Jer 20 | KaaIBT22L | STEP | Jaratqan Iyeniń Úyiniń bas xızmetkeri ruwxaniy Immer ulı Pashxur Eremiyanıń payǵambarshılıq etip usı sózlerdi aytıp atırǵanın esitti.

‏ Jeremiah 20

Eremiya hám ruwxaniy Pashxur

1 Jaratqan Iyeniń Úyiniń bas xızmetkeri ruwxaniy Immer ulı Pashxur Eremiyanıń payǵambarshılıq etip usı sózlerdi aytıp atırǵanın esitti. 2 Pashxur Eremiya payǵambardı urıp, Jaratqan Iyeniń Úyiniń Joqarǵı Benyamin dárwazası janında buǵawlatıp qoydı. 3 Erteńine, Pashxur onı buǵawdan bosatqan waqtında, Eremiya oǵan bılay dedi:

– Jaratqan Iye seni Pashxur dep emes, al Magor-Missabib ^{▼▼ Magor-Missabib – «qorqınıshqa búrkengen» degendi bildiredi.} dep atadı. 4 Sebebi Jaratqan Iye bılay deydi: «Basıńa túsetuǵın isler arqalı Men seni hám hámme doslarıńdı qorqınıshqa salaman. Olardıń dushpan qılıshınan qalay qulaǵanın óz kóziń menen kóreseń. Men pútkil Yahudanı Babiloniya patshasınıń qolına beremen. Bul patsha olardı Babilonǵa súrgin qıladı yamasa qılıshtan ótkeredi. 5 Men bul qalanıń pútkil baylıǵın, mal-múlkin, qımbatbaha zatların, Yahuda patshalarınıń barlıq ǵáziynelerin dushpanlarınıń qolına beremen. Olardı talan-taraj etip, Babilonǵa alıp ketedi. 6 Al Pashxur, sen hám úyińde jasaytuǵınlardıń hámmesi Babiloniyaǵa súrgin qılınasız. Sen de, óziń payǵambarshılıq etken doslarıń da sol jerde ólip, sol jerde jerlenesiz».

Eremiyanıń shaǵım etiwi

7 Jaratqan Iye, Sen meni aldadıń,
Men de aldandım.
Sen mennen kúshliseń, meni jeńdiń.
Hár bir adam ústimnen kúlip,
Kúni boyı meni mazaqlap júr.

8 Qashan sóyley baslasam, páriyad etemen,
«Zorlıq hám qırǵın boladı», – dep baqıraman.
Jaratqan Iye, Seniń sóziń sebepli,
Kún boyı ayaq astı bolıp, kúlkige qalaman.
9 Eger ishimnen: «Endi Sen tuwralı oylamayman,
Seniń atıńnan sóylemeymen», – desem de,
Sózleriń júregimdi ot kibi,
Súyeklerimdi shoq kibi órteydi,
Onı ishimde saqlawdan sharshadım,
Artıq shıday almayman.
10 Kóplerdiń: «Ján-jaqtı qorqınısh qaplaǵan!
Ústinen shaǵım qılıń!
Bizler de shaǵım qılayıq!» – degen sıbırlısın esitemen.
Sırlas doslarımnıń hámmesi,
Qulawımdı kútip, kóz tigip:
«Bálkim ol aldanar, qolǵa túser,
Sonda óshimizdi alarmız», – deydi.
11 Biraq Jaratqan Iye, Sen batır jawınger kibi,
Meniń menen birgeseń,
Sonlıqtan meni quwǵın qılıwshılar súrnigip,
Meni jeńe almaydı.
Tabısqa erise almay,
Olar qattı uyatqa qaladı,
Olardıń ayaq astı bolǵanı,
Hesh qashan umıtılmaydı.
12 Álemniń Jaratqan Iyesi, haqlardı sınaytuǵın,
Júrek-qálibti anıq kóre alatuǵın Senseń!
Dawamdı isenip Saǵan tapsıraman,
Olardan qalay ósh alǵanıńdı kórset maǵan.

13 Jaratqan Iyege alǵıs aytıń!
Jaratqan Iyege qosıq aytıń!
Jaratqan Iyeni alǵıslań!
Sebebi jarlınıń janın,
Zalımlardıń qolınan Ol qutqaradı.

14 Men tuwılǵan kúnge nálet jawsın!
Anam meni tuwǵan kún qutlı bolmasın!
15 «Ullı boldıń», – dep ákeme xabar bergen,
Onı quwandırǵan adamǵa nálet jawsın!
16 Sol adam Jaratqan Iye ayawsız qırǵan,
Qalalarǵa ^{▼▼ Jar 18:16–19:28.} uqsasın.
Ol tań azanda ahıw-nala,
Túste urıs súrenin esitsin.
17 Óytkeni ol anamnıń qursaǵında meni óltirmedi.
Sonda anam meniń qábirim bolar edi,
Onıń qursaǵı máńgige hámile menen qalar edi.
18 Men ne ushın qursaqtan shıqqan ekenmen?
Azap hám qayǵını bastan keshirip,
Shermendelik penen ómir súriw ushın ba?