Jer 15 | KaaIBT22L | STEP | Jaratqan Iye maǵan bılay dedi: – Hátte, Muwsa menen Samuel aldımda turıp jalbarınsa da, bul xalıqqa júregim jibimeydi. Bul xalıqtı aldımnan quw, ketsin!

‏ Jeremiah 15

Yahuda xalqına rehim etilmeydi

1 Jaratqan Iye maǵan bılay dedi:

– Hátte, Muwsa menen Samuel aldımda turıp jalbarınsa da, bul xalıqqa júregim jibimeydi. Bul xalıqtı aldımnan quw, ketsin! 2 Eger olar sennen: «Qay jerge baramız?» – dese, olarǵa bılay dep ayt: «Jaratqan Iye bılay deydi:

Ólimge húkim etilgenler – ólsin,
Qılıshqa húkim etilgenler – qılısh astına tússin,
Ashlıqqa húkim etilgenler – ashlıqqa ushırasın,
Tutqınlıqqa húkim etilgenler – tutqın bolsın.

3 Olarǵa tórt túrli jaza beriwdi qarar ettim, – deydi Jaratqan Iye, – óltiriw ushın qılıshtı, tilkimlew ushın iytlerdi, jep, joq qılıw ushın kóktegi quslar menen jerdegi haywanlardı jiberemen. 4 Yahuda patshası Xizkiya ulı Menashsheniń Erusalimde islegen isleriniń ^{▼▼ 4Pat 21:1-16.} kesiri sebepli, pútkil jer betindegi patshalıqlar ushın olardı húreydi ushıratuǵın kóriniske aylandıraman.

5 Erusalim, saǵan kimniń janı ashıydı?
Kim sen ushın aza tutadı?
Hal-jaǵday soraw ushın,
Kim qayırılıp, saǵan keler eken?
6 Sen Mennen júz burdıń,
– deydi Jaratqan Iye, –
Sen arqańdı qarattıń.
Sonlıqtan qolımdı kóterip,
Seni joq qılaman.
Seni ayawdan sharshadım.
7 Bul jerdiń qala dárwazalarında,
Xalqımdı gúrek penen suwıraman.
Perzentlerinen ayırıp,
Xalqımdı nabıt qılaman.
Óytkeni olar jaman jollarınan qaytpadı.
8 Olardıń jesirleri teńiz qumınan da kóp boladı.
Jigitleriniń analarınıń ústine,
Tal túste nabıt qılıwshını jiberemen.
Tosattan olardı qayǵı hám qorqınıshqa salaman.
9 Jeti balalı ana hálsirep,
Sońǵı demin beredi.
Onıń quyashı kúndiz-aq batadı.
Ol uyatqa qalıp, masqara boladı.
Aman qalǵanlardı dushpanlarınıń kóz aldında,
Qılıshqa tapsıraman, – deydi Jaratqan Iye».

Eremiyanıń shaǵım etiwi

10 Meniń sorım qurısın!
Anajan, sen meni pútkil dúnya menen dawlasıp,
Jánjellessin dep tuwıp pa ediń?
Men hesh kimge qarız bermedim, qarız da almadım,
Sonda da hámme meni náletleydi.

11 Jaratqan Iye bılay dedi:
«Men seni pútkilley dushpanlarǵa beremen.
Apatshılıq hám baxıtsızlıq waqtında,
Olardı saǵan jiberemen.
12 Temirdi, arqadan kelgen temir hám qolanı,
Kim sındıra aladı?
13 Eldiń hámme jerinde islegen gúnalarıńız ushın,
Baylıǵıńızdı hám ǵáziyneńizdi,
Dushpanlarıńızǵa ańsat olja qılaman.
14 Men sizlerdi ózlerińiz bilmeytuǵın jerdegi,
Dushpanlarıńızǵa qul qılaman.
Ǵázebim sizlerge qarsı tutanıp,
Ot bolıp janadı».

15 Jaratqan Iye, Sen bileseń,
Meni yadqa al, járdem ber,
Meni quwǵın qılǵanlardan óshimdi al.
Sabırlılıǵıń menen meni nabıt qılma,
Bileseń, Sen ushın xorlıqlarǵa shıdap atırman.
16 Sózlerińdi tawıp, jedim.
Sózleriń maǵan quwanısh, júregime shadlıq alıp keldi.
Álemniń Qudayı Jaratqan Iye,
Men Seniń atıń menen atalǵanman.
17 Keypi-sapa qurǵanlar menen otırmadım,
Olar menen yoshıp, shadlanbadım.
Seniń qolıń ústimde bolıp,
Meni ǵázepke toltırǵanıń ushın,
Men jalǵız otırdım.
18 Nege azabımnıń azarı basılmaydı?
Nege jaraqatım awır hám shıpasız?
Sen men ushın suwı qurıp qala beretuǵın,
Aldamshı bir say bolajaqsań ba?

19 Buǵan Jaratqan Iye bılay deydi:
«Eger táwbe qılsań, qayta qabıl etip,
Seni xızmetime qoyaman.
Eger mánissiz sóylemey,
Áhmiyetli sózlerdi aytsań,
Meniń tilim menen sóyleyseń.
Bul xalıqtıń ózleri saǵan qaytadı,
Biraq sen olarǵa qayırılıp qarama.
20 Men seni bul xalıq ushın,
Qoladan islengen bekkem diywal qılaman.
Olar seniń menen urısadı, biraq jeńe almaydı.
Qutqarıw hám azat qılıw ushın,
Men seniń menen birgemen,
– dedi Jaratqan Iye. –
21 Seni nahaqlardıń qolınan azat etemen,
Rehimsizlerdiń pánjesinen satıp alaman».