‏ Jeremiah 2

Izraildıń Qudaydan uzaqlasıwı

1Jaratqan Iyeden maǵan sóz tústi:

2– Barıp, mınalardı Erusalim xalqına esittirip járiyala:

«Jaratqan Iye bılay deydi:
Seniń jaslıǵıńda qanday opadar bolǵanıń,
Kelinshek waqtıńdaǵı súyispenshiligiń,
Shólde, egin ege almaytuǵın jerde,
Izime ergeniń yadımda.
3Izrail Jaratqan Iye ushın muxaddes xalıq,
Onıń jemisiniń birinshi miywesi.
Onnan jegenlerdiń barlıǵı jazıqlı bolıp,
Baslarına apat jawdı, – deydi Jaratqan Iye.

4Yaqıptıń xalqı, Izrail xalqınıń barlıq tiyreleri,
Jaratqan Iyeniń sózin tıńlań!
5Jaratqan Iye bılay deydi:
Mennen uzaqlasatuǵınday,
Ata-babalarıńız Mennen ne jamanlıq kórdi?
Jaramsız butlarǵa tabınıp,
Ózleri de túkke turǵısız boldı.
6Olar: „Bizlerdi Mısırdan alıp shıqqan,
Shól dalada, qumlı hám shuqırları bar jerlerde,
Suwsız hám qarańǵı jerde,
Hesh kim óte almaytuǵın hám hesh kim jasamaytuǵın jerde,
Bizge jol kórsetken Jaratqan Iye qay jerde?“– dep soramadı.
7Miywesinen hám jaqsılıǵınan tatsın dep,
Men sizlerdi ónimdar bir jerge alıp kelgen edim.
Biraq ol jerge kirip, iyeligimdi haramladıńız,
Múlkimdi jerkenishli orınǵa aylandırdıńız.
8Ruwxaniyler: „Jaratqan Iye qayda?“– dep soramadı.
Qazılar Meni tanımadı,
Xalıq basshıları Maǵan qarsı bas kóterdi.
Payǵambarlar Baaldıń atınan payǵambarshılıq qılıp,
Paydasız nárselerdiń izinen quwdı.

9Sonlıqtan Men sizler menen jáne dawlasaman,
– deydi Jaratqan Iye. –
Men sizlerdiń balalarıńızdıń balaları menen de dawlasaman.
10Kittim jaǵalawlarına barıp kóriń,
Kedarǵa adam jollap, dıqqat penen kózden ótkeriń.
Tómendegidey waqıya qashan bolsa da, júz bergen be eken?
11Hátte, olardıń qudayları Quday bolmasa da,
Óz qudaylarınan waz keshken millet bar ma?
Biraq Meniń xalqım óziniń dańqlı Qudayın,
Paydasız nársege almastırdı.
12Háy, kókler, buǵan tańlanıp,
Qorqıwdan titireń,
– deydi Jaratqan Iye. –
13Meniń xalqım eki jamanlıq isledi:
Meni, tiri suw bulaǵın tárk etti,
Ózlerine suw turmaytuǵın, buzıq suw saqlaǵıshlardı qazıp aldı.

14Izrail qul ma?
Yamasa qul bolıp tuwılǵan ba?
Onda nege ol olja boldı?
15Kúshli arıslanlar oǵan aqırıp, dawısın kóterdi.
Jerin shólistanǵa aylandırdı.
Qalası qarabaqanaǵa aylanıp, adamsız qaldı.
16Nof hám Taxpanxes xalqı da,
Eńbegińizdi oyıp tasladı.
17Ózińe jol kórsetken Qudayıń,
Jaratqan Iyeni tárk etkeniń ushın,
Bul basıńa túspedi me?
18Endi nege Mısırǵa baratırsań,
Shixordıń suwınan ishiw ushın ba?
Assiriyaǵa ne ushın baratırsań,
Evfrat suwınan ishiw ushın ba?
19Sizlerdi óz jamanlıǵıńız jazalap,
Opasızlıǵıńız ginalaydı.
Qudayıńız Jaratqan Iyeni tárk etiwdiń,
Mennen qorqpawdıń sizler ushın qanday jaman hám ashshı ekenin,
Kórip, biliń, – deydi Iye, Álemniń Jaratqan Iyesi.

