‏ Jeremiah 14

Jan túrshiktiretuǵın qurǵaqshılıq

1Qurǵaqshılıq haqqında Eremiyaǵa Jaratqan Iyeden mınaday sóz tústi:

2«Yahuda aza tutıp,
Qalaları quwrap atır.
Adamları joqlaw aytıp, jerde otır,
Erusalimnen zarlaǵan dawıslar shıǵıp atır.
3Aqsúyekler qulların suwǵa jiberdi,
Olar suw saqlaǵıshlarǵa barıp, suw tappay,
Bos ıdısları menen úylerine qayttı.
Olar albırap, qısınıp, júzin jawıp aldı.
4Jerge jawın jawmaǵannan keyin,
Jer qaq ayırıldı.
Diyxanlar úmitsizlikke túsip,
Basın usladı.
5Hátte, shóldegi ana suwın da,
Ot-shóp bolmaǵanı ushın,
Jańa tuwǵan balasın taslap ketpekte.
6Qulanlar jalańash tóbelerde turıp,
Saǵallar kibi suwıq demin almaqta.
Otlaq bolmaǵanlıqtan,
Kózleriniń nurı sóngen».

7Ayıplarımız bizge qarsı gúwalıq berse de,
Óz atıń húrmeti bir nárse qıl, Jaratqan Iye!
Qıyanetimiz júdá awır,
Saǵan qarsı gúna isledik.
8Izraildıń úmiti,
Azap kúninde Qutqarıwshı!
Nege jerimizge kelgen kelgindige,
Túnep ketetuǵın jolawshıǵa uqsaysań?
9Nege Sen albıraǵan adamǵa,
Qutqarıwǵa kúshi jetpeytuǵın,
Jawıngerge uqsaysań?
Biraq Sen bizlerdiń aramızdasań-ǵo,
Bizler Seniń atıń menen shaqırıldıq,
Bizlerdi tárk etpe, Jaratqan Iye!

10Bul xalıq tuwralı Jaratqan Iye bılay deydi:
«Olar haqıyqattan da, qańǵırıp júrgendi jaqsı kóredi,
Ayaqların tıya almaydı.
Sonlıqtan Meniń olarǵa kewlim tolmaydı,
Endi ayıpların eske alaman,
Gúnaları ushın olardı jazalayman».

11Keyin Jaratqan Iye maǵan bılay dedi:

– Bul xalıqtıń abadanlıǵı ushın duwa etpe. 12Olar oraza tutsa da, olardıń jalbarınıwlarına qulaq salmayman. Jandırılatuǵın qurbanlıq hám ǵálle sadaqasın usınsa da, Men olardı qabıl qılmayman. Kerisinshe, olardı qılısh, ashlıq hám illet penen qırıp taslayman.

13Sonda men:

– Quday Iye, payǵambarlar bul xalıqqa qılısh júzin kórmeysiz, ashlıq ta bolmaydı, bul jerde haqıyqıy abadan turmıs keshiresiz dep atır, – dedim.

14Jaratqan Iye maǵan bılay dep juwap berdi:

– Payǵambarlar Meniń atımnan jalǵan payǵambarshılıq qılmaqta. Olardı Men jibermedim. Olarǵa buyrıq ta bermedim, olar menen sóylespedim de. Olar sizlerge jalǵan ayanlardı, ashqan paydasız palın hám ózleriniń júrekleri qálegen jalǵanlardı aytıp payǵambarshılıq etip júr. 15Sonlıqtan Meniń atım menen payǵambarshılıq etip júrgenlerge bılay deymen: «Olardı Men jibermegen bolsam da, olar: „Bul jerge qılısh ta, ashlıq ta jolamaydı“, – deydi. Biraq bul payǵambarlardıń ózleri qılısh hám ashlıqtan qaza tabadı. 16Olar payǵambarshılıq qılǵan xalıq ta ashlıq hám qılısh sebepli Erusalim kóshelerine ılaqtırıladı. Olardıń ózlerin de, hayalların da, ul-qızların da jerleytuǵın hesh kim bolmaydı. Olardıń jawızlıqların ózleriniń baslarına jawdıraman».

17– Sen olarǵa mına sózdi jetkiz:

«Kúni-túni kóz jasım toqtamasın.
Sebebi pák qızım – xalqım awır jaraqatlandı,
Kúshli soqqı jedi.
18Dalaǵa shıqsam,
Qılıshtan qaza tapqanlar,
Qalaǵa kirsem,
Ashlıqtan ólimshi bolǵanlardı kóremen.
Payǵambar da, ruwxaniy de,
Ózleri bilmeytuǵın jerde qańǵıp júr».

19Yahudadan pútkilley bas tartqanıń ba?
Sionnan da jerkenetuǵın boldıń ba?
Ne ushın bizdi shıpasız qılıp jaraqatladıń?
Bizler paraxatshılıq kúttik,
Biraq jaqsılıq kórmedik.
Shıpa alatuǵın waqıttı kúttik,
Ornına zárremiz ushtı.
20Jaratqan Iye, islegen jamanlıqlarımızdı,
Ata-babalarımızdıń ayıpların moyınlaymız.
Aldıńda gúna isledik.
21Atıń húrmeti bizlerden júz burma,
Saltanatlı taxtıń húrmeti ayaq astı qılma.
Bizler menen dúzgen kelisimińdi eske al,
Onı buzba.
22Milletlerdiń jaramsız butlarınıń arasında,
Jawın jawdıra alatuǵını bar ma?
Yamasa aspan ózliginen nóser quydıra ala ma?
Qudayımız Jaratqan Iye, bunı tek ǵana Sen isley alasań.
Bulardıń hámmesin isleytuǵın Senseń,
Úmitimiz Sennen!