Jer 1 | KaaIBT22L | STEP | Bular Benyamin jerindegi Anatot qalasında jasaytuǵın ruwxaniylerdiń biri Xilkiya ulı Eremiyanıń sózleri.

‏ Jeremiah 1

1 Bular Benyamin jerindegi Anatot qalasında jasaytuǵın ruwxaniylerdiń biri Xilkiya ulı Eremiyanıń sózleri. 2 Yahuda patshası Amon ulı Ioshiyanıń húkimdarlıǵınıń on úshinshi jılında Eremiyaǵa Jaratqan Iyeden sóz tústi. 3 Eremiyaǵa Jaratqan Iyeniń sóziniń túsiwi Yahuda patshası Ioshiyanıń ulı Ehoyakinniń dáwirinen, Yahuda patshası Ioshiya ulı Sedekiyanıń patshalıǵınıń on birinshi jılınıń besinshi ayına deyin, yaǵnıy Erusalim xalqınıń súrgin etip alıp ketiliwine deyin dawam etti.

Eremiyanıń shaqırılıwı

4 Maǵan Jaratqan Iyeden mınaday sóz tústi:

5 – Men seni jatırda payda etpesimnen aldın tanıdım,
Qursaqtan shıqpasıńnan aldın seni tańladım.
Seni milletler ushın payǵambar etip tayınladım.

6 Sonda men:

– Haw, Quday Iye! Men qalay sóylewdi bilmeymen, júdá jaspan, – dedim.

7 Biraq Jaratqan Iye maǵan bılay dedi:

– «Men jaspan», – deme. Seni kimge jibersem, hámmesine barasań, ne buyırsam, sonı aytasań. 8 Olardan qorqpa, seniń menen birge bolıp, seni qutqaraman, – dedi Jaratqan Iye.

9 Keyin Jaratqan Iye qolın sozıp, awzıma tiygizdi de maǵan bılay dedi:

– Mine, sózlerimdi awzıńa saldım. 10 Qara, suwırıp taslaw, qırıw, joq qılıw, jer menen jeksen qılıw ushın, sonday-aq qurıw, bekkemlew ushın, búgin Men seni milletler hám patshalıqlar ústinen qoydım.

11 Maǵan Jaratqan Iyeden sóz tústi. Ol:

– Eremiya, sen neni kórip tursań? – dedi.

– Badam aǵashınıń shaqasın kórip turman, – dep juwap berdim men.

12 – Tuwrı kórdiń, – dedi Jaratqan Iye maǵan. – Sebebi Men hár bir sózimniń orınlanıwın baqlap turaman.

13 Maǵan jáne Jaratqan Iyeden sóz tústi. Ol:

– Neni kórip tursań? – dedi.

– Arqa tárepten júzi bir tárepke qıysayıp qaynap turǵan qazandı kórip turman, – dep juwap berdim men.

14 Sonda Jaratqan Iye maǵan bılay dedi:

– Bul jerdiń barlıq turǵınlarına arqa tárepten apatshılıq keledi. 15 Men arqadaǵı patshalıqlardıń barlıq qáwimlerin shaqıraman, – dedi Jaratqan Iye.

– Olardıń patshaları kelip,
Óz taxtların Erusalim dárwazalarınıń kirer awzına,
Onı qorshap turǵan diywallardıń,
Yahudanıń pútkil qalalarınıń aldına qoyadı.
16 Xalqımnıń Mennen júz burıp,
Islegen barlıq jawızlıqları ushın,
Basqa qudaylarǵa tútetki tútetip,
Óz qolları menen islegen nárselerine tabınǵanı ushın,
Men olarǵa qarsı Óz húkimimdi járiyalayman.

17 Sen bolsań, belińdi bekkem buw. Barıp, Meniń saǵan buyırǵanlarımnıń hámmesin olarǵa ayt. Olardan qorqpa, bolmasa Men seni olardıń aldında qorqıwǵa salaman. 18 Búgin Men seni pútkil elge – Yahuda patshalarına, onıń xızmetkerlerine, ruwxaniylerine hám sol jerdiń xalqına qarsı bekkem qala, temir sútin hám qola diywal qıldım. 19 Olar saǵan qarsı urısadı, biraq jeńe almaydı. Sebebi seni qutqarıw ushın Men seniń menen birgemen, – dedi Jaratqan Iye.