Jam 4 | KaaIBT22L | STEP | Arańızdaǵı urıs hám jánjeller qayaqtan kelip shıǵadı? Denelerińizdiń múshelerinde urısıp atırǵan qálewlerińizden emes pe?

‏ James 4

Dúnya menen dos bolıwdan awlaq bolıńlar!

1 Arańızdaǵı urıs hám jánjeller qayaqtan kelip shıǵadı? Denelerińizdiń múshelerinde urısıp atırǵan qálewlerińizden emes pe? 2 Bir nárseni qáleysizler, biraq erise almaysızlar. Sonlıqtan adam óltiresizler. Kúnshillik etesizler, biraq qálegenińizge erise almaǵanlıqtan, jánjellesip urısasızlar. Sizler Qudaydan soramaǵanıńız ushın, almay atırsızlar. 3 Sorasańız da almay atırsızlar. Sebebi jaman niyet penen, óz nápsińizge paydalanıw ushın sorap atırsızlar.

4 Háy, opasızlar! Dúnya menen dos bolıwdıń Qudayǵa dushpanlıq ekenin bilmeysizler me? Dúnyanıń dostı bolıwdı qálegen adam ózin Qudayǵa dushpan qıladı. 5 Muxaddes Jazıwda: «Quday Ózi bizlerge bergen jandı qızǵanısh penen jaqsı kóredi», – dep bosqa aytılǵan dep oylaysızlar ma? 6 Degen menen, Qudaydıń bizlerge beretuǵın miyrimi jáne de ullıraq. Sonlıqtan Muxaddes Jazıwda: «Quday menmenlerge qarsı turadı,
Biraq kishipeyillilerge Óz miyrimin beredi» ^{▼▼ Hkm 3:34.}, –

delingen.

7 Solay etip, Qudayǵa boysınıńlar! Shaytanǵa qarsı turıńlar, sonda ol sizlerden qashıp ketedi. 8 Qudayǵa jaqınlasıńlar, sonda Ol da sizlerge jaqınlasadı. Háy, gúnakarlar, qollarıńızdı gúnadan tazalańlar! Háy, eki oylılar, júreklerińizdi pákleńler! 9 Qayǵırıńlar, aza tutıp, jılańlar! Kúlkińiz azaǵa, quwanıshıńız qayǵıǵa aylansın. 10 Jaratqan Iyeniń aldında ózlerińizdi pás tutıńlar, Ol sizlerdi mártebeli qıladı.

Bir-birińizdi jamanlamańlar!

11 Tuwısqanlarım, bir-birińizdi jamanlamańlar! Óz tuwısqanın jamanlaytuǵın yamasa húkim etetuǵın adam Muxaddes Nızamǵa qarsı sóylep, onı húkim etken boladı. Eger sen Muxaddes Nızamdı húkim etseń, onda Muxaddes Nızamdı orınlawshı emes, al onı húkim etiwshi bolasań. 12 Nızam shıǵarıwshı hám húkim etiwshi – jalǵız Quday. Tek ǵana Ol qutqarıwǵa hám nabıt qılıwǵa qúdiretli. Al tuwısqanıńdı húkim etetuǵınday, sen kim bolıpsań?

Maqtanshaqlıq haqqında

13 Endi «Búgin yamasa erteń pálen qalaǵa ketemiz, ol jerde bir jıl qalıp, sawda-satıq islep, payda kóremiz», – deytuǵınlar, tıńlańlar! 14 Sizler erteń ne bolatuǵının bilmeysizler. Ómirińizdiń ózi ne? Ol az waqıt kórinip, keyin joq bolatuǵın puw. 15 Onıń ornına: «Eger Jaratqan Iye qálese, jasaymız hám mınanı ya ananı isleymiz», – dep aytıwıńız tiyis. 16 Biraq sizler menmensip maqtanasızlar. Hár qanday maqtanshaqlıq – jawızlıq. 17 Solay etip, kim de kim jaqsılıq islewdi bilse de, onı islemese, gúna qılǵan boladı.