‏ Jeremiah 17

Yahudanıń gúnası

1«Yahudanıń gúnası temir qálem menen jazıldı. Bul olardıń júrekleriniń taxtasına,
Qurbanlıq orınnıń shaqlarına,
Shaqmaq tas penen oyıp jazıldı.
2Hár bir biyik tóbeshiktegi,
Qoyıw japıraqlı terektiń astındaǵı,
Qurbanlıq orınlar menen kiyeli aǵashlarǵa,
Olardıń balaları da tabınıwın dawam etpekte.
3Jerimdegi tawım ústinde,
Pútkil aymaǵıńızda qılǵan gúnalarıńız ushın,
Men seniń baylıǵıńdı,
Barlıq ǵáziynelerińdi,
Sıyınıw orınlarıń menen birge,
Dushpanǵa olja qılıp beremen.
4Óz ayıbıń sebepli,
Ózińe bergen úlesimnen juda bolasań.
Men seni óziń bilmeytuǵın jerdegi,
Dushpanlarıńa qul qılaman.
Sizler Meniń ǵázebimdi tutandırdıńız,
Ol máńgige janadı».

5Jaratqan Iye bılay deydi:
«Insanǵa isengen,
Insannıń kúshine súyengen,
Júregi Jaratqan Iyeden alıslaǵan,
Adamǵa nálet jawsın!
6Ol shóldegi putaǵa megzeydi,
Jaqsılıq kelgende, onı kórmeydi.
Ol kúydiretuǵın shólde,
Adamsız duzlı jerde jasaydı.

7Jaratqan Iyege úmit baylaǵan,
Oǵan súyengen adam qanday baxıtlı!
8Ol suw jaǵasına otırǵızılǵan terekke megzeydi,
Tamırın ózekke qaray jayadı.
Íssıdan qorqpaydı,
Japıraǵı bárqulla jasıl boladı.
Jıl qurǵaq kelse de, qayǵıǵa batpaydı,
Miywe beriwin toqtatpaydı.

9Adam júregi hámme nárseden de hiyleker,
Hasla dúzelmeydi,
Oǵan kim túsine aladı?

10Men, Jaratqan Iye hár bir adamnıń tutqan jolına,
Islegen islerine qaray qaytarıw ushın,
Adamnıń júregine qarayman,
Qálbin sınayman».

11Haram baylıq jıynaǵan adam,
Ózi tuwmaǵan máyekke qurıq basqan keklikke uqsaydı.
Ómiriniń ortasında baylıǵı qoldan ketip,
Aqırında ol aqmaq bolıp shıǵadı.

Eremiyanıń duwası

12Muxaddes Ibadatxanamız – ázelden kóterilgen,
Jaratqan Iyeniń saltanatlı taxtı!
13Jaratqan Iye, Izraildıń Úmiti!
Seni tárk etkenlerdiń hámmesi uyatqa qaladı.
Sennen júz burǵanlardıń atları,
Qumǵa jazılǵanday joq boladı.
Sebebi olar tiri suw bulaǵın,
Jaratqan Iyeni tárk etti.

14Shıpa ber maǵan, Jaratqan Iye, sawalayın,
Meni qutqar, qutqarılayın.
Sebebi tek Ózińe alǵıs aytaman.
15Olar maǵan: «Jaratqan Iyeniń sózi qay jerde?
Ol ámelge assın», – dey beredi.
16Men xızmetińde shopan bolıwdan qashpadım.
Apatshılıq kúniniń keliwin de tilemedim.
Awzımnan shıqqan hár bir sózdi Óziń bileseń.
Ol sózler Seniń aldıńda aytılǵan.
17Meniń húreyimdi ushırma,
Apatshılıq kúni panam Ózińseń.
18Meni quwǵın qılǵanlar uyatqa qalsın,
Biraq meni uyatqa qalıwdan saqlay gór.
Olardı qorqıwǵa sal,
Biraq meni qorqıwdan saqlay gór.
Olarǵa apatshılıq kúnin jawdırıp,
Eki ese awır soqqı berip, joq qıl.

Shabbat kúniniń muxaddesligi

19Jaratqan Iye maǵan bılay dedi:

– Yahuda patshaları kirip-shıǵatuǵın Xalıq dárwazasına barıp, sol jerde tur. Sońınan Erusalimniń basqa dárwazalarına da barıp tur. 20Xalıqqa bılay dep ayt: «Mına dárwazalardan ótetuǵın Yahuda patshaları, pútkil Yahuda xalqı hám pútkil Erusalim turǵınları, Jaratqan Iyeniń sózin tıńlań! 21Jaratqan Iye bılay deydi: Eger ómirińizdi saqlap qalmaqshı bolsańız, onda Shabbat kúni júk tasımań, onı Erusalim dárwazaları arqalı alıp ótpeń. 22Sol kúni úyińizden júk shıǵarmań, hesh qanday jumıs islemeń. Meniń ata-babalarıńızǵa buyırǵanımday, Shabbat kúnin muxaddes saqlań. 23Degen menen, ata-babalarıńız Meni tıńlamadı, qulaq ta salmadı. Qaysarlıq etip, Meni tıńlamadı, tárbiyamdı almadı. 24Biraq eger sizler Maǵan qulaq salıp, – deydi Jaratqan Iye, – Shabbat kúni bul qalanıń dárwazalarınan júk alıp ótpeseńiz, hesh qanday jumıs islemey, Shabbat kúnin muxaddes saqlasańız, 25onda Dawıttıń taxtında otıratuǵın patshalar óz hámeldarları menen arbalarǵa hám atlarǵa minip, Yahuda xalqı hám Erusalim turǵınların ertip, bul qalanıń dárwazalarınan kiredi. Bul qalada máńgige adamlar jasaydı. 26Yahuda qalalarınan, Erusalimniń átiraplarınan, Benyamin jerinen, batıstaǵı taw eteklerinen, tawlı úlkeden, Negebten adamlar kelip, Jaratqan Iyeniń Úyine jandırılatuǵın qurbanlıqları menen basqa qurbanlıqların, ǵálle sadaqaların, xosh iyisli tútetki menen minnetdarshılıq qurbanlıqların alıp keledi. 27Eger de Meni tıńlamasańız, Shabbat kúni Erusalim dárwazalarınan júk penen kirip, muxaddes Shabbat kúnin muxaddes saqlamasańız, onda qala dárwazalarına ot beremen. Ot Erusalim sarayların jandırıp joq qıladı, ol hesh qashan sónbeydi».