp maqtanadı. Kishkene bir ushqın sonshelli úlken toǵaydı jandırıp jibere aladı. 6 Til – bul ot, denemizdiń músheleri arasında bir jamanlıq dúnyası. Ol pútkil denemizdi iplaslaydı hám ómirimizdi jandıradı. Onıń ózi de dozaq otında janadı.

7 Hár túrli haywanlar, quslar, jer bawırlawshılar hám teńiz janıwarları adam tárepinen qolǵa úyretilgen hám qolǵa úyretilmekte. 8 Biraq tildi hesh bir adam boysındıra almaydı. Ol toqtatıp bolmaytuǵın jamanlıq bolıp, óltiriwshi záhárge tolı.

9 Tilimiz benen Jaratqan Iyeni hám Ákeni alǵıslaymız. Sol tilimiz benen Qudayǵa uqsatıp jaratılǵan adamlardı ǵarǵaymız da. 10 Bir awızdan hám maqtaw, hám ǵarǵıs shıǵadı. Tuwısqanlarım, bunday bolmawı kerek. 11 Bir bulaqtan hám dushshı, hám ashshı suw shıǵa ma? 12 Tuwısqanlarım! Ánjir aǵashı záytún yamasa júzim aǵashı ánjir bere ala ma? Ashshı bulaq ta dushshı suw bere almaydı.

Joqarıdan túsken danalıq

13 Arańızda dana hám túsimpaz adam kim? Bunday adam óz danalıǵın jaqsı júris-turısı arqalı kórsetip, kishipeyillik penen jaqsı isler islewi tiyis. 14 Biraq eger júregińizde ashshı kúnshillik hám menmenlik bar bolsa, onda maqtanbańlar, haqıyqatqa qarsı jalǵan sóylemeńler. 15 Bunday «danalıq» joqarıdan túspegen. Bunday «danalıq» dúnyadan, adam tábiyatınan, shaytannan. 16 Óytkeni qay jerde kúnshillik hám menmenlik bar bolsa, sol jerde tártipsizlik hám hár túrli jamanlıq boladı.

17 Biraq joqarıdan túsken danalıq birinshiden pák, sońınan tatıw, múláyim, boysınıwshı, miyrim-shápáátke hám jaqsı jemislerge tolı. Ol ádalatsız hám eki júzli emes. 18 Tınıshlıq penen tuqım sewip, tınıshlıq ornatıwshılar haqlıq jemisin jıynap aladı.