20Sen uzaq waqıt aldın moyıntırıǵıńdı buzıp,
Kisenlerińdi úzip:
„Saǵan xızmet etpeymen“, – dediń.
Sen hár bir biyik tóbeshikte,
Hár bir qoyıw japıraqlı terektiń astında,
Dize búgip buzıqshılıq qıldıń.
21Men seni hasıl tuqımnan,
Saylandı júzim aǵashınan ekken edim.
Biraq sen nege aynıp qalıp,
Jabayı júzim aǵashına aylandıń?
22Endi kóp silti suwı menen juwıp,
Sabın menen tazalasań da,
Seniń ayıpdarlıǵıńnıń tamǵası aldımda turadı,
– deydi Quday Iye. –
23Sen qalayınsha: „Men haram emespen,
Baallarǵa da ermedim“, – dep aytasań?
Oypatlıqta qılǵan qılıǵıńa ▼

▼ 7:31-32; 19:1-6; 32:35.

qarap,
Ne islegenińdi oylap kór.
Sen ózin ol jaqtan bul jaqqa urǵan,
Urǵashı túyege uqsaysań.
24Sen shólge úyrengen,
Qushtarlıǵıń qozǵanda, samalǵa pısqırǵan qulansań.
Kúyge kelgende, onı kim toqtata aladı?
Shaǵılısqısı kelgenler izinen quwıp sharshamaydı,
Kúyge kelgen ayında, onı tawıp aladı.
25Ayaǵıńdı jalańayaq juwırıwdan,
Tamaǵıńdı shóllewden saqla.
Biraq sen: „Úmit etpe, men jat qudaylardı súyemen,
Onıń izine eremen“, – dediń.
26Urı qolǵa túskende, shermende bolǵanınday,
Izrail xalqı, onıń patshaları, basshıları,
Ruwxaniyleri, payǵambarları masqara boladı.
27Olar terekke: „Meniń ákemseń“,
Tasqa: „Sen meni tuwdıń“, – deydi.
Olar Maǵan júzin emes, al arqasın qarattı.
Biraq baslarına apat túskende:
„Kelip, bizlerdi qutqar“, – deydi.
28Seniń óziń ushın islep alǵan qudaylarıń qayda?
Apatqa ushıraǵanıńda,
Seni qutqara alatuǵın bolsa, kelsin.
Yahuda, qalalarıńnıń sanı qansha bolsa,
Qudaylarıńnıń sanı da sonsha.
29Nege Maǵan dawa qılasız?
Hámmeńiz Maǵan qarsı bas kóterdińiz,
– deydi Jaratqan Iye. –
30Xalqıńdı qatal jazaladım,
Biraq olar tárbiyamdı almadı.
Qılıshıńız jırtqısh arıslan kibi,
Payǵambarlarıńızdı qırıp tasladı.

31Sizler, bul dáwir urpaqları,
Jaratqan Iyeniń sózine qulaq túriń:
Men Izrail ushın bir shól,
Qara túnek bir jer me edim?
Sonda ne ushın xalqım:
„Bizler erkinbiz,
Endi janıńa qaytıp barmaymız“, – deydi.
32Qız bala taǵınshaqların,
Kelinshek kelin kiyimin esten shıǵara ma?
Al Meniń xalqım Meni umıttı,
San-sanaqsız kúnler ótti.
33Oynas tabıwǵa qanshelli ustasań,
Hátte, buzıq hayalǵa da jollarıńnan úyrenetuǵın nárse bar.
34Etegiń de biygúna paqırdıń qanına bılǵanǵan,
Onı sen urlıq ústinde uslamaǵan bolsań da,
Bularǵa qaramastan:
35„Men ayıpsızban,
Jaratqan Iyeniń maǵan degen qáhári anıq sóndi“, – deyseń.
Biraq: „Men gúnasızban“, – degeniń ushın,
Ústińnen húkim shıǵaraman.
36Nege tez-tez jolıńdı ózgerte bereseń?
Assiriyada uyatqa qalǵanıń sıyaqlı,
Mısırda da uyatqa qalasań.
37Ol jerden de qolıń menen betińdi jawıp shıǵasań.
Sebebi Jaratqan Iye sen úmit etkenlerden júz burdı,
Endi olar arqalı tabısqa erise almaysań».