Jam 5 | KaaIBT22L | STEP | Tıńlańlar endi, háy baylar, basıńızǵa túsetuǵın baxıtsızlıqlar sebepli ókirip jılańlar!

‏ James 5

Baylarǵa eskertiw

1 Tıńlańlar endi, háy baylar, basıńızǵa túsetuǵın baxıtsızlıqlar sebepli ókirip jılańlar! 2 Baylıǵıńız shirip, kiyimlerińizdi kúye jegen. 3 Altın hám gúmislerińiz tat basqan. Olardıń tatı sizlerge qarsı gúwalıq berip, deneńizdi ot sıyaqlı jeydi. Sizler bul aqırǵı kúnlerde de baylıq ústine baylıq jıynadıńlar.

4 Sizler eginlerińizdi orǵan jumısshılardıń is haqısın jep qoydıńlar. Mine, sol oraqshılardıń dadı Álemniń Jaratqan Iyesiniń qulaǵına jetti. 5 Sizler jer júzinde molshılıqta jasap, káypi-sapa ettińler. Bawızlanatuǵın kúnde ózlerińizdi semirttińler. 6 Sizler ózlerińizge qarsı turmaǵan haq adamlardı húkim etip óltirdińler.

Sabırlı bolıńlar!

7 Solay etip, tuwısqanlarım, Iyemiz kelgenshe, sabırlı bolıńlar! Áne, diyxan sabırlılıq etip, birinshi hám sońǵı jawınlar jawǵansha, jerdiń qımbatlı zúráátin kútip atır. 8 Sizler de sabırlı bolıp, bekkem turıńlar! Óytkeni Iyemizdiń keletuǵın waqtı jaqın. 9 Tuwısqanlar, húkim etilmewińiz ushın bir-birińizge qarsı narazılıq bildirmeńler. Mine, húkim etiwshi Iyemiz qapı aldında tur.

10 Tuwısqanlar, Jaratqan Iyeniń atınan sóylegen payǵambarlardıń qıyınshılıqlarda sabırlılıq etkeninen órnek alıńlar. 11 Sabırlılıq etkenlerdi bizler baxıtlı dep esaplaymız. Sizler Ayuptıń sabırlılıǵı haqqında esittińler. Sońında Jaratqan Iyeniń ol ushın neler islegenin de bilesizler ^{▼▼ Ayup 1:21-22; 42:10-16.}. Iyemiz júdá miyrim-shápáátli hám rehimli.

12 Háy, tuwısqanlarım! Eń baslısı, ant ishpeńler. Ya aspan menen, ya jer menen, ya basqa nárse menen ant ishpeńler. Tek «awa» ńız awa, «yaǵ» ıńız yaq bolsın. Sonda húkim etilmeysizler.

Isenim menen etilgen duwa

13 Arańızda azap shegip atırǵan bar ma? Ol duwa etsin. Ruwxı kóterińki adam bar ma? Ol Qudayǵa alǵıs-maqtaw qosıǵın aytsın. 14 Arańızda awırıw adam bar ma? Ol iseniwshiler jámáátiniń aqsaqalların shaqırsın. Olar Iyemizdiń atı menen onı may menen sılap, ol ushın duwa etsin. 15 Isenim menen etilgen duwa awırıwǵa shıpa beredi hám Iyemiz onı ayaqqa turǵızadı. Eger ol gúna islegen bolsa, gúnası keshiriledi. 16 Solay etip, shıpa tabıwıńız ushın, bir-birińizdiń aldıńızda gúnalarıńızdı moyınlańlar hám bir-birińiz ushın duwa etińler. Haq adamnıń duwası júdá kúshli tásirge iye.

17 Iliyas ta bizler sıyaqlı bir adam edi. Jawın jawmasın dep, ol kúshli duwa etkende, jerge úsh jıl, altı ay jawın jawmadı. 18 Ol jáne duwa etti. Sonda aspannan jawın jawıp, jer ónim berdi ^{▼▼ 3Pat 17:1; 18:41-45.}.

19 Tuwısqanlarım! Arańızda bir adam haqıyqat jolınan adassa, birińiz onı haqıyqatqa qaytarsa, 20 bilsin, bir gúnakardı nadurıs joldan qaytarǵan adam bir jandı ólimnen qutqarǵan hám kóp gúnalardı juwǵan boladı.