Jer 19 | KaaIBT22L | STEP | Jaratqan Iye bılay dedi: – Barıp, gúlalshıdan ılaydan islengen gúze satıp al. Janıńa xalıq aqsaqallarınan hám ruwxaniylerdiń jası úlkenlerinen alıp,

‏ Jeremiah 19

Sınǵan gúze

1 Jaratqan Iye bılay dedi:

– Barıp, gúlalshıdan ılaydan islengen gúze satıp al. Janıńa xalıq aqsaqallarınan hám ruwxaniylerdiń jası úlkenlerinen alıp, 2 Sınǵan gúzeler degen dárwaza arqalı shıǵıp, Ben-Hinnom oypatlıǵına bar. Saǵan aytpaqshı bolǵan sózlerimdi sol jerde járiyala. 3 Olarǵa bılay de: «Háy Yahuda patshaları menen Erusalim turǵınları, Jaratqan Iyeniń sózin tıńlań! Izraildıń Qudayı, Álemniń Jaratqan Iyesi bılay deydi: Men bul jerge sonday apatshılıq alıp kelemen, ol tuwralı esitken adamnıń qulaqları shuwıldaydı. 4 Sebebi bul xalıq Meni tárk etip, bul jerdi haramladı. Olar bul jerde ózleri de, ata-babaları da, Yahuda patshaları da bilmegen basqa qudaylarǵa qurbanlıq jandırıp, bul jerdi biygúna adamlardıń qanına toltırdı. 5 Olar Baalǵa arnap sıyınıw orınların qurdı hám óz balaların otqa jaǵıp, Baalǵa jandırılatuǵın qurbanlıq qılıp berdi. Men olarǵa bulay islewdi buyırǵan da, aytqan da joqpan, bunday nárse qıyalıma da kelmegen.

6 Mine, sonday waqıtlar keledi, – deydi Jaratqan Iye, – bul jer artıq Tofet yaki Ben-Hinnom oypatlıǵı dep emes, al Bawızlaw oypatlıǵı dep ataladı. 7 Usı jerde Yahuda menen Erusalimniń niyetlerin pushqa shıǵaraman. Olardı dushpanlardıń qılıshına, olarda qastı barlardıń qolına tapsıraman. Denelerin kóktegi quslarǵa hám jerdegi jırtqısh haywanlarǵa jem qılaman. 8 Men bul qalanı qorqınıshlı hám jandı túrshiktiretuǵın kóriniske aylandıraman. Ol jerden ótken hár bir adamnıń júregi suwlap, apatshılıqları sebepli esten awadı. 9 Men bul qalanıń turǵınların óz ul-qızlarınıń etin jewge májbúr qılaman. Janın alıwdı qálegen dushpanlar olardı qamalǵa alǵanda, olar mútájlikten bir-biriniń etin jeydi».

10 Sen óziń menen kelgenlerdiń kóz aldında gúzeni sındırıp, 11 olarǵa ayt: «Álemniń Jaratqan Iyesi bılay deydi: Gúlalshınıń gúzesiniń sınıp, onıń qayta dúzetilmeytuǵını sıyaqlı, Men de bul xalıqtı hám bul qalanı solay sındıraman. Tofette jerlewge orın qalmaǵansha, óliler jerlenedi. 12 Men bul jerge de, onıń turǵınlarına da solay qılaman, – deydi Jaratqan Iye. – Bul qalanı da Tofettey qılaman. 13 Erusalimniń úyleri de, Yahuda patshalarınıń sarayları da Tofet degen orın sıyaqlı haram sanaladı. Sebebi barlıq úylerdiń tóbelerinde aspan denelerine arnap xosh iyisli tútetkiler tútetildi hám basqa qudaylarǵa arnap ishimlik sadaqaları quyıldı».

14 Keyin Eremiya Jaratqan Iye payǵambarshılıq qılıw ushın jibergen jerinen, Tofetten qaytıp keldi. Ol Jaratqan Iyeniń Úyiniń háwlisinde turıp, pútkil xalıqqa bılay dedi:

15 – Izraildıń Qudayı Álemniń Jaratqan Iyesi bılay deydi: «Olar qaysarlıq etip, sózimdi tıńlawdan bas tartqanı ushın, Men bul qalaǵa hám onıń átirapındaǵı qalalarǵa Ózim aytqan bálelerdiń hámmesin jiberemen».