Jer 11 | KaaIBT22L | STEP | Eremiyaǵa Jaratqan Iyeden mınaday sóz tústi:

‏ Jeremiah 11

Kelisimniń buzılıwı

1 Eremiyaǵa Jaratqan Iyeden mınaday sóz tústi:

2 – Mına kelisimniń shártlerin tıńla! Bulardı Yahuda xalqına hám Erusalim turǵınlarına bayan et. 3 Olarǵa ayt: «Izraildıń Qudayı Jaratqan Iye bılay deydi: Bul kelisimniń shártlerine qulaq aspaǵan adamǵa nálet jawadı. 4 Men ata-babalarıńızdı Mısırdan, temir oshaqtan alıp shıqqan kúnimde olarǵa bılay dep buyrıq berdim: „Meniń dawısıma qulaq salıń hám buyırǵan nárselerimniń bárin orınlań. Sonda sizler Meniń xalqım, Men de sizlerdiń Qudayıńız bolaman. 5 Solay isleseńiz, ata-babalarıńızǵa bergen antımdı orınlap, ózlerińiz házir iyelegen jerdi, sút hám pal aǵıp turǵan jerdi beremen“».

Sonda men:

– Awmiyin, Jaratqan Iye, – dep juwap berdim.

6 Keyin Jaratqan Iye maǵan bılay dedi:

– Bul sózlerdiń hámmesin Yahuda qalalarında hám Erusalim kóshelerinde járiyalap, bılay dep ayt: «Bul kelisimniń shártlerin tıńlań hám olardı orınlań. 7 Men ata-babalarıńızdı Mısırdan alıp shıqqan kúnnen tap usı kúnge shekem úzliksiz: „Sózime qulaq salıń“, – dep qattı eskertip keldim. 8 Degen menen, olar tıńlamadı, qulaq aspadı. Qaytama qırsıǵıp, hár biri júreginiń jaman qálewleri menen júre berdi. Sonlıqtan kelisimdegi barlıq ǵarǵıstı olardıń basına jawdırdım. Men olarǵa bulardı orınlawdı buyırǵan edim, biraq olar orınlamadı».

9 Sońınan Jaratqan Iye maǵan bılay dedi:

– Yahuda xalqı hám Erusalim turǵınları arasında bir til biriktiriw júzege shıqtı. 10 Olar Meniń sózlerime qulaq salıwdan bas tartqan ata-babalarınıń ayıplarına qayta oraldı, basqa qudaylardıń izine erip, olarǵa xızmet etti. Izrail xalqı da, Yahuda xalqı da Meniń ata-babaları menen dúzgen kelisimimdi buzdı. 11 Sonlıqtan Men, Jaratqan Iye bılay deymen: Men olardıń basına qashıp qutıla almaytuǵın apat jawdıraman. Olar Meni shaqırsa da, Men olarǵa qulaq salmayman. 12 Keyin Yahuda qalaları menen Erusalim turǵınları ózleri xosh iyisli tútetki tútetken qudaylarına barıp, jalbarınadı. Biraq apatshılıq kelgende, bul qudaylar olardı hasla qutqarmaydı. 13 Yahuda, sende qansha qala bolsa, qudaylarıńnıń sanı da sonsha! Jerkenishli butqa, yaǵnıy Baal butına arnap xosh iyisli tútetki tútetiw ushın, Erusalimde qansha kóshe bolsa, sonsha qurbanlıq orın qurdıńız.

14 Eremiya, sen bul xalıq ushın duwa etpe, olar ushın jalbarınba da. Sebebi apatshılıqqa ushırap Meni shaqırǵanda, Men olarǵa qulaq salmayman. 15 Súyikli xalqımnıń Ibadatxanamda ne jumısı bar? Olar kóp jaman isler qıldı. Eger jawızlıq qılıp atırıp, shadlanadı eken, qalayınsha qurbanlıq góshi qabıl alınadı!

16 Jaratqan Iye Óz xalqına «Sulıw miyweli, jasıl japıraqlı záytún aǵashı» degen at berdi. Endi bolsa, kúshli ǵalmaǵallıq shawqımı astında oǵan ot beredi, onıń shaqaları janıp, nabıt boladı. 17 Bul terekti tikken Álemniń Jaratqan Iyesiniń Ózi onı joq qılıwdı qarar etti. Óytkeni Izrail hám Yahuda xalqı jawızlıqlar isledi, Baalǵa tútetkiler tútetip, Onıń ǵázebin keltirdi.

Eremiyaǵa qarsı til biriktiriw

18 Jaratqan Iye maǵan ayan qıldı. Olardıń jawız niyetlerin ashıp bergeni ushın, men onnan xabar taptım. 19 Men bolsam, bawızlawǵa alıp baratırılǵan juwas bir qozı sıyaqlı edim. Olardıń maǵan qarsı til biriktirgenin bilmedim. Olar:

«Keliń, aǵashtı miywesi menen joq qılayıq,
Bunnan bılay, onıń atı eske alınbawı ushın,
Tiriler áleminen kesip taslayıq», – degen edi.

20 Ádalatlı húkim shıǵaratuǵın,
Júrek-qálibti sınaytuǵın,
Álemniń Jaratqan Iyesi!
Dawamdı Saǵan tapsıraman,
Olardan qalay ósh alǵanıńdı kóreyin!

21 Sonlıqtan janımdı almaqshı bolıp: «Jaratqan Iyeniń atınan payǵambarshılıq qılma, bolmasa, qolımızdan óleseń», – degen anatotlılar haqqında Jaratqan Iye aytadı. 22 Álemniń Jaratqan Iyesi bılay deydi: «Men olardı jazalayman. Jasları qılıshtan, balaları hám qızları ashlıqtan óledi. 23 Hesh biri aman qalmaydı. Húkim qılınatuǵın jılı, Men anatotlılardıń basına apatshılıq jawdıraman».