Jer 12 | KaaIBT22L | STEP | Jaratqan Iye, dawa-arzımdı Saǵan alıp kelsem, Sen bárqulla haq bolıp shıǵasań. Sonda da, húkim tuwralı, Seniń menen sóylespekshimen. Ne ushın jamannıń isi júrisedi? Ne ushın satqınlar tınıshlıqta jasaydı?

‏ Jeremiah 12

Eremiyanıń shaǵımı

1 Jaratqan Iye, dawa-arzımdı Saǵan alıp kelsem,
Sen bárqulla haq bolıp shıǵasań.
Sonda da, húkim tuwralı,
Seniń menen sóylespekshimen.
Ne ushın jamannıń isi júrisedi?
Ne ushın satqınlar tınıshlıqta jasaydı?
2 Olardı Sen otırǵızdıń, olar tamır jayıp,
Ósip, miywe berdi.
Atıń awzınan túspeydi,
Biraq júregi Sennen alıs.
3 Meni bolsa, Jaratqan Iye, Sen tanıysań,
Meni kóreseń,
Óziń haqqıńdaǵı pikirlerimdi sınaysań.
Sol adamlardı bawızlanatuǵın qoyday etip súyrep,
Soyılatuǵın kún ushın ajıratıp, tayınla.
4 Qashanǵa deyin jer aza tutıp,
Atızlarda shópler solıp jatadı?
Ol jerdiń turǵınlarınıń jaman isleri aqıbetinde,
Haywanlar hám quslar nabıt bolmaqta.
Sebebi bul xalıq:
«Ol bizlerge ne bolatuǵının kórmeydi», – deydi.

Qudaydıń Eremiyaǵa juwabı

5 «Eremiya, piyadalar menen jarısıp sharshasań,
Onda atlar menen qalay jarısasań?
Jazıq jerde súrnikseń,
Onda Iordan boyındaǵı qalıń toǵayda ne qılasań?
6 Hátte, ákeńniń úy-ishi, tuwǵan-tuwısqanlarıń,
Saǵan qıyanet etti,
Artıńnan qattı sóyledi.
Olar saǵan jaqsı sóylese de,
Olarǵa isenbe.

7 Men úyimdi tárk ettim,
Iyeligimdi taslap kettim.
Janımday súygen xalqımdı,
Dushpanlarınıń qolına berdim.
8 Óz xalqım Maǵan toǵaydaǵı arıslanday boldı,
Maǵan ırıldadı, sonıń ushın onı jek kóremen.
9 Xalqım jırtqısh qusqa,
Hár tárepten topılısqa ushıraǵan jırtqısh qusqa uqsap qalmadı ma?
Barıp, barlıq jabayı haywanlardı toplań,
Olar Meniń iyeligimdi jalmap jutsın.
10 Kóp shopanlar júzimzarımdı nabıt qıldı,
Atızımdı basqılap tasladı,
Súyikli atızımdı taqır shólge aylandırdı.
11 Onı wayran qıldı,
Kewip, aldımda nala shegip atır.
Barlıq jer wayran boldı,
Oǵan kewil bóletuǵın hesh kim joq.
12 Shóldegi barlıq taqır tóbeler arqalı,
Qurtıwshılar kiyatır.
Jaratqan Iyeniń, Meniń qılıshım,
Jerdiń bir shetinen ekinshi shetine deyin qırıp joyadı.
Onnan hesh kim aman qalmaydı.
13 Olar biyday egip, tiken ordı,
Tınbay miynet etip, ráhát kórmedi.
Lawlaǵan ǵázebim sebepli,
Zúráát ala almay shermende boldıńız».

14 Jaratqan Iye bılay deydi: «Xalqım Izrailǵa bergen múlkime qol salǵan barlıq jaman qońsıların óz jerlerinen suwırıp taslayman. Yahuda xalqın da olar menen birge suwırıp taslayman. 15 Hámmesin suwırıp taslaǵanımnan soń, olarǵa jáne rehim etip, hár birin óz miyrasına, óz jerine qaytıp alıp kelemen. 16 Eger xalqıma Baal haqı ant ishiwdi úyretkeni sıyaqlı, ózleri de xalqımnıń jolın ıqlas penen úyrenip: „Tiri Jaratqan Iye haqı ant ishemen“, – dep, Meniń atım menen ant ishiwdi úyrense, onda olar da xalqımnıń arasına ornalasadı. 17 Biraq Maǵan qulaq salmaǵan hár bir milletti túp-tamırı menen qoparıp, nabıt qılaman», – deydi Jaratqan Iye.