‏ Jeremiah 10

Haqıyqıy Quday hám butlar

1Háy, Izrail xalqı, Jaratqan Iyeniń sizlerge aytıp atırǵan sózlerin tıńlań! 2Jaratqan Iye bılay deydi:

«Milletlerdiń jolların úyrenbeń,
Basqa milletler qorqqanı sıyaqlı,
Aspan belgilerinen qorqpań.
3Xalıqlardıń dástúrleri paydasız.
Olar toǵaydan aǵash kesip alıp,
Ustanıń quralı menen oǵan pishim beredi.
4Onı gúmis hám altın menen bezeydi,
Jıǵılıp ketpesin dep,
Shege menen shókkishlep qaǵıp qoyadı.
5Bul butlar palız atızındaǵı qaraqshıǵa uqsaydı,
Sóyley almaydı,
Kóterip júriw kerek,
Ózleri júre almaydı.
Olardan qorqpań,
Olardıń qolınan jamanlıq islew de,
Jaqsılıq islew de kelmeydi».

6Jaratqan Iye, Saǵan uqsaǵanı joq!
Sen ullısań, atıń da qúdiretke iye!
7Milletler Patshası, Sennen qorqpaytuǵın kim bar?
Sen buǵan ılayıqlısań.
Milletlerdiń barlıq danıshpanları,
Barlıq patshalıqları arasında,
Saǵan uqsaǵanı joq.
8Bul xalıqlar aqmaq hám aqılsız.
Jansız aǵashtan tálim aladı.
9Tarshishten shókkishlep tegislengen gúmis,
Ufazdan altın alıp kelinedi.
Usta hám zerger islegen nársege,
Qızǵısh kók hám shım qızıl kiyim kiygizedi.
Hámmesi sheber ónermentlerdiń isi.
10Biraq Jaratqan Iye – haqıyqıy Quday,
Ol tiri Quday hám máńgilik Patsha.
Ol qáhárlense, jer titireydi,
Milletler Onıń ǵázebine shıdam bere almaydı.

11Butqa sıyınatuǵın xalıqlarǵa bılay dep aytıńlar:
«Jer hám aspandı jaratpaǵan qudaylar,
Jer betinen hám aspan astınan joq boladı».

12Ol Óz qúdireti menen jerdi jarattı,
Danalıǵı menen dúnyanı qurdı,
Aqılı menen kóklerdi jaydı.
13Ol gúrkiregende, kóktegi suwlar shuwıldaydı,
Ol jerdiń tórt tárepinen bultlardı kóteredi.
Jawın jawdırıw ushın shaqmaq shaqtırıp,
Saqlap qoyǵan jerinen samal estiredi.
14Hámme adam aqmaq hám bilimsiz,
Hár bir zerger soqqan butları sebepli uyatqa qaladı,
Olardıń músinleri qoldan soǵılǵan, olarda jan joq.
15Olar paydasız, masqarapazdıń isi,
Jazalaǵan waqıtta-aq joq boladı.
16Biraq Yaqıptıń Qudayı olarǵa uqsamaydı,
Ol – pútkil barlıqtı jaratqan Quday.
Izrail urıwı – Onıń miyrası,
Onıń atı – Álemniń Jaratqan Iyesi.

Apatshılıqtıń keliwi

17Qamalda jasaǵanlar,
Barı-joǵıńızdı jıynań!
18Óytkeni Jaratqan Iye bılay deydi:
«Mine, endi bul jerdiń turǵınların ılaqtırıp taslayman.
Tawıp alıwı ushın,
Olardı tar jerge quwıp alıp baraman».

19Sorım qurısın, sorlap qaldım!
Jaraqatım awır! Biraq men ózime:
«Basımda bul dárt te bar eken,
Shıdawım kerek», – dedim.
20Shatırım quladı, úzildi barlıq jipleri,
Balalarım taslap ketti, endi olar joq.
Shatırımdı qayta tigetuǵın,
Perdelerin taǵatuǵın hesh kim joq.
21Shopanlar aqıldan adastı,
Jaratqan Iyeden másláhát soramadı.
Sonlıqtan isleri ońınan kelmedi,
Hámme súriwleri tarap ketti.
22Tıńlańlar, bir xabar kiyatır!
Yahuda qalaların shólge,
Saǵallar mákanına aylandırıw ushın,
Arqadan ullı shawqım kiyatır!

Eremiyanıń duwası

23Jaratqan Iye, men adam jolınıń óz qolında emesligin,
Óz adımın ózi basqara almaytuǵının bilemen.
24Jaratqan Iye, ǵázebiń menen emes,
Al ádalatıń menen meni tárbiyala!
Bolmasa meni qurtasań.
25Ǵázebińdi Ózińdi tanımaǵan milletlerge,
Atıńdı aytıp shaqırmaǵan qáwimlerge tók.
Sebebi olar Yaqıptı jalmadı,
Pútkilley qırıp, joq qılıp,
Mákanın wayran etti.