‏ Jeremiah 16

Yahudanıń qulawı

1Maǵan Jaratqan Iyeden mınaday sóz tústi:

2– Úylenbe, bul elde ul-qızlarıń bolmasın. 3Bul jerde tuwılǵan ul-qızlar, olardı tuwǵan analar hám olardı dóretken ákeler tuwralı Jaratqan Iye bılay deydi: 4Olar awır keselliklerden óledi. Olar ushın joqlaw aytılmaydı, olar jerlenbeydi. Olar topıraqta tezek sıyaqlı shashılıp jatadı. Qılıshtan qaza tabadı, ashlıqtan óledi. Deneleri kóktegi quslarǵa hám jerdegi haywanlarǵa jem boladı.

5Sonlıqtan Jaratqan Iye bılay deydi: Adam qaytıs bolǵan úyge kirme, joqlaw aytıw yamasa kewil bildiriw ushın barma. Men bul xalıqtan tınıshlıǵımdı, súyispenshiligimdi hám rehimimdi alıp qoydım, – deydi Jaratqan Iye. 6– Bul jerde úlkeninen kishkenesine deyin hámmesi óledi. Olardı hesh kim jerlemeydi, olar ushın joqlaw aytıp, óz denelerin tilip, shashların aldırmaydı. 7Ólige joqlaw aytıp jılaǵanlardı jubatıp, shórek sındırıp beretuǵın da, ata-anasın eske alǵanda táselle kesesin usınatuǵın da hesh kim bolmaydı. 8Toy bolıp atırǵan úyge de kirme, olar menen otırıp, iship-jeme.

9Sebebi Izraildıń Qudayı, Álemniń Jaratqan Iyesi bılay deydi: Sizlerdiń kúnlerińizde, sizlerdiń kóz aldıńızda bul jerdegi quwanısh hám shadlıq dawısın, kelin hám kúyewdiń dawısın tıyaman.

10Bul sózlerdiń hámmesin xalıqqa jetkergenińde, olar saǵan: «Ne ushın Jaratqan Iye bizlerge bul awır azaptıń barlıǵın jawdırmaqshı ekenin bildirdi? Jazıǵımız ne? Qudayımız Jaratqan Iyege qarsı qanday gúna isledik?» – deydi. 11Sonda sen olarǵa bılay dep juwap ber: «Ata-babalarıńız Meni tárk etti, – deydi Jaratqan Iye. – Olar basqa qudaylarǵa erdi, olarǵa xızmet etip, tabındı. Meni taslap ketti, Nızamıma ámel qılmadı. 12Sizler bolsańız, ata-babalarıńızdan da beter jamanlıq qıldıńız. Maǵan qulaq salmay, hár birińiz qırsıqlıq penen júregińizdiń jamanlıqların islep atırsız. 13Sonıń ushın Men sizlerdi bul jerden shıǵarıp, ózlerińiz de, ata-babalarıńız da bilmeytuǵın jerge ılaqtırıp taslayman. Ol jerde kúni-túni basqa qudaylarǵa xızmet etesiz. Men sizlerge rehim qılmayman».

Súrginnen qaytıw

14«Sonday kúnler keledi, – deydi Jaratqan Iye, – adamlar endi: „Izrail xalqın Mısırdan alıp shıqqan Tiri Jaratqan Iye haqı ant ishemen“, demeytuǵın boladı. 15Bunıń ornına, „Izrail xalqın arqadan, Ózi quwıp jibergen barlıq jerlerden alıp shıqqan tiri Jaratqan Iye haqı ant ishemen“, deytuǵın boladı. Sebebi Men olardı ata-babalarına bergen jerge qaytarıp alıp kelemen.

16Mine, Men kóp balıqshılardı jiberemen, – deydi Jaratqan Iye, – balıqshılar olardı tutadı. Bunnan keyin, Men kóp ańshılardı jiberemen. Ańshılar barlıq taw, barlıq tóbeshik hám barlıq jartaslardıń jarıqlarınan olardı awlaydı. 17Olardıń barlıq jolları Meniń kóz aldımda, olar Mennen jasırına almaydı, qılmısları da názerimnen qasha almaydı. 18Olar jansız, jerkenishli butları menen jerimdi haramladı, Meniń múlkimdi jerkenishli músinlerge toltırdı. Sonlıqtan qılmısları hám gúnaları ushın olarǵa eki ese qılıp qaytaraman».

19Jaratqan Iye, Sen meniń kúshim hám qorǵanımsań,
Apatshılıq kúni panamsań!
Dúnyanıń tórt tárepinen milletler,
Seniń aldıńa kelip bılay deydi:
«Bizlerdiń ata-babalarımız tek jalǵan qudaylardı,
Paydasız, jaramsız butlardı miyrasqa aldı.
 20Adam ózine qudaylardı soǵa ala ma?
Aqırı, bular Quday emes-ǵo!»

21«Solay eken, bul ret Men olarǵa sabaq bereyin,
Kúshimdi hám qúdiretimdi kórsetip qoyayın.
Sonda olar Meniń atımnıń Jaratqan Iye ekenin bilip aladı».
Copyright information for KaaIBT22L