‏ Jeremiah 18

Eremiya gúlalshınıń úyinde

1Eremiyaǵa Jaratqan Iyeden mınaday sóz tústi:

2– Tur, gúlalshınıń úyine bar, sol jerde Óz sózimdi ayan qılaman.

3Men gúlalshınıń úyine barǵanımda, onıń gúlal ásbabın aylandırıp jumıs islep otırǵanın kórdim. 4Ílaydan islep atırǵan ıdısı gúlalshınıń qolında buzılıp ketkende, ol sol ılaydan óziniń kózine jaqqanday basqa bir ıdıstı shıǵardı.

5Sol waqıtta Jaratqan Iyeden maǵan sóz tústi:

6– Háy, Izrail xalqı, mına gúlalshınıń óz ıdısına islegenindey nárseni, Men de sizlerge isley almayman ba? – deydi Jaratqan Iye. – Ílay gúlalshınıń qolında qanday bolsa, Izrail xalqı, sizler de Meniń qolımda sondaysız. 7Qálegen waqıtta Men qanday da bir millet yamasa patshalıqtı túp-tamırı menen suwırıp taslaw, qulatıw hám joq qılıw tuwralı sheshim qabıl ete alaman. 8Biraq Men aytqan sol xalıq jawızlıqları ushın táwbe qılsa, onıń basına jawdıratuǵın apatshılıǵımnan waz keshemen. 9Aytayıq, Men bir milletti yamasa patshalıqtı qurıp, bekkemlew tuwralı jar salsam, 10biraq sol millet Meniń názerimde jawız bolǵan islerdi qılıp, sózime qulaq salmasa, onda Men oǵan islemekshi bolǵan jaqsılıǵımnan waz keshemen.

11Sonlıqtan endi Yahuda xalqı menen Erusalim turǵınlarına ayt: «Jaratqan Iye bılay deydi: Men sizlerge bir apattı tayarlap, bir joba oylap atırman. Hár birińiz jawız jollarıńızdan qaytıp, is-háreketińizdi dúzetiń». 12Biraq olar: «Bizler ushın áwere bolmań! Óz niyetimizdi iske asıra beremiz, hár birimiz jawız júregimizdiń qaysarlıǵı menen is tuta beremiz», – deydi.

13Sonlıqtan Jaratqan Iye bılay deydi:
«Milletlerden sorań,
Buǵan uqsaǵan nárselerdi kim esitipti?
Pák qız Izrail,
Qorqınıshlı is qıldı.
14Lebanon jartaslı janbawırlarındaǵı,
Qarlar hesh erip, joq bolar ma?
Alıs tawlardan aǵıp kelgen muzday suwlar,
Ada bolar ma eken?
15Biraq Meniń xalqım Meni umıttı.
Olar paydasız butlarǵa tútetki tútetti.
Bular olardı óz jolında súrniktirdi,
Eski jollardan adastırdı.
Olar tuwrı joldan shıǵıp,
Teris joldan júrip ketti.
16Olardıń jeri qorqınıshlı hám jandı túrshiktiretuǵın kóriniske aylanadı,
Janınan ótkenlerdiń júregi suwlap,
Basların shayqaytuǵın boladı.
17Shıǵıs samalı kibi,
Olardı dushpanlarınıń aldına shashaman.
Olar apatshılıqqa ushıraǵanda,
Júzimdi burıp, arqamdı kórsetemen».

Eremiyanı óltiriw jobası

18Sonda xalıq:

– Keliń, Eremiyaǵa qarsı til biriktireyik. Ruwxaniyler úyretetuǵın Nızam da, danıshpanlardıń másláháti de, payǵambarlardıń sózleri de bizlerge jeterli. Eremiyaǵa qarsı sóylep, onıń hesh bir sózine qulaq aspayıq, – dedi.

19– Jaratqan Iye, meni tıńla,
Dushpanlarımnıń sózlerin esit!
20Nelikten jaqsılıqqa jamanlıq qaytarmaqshı?
Olar maǵan gór qazdı.
Olarǵa degen ǵázebińdi basıw ushın,
Olardıń iygiligin gózlep,
Aldıńda qalay jalbarınıp turǵanımdı esińe al.
21Bunıń ushın, balaların ashlıqqa ushırat,
Olardı qılısh júzine tapsır.
Anaları perzentlerinen ayırılsın,
Hayalları jesir bolıp qalsın,
Erkekleri ájel tapsın,
Jasları urısta qılıshtan qaza tapsın.
22Tosattan ústine qaraqshılardı jibergenińde,
Úylerinen dad-páriyad esitilsin.
Sebebi meni túsiriw ushın gór qazdı,
Ayaǵımnıń astına tor tasladı.
23Jaratqan Iye, Sen olardıń meni óltiriw ushın,
Dúzgen barlıq jobaların bileseń.
Olardıń ayıpların keshirme,
Gúnalarına kóz jumba.
Olar Seniń aldıńda qulasın,
Ǵázeplengenińde olarǵa qarsı is tut